لاہور (خصوصی رپورٹ) پنجاب یونیورسٹی نیو کیمپس کے ہاسٹل میں 22سالہ طالبہ نے گلے میں پھندا ڈال کر خودکشی کر لی۔ تفصیلات کے مطابق اٹک کی رہائشی 22سالہ طالبہ عائشہ فرقان اتھلیٹ تھی۔ اس نے پنجاب یونیورسٹی نیو کیمپس کے شعبہ سپورٹس میں بی ایس سپورٹس اینڈ سائنس میں داخلے کے لئے فارم جمع کرایا تھا اور سپورٹس ٹرائل کے لئے اپنی کزن سعدیہ اخلاق کے ساتھ یونیورسٹی ہاسٹل نمبر 5 میں اس کے کمر ے میں مقیم تھی۔ گزشتہ روز ہوسٹل کے کمرے میں عائشہ فرقان کی دوپٹے سے گلے میں پھندا لگی نعش پنکھے کے لئے لگے لوہے کے راڈ کے ساتھ جھول رہی تھی۔ اطلاع ملنے پر ہاسٹل انتظامیہ نے پولیس بلا لی۔ پولیس نے نعش قبضے میں لے کر مردہ خانے جمع کرا دی۔ پولیس کے مطابق لڑکی کی کزن نے بتایا کہ عائشہ فرقان ان دنوں گھریلو مسائل کی وجہ سے ڈیپریشن کا شکار تھی۔ جس پر اس نے خودکشی کی ہے۔ ابتدائی تفتیش سے معلوم ہوتا ہے کہ یہ خودکشی کا کیس ہے۔ لڑکی کے والدین کو اطلاع کر دی گئی ہے۔
