ابوظہبی (ویب ڈیسک) سٹار بیٹسمین یونس خان نے ویسٹ انڈیز کے خلاف دوسرے ٹیسٹ کی پہلی اننگز میں سنچری بنا کر ٹنڈولکر کو بھی پیچھے چھوڑ دیا، 35 برس کی عمر کے بعد یہ ان کی 13 ویں سنچری تھی، مجموعی طور پر وہ 33 سنچریاں بنا چکے۔ پاکستانی یم کے سینئر اور تجربہ کار بلے باز یونس نے 35برس کی عمر کے بعد زیادہ سنچریاں بنانے کا نیا عالمی ریکارڈ قائم کر دیا، انہوں نے کالی آندھی کے خلاف دوسرے ٹیسٹ کی پہلی اننگز میں شاندار سنچری داغ کر یہ سنگ میل عبور کیا، یہ ان کی 35 برس کی عمر کے بعد 13 ویں سنچری ہے۔ یونس خان نے بھارتی بلے بازوں سچن ٹنڈولکر، راہول ڈریوڈ اور انگلینڈ کے گراہم گوچ کی اس عرصے میں زیادہ سنچریوں کا ریکارڈ توڑ دیا، تینوں بلے بازوں نے 35 برس کی عمر کے بعد 12,12 سنچریاں بنا رکھی تھیں۔
