لاہور (سپورٹس رپورٹر) قومی کرکٹرز محمد حفیظ اور اوپنر احمد شہزاد پر قومی ٹیم سے ہمیشہ کے لئے ڈراپ ہونے کی تلوار لٹکنے لگی۔ذرائع کے مطابق سلیکشن کمیٹی نے بھی پی سی بی کے اعلی عہدیداروں کو بتا دیا ہے کہ محمد حفیظ اور احمد شہزاد کی انٹرنیشنل کرکٹ ختم ہوگئی ہے اور اب انہیں صرف ڈومیسٹک کرکٹ یا کاﺅنٹی کرکٹ پر توجہ دینی چاہیے ۔ دونوں کھلاڑی کافی عرصہ سے پرفارم نہیں کرپارہے ۔ کبھی ڈسپلن اور کبھی ان فٹ کا شکار کھلاڑی دورہ نیوزی لینڈ اور آسٹریلیا کے لئے بھی سلیکٹرز کی توجہ حاصل نہیں کرپارہے۔ تاہم پی ایس ایل میں اپنی کارکردگی دکھا کر وہ ٹی ٹونٹی قومی سکواڈ میں شامل کئے جاسکتے ہیں البتہ محمد حفیظ ٹیسٹ اور احمد شہزاد ون ڈے کے لئے ٹیم میں جگہ نہیں بنا پارہے۔ سلیکشن کمیٹی بھی نئے ٹیلنٹ کو موقع دینا چاہتی ہے تاکہ مستقبل کے لئے کھلاڑی تیار کئے جاسکیں۔
