کراچی (نیٹ نیوز) انسداد دہشتگردی کراچی کی عدالت نے بغاوت اور ہنگامہ آرائی کے مقدمے میں بانی ایم کیو ایم، فاروق ستار، عامر لیاقت، عامر خان اور شاہد پاشا کے وارنٹ گرفتاری جاری کردیئے، ادھرآرٹلری میدان پولیس بھی ایم کیو ایم بانی سمیت آٹھ مفرور ملزمان کو اشتہاری قرار دے دیا۔ بغاوت اور ہنگامہ آرائی سے متعلق سماعت میں ایم کیوایم کے رہنما قمرمنصور شاہد پاشا گلفراز خٹک سمیت دیگرملزمان انسداد دہشتگردی عدالت میں پیش ہوئے تو عدالت نے سربراہ ایم کیوایم پاکستان فاروق ستار، عامر خان، شاہد پاشا کے وارنٹ گرفتاری جاری کردیئے۔ یہی نہیں ایس ایس پی ملیر راو¿ انوار کو عدالت نے حکم دیا کہ ملزمان کو گرفتار کرکے چھ اپریل کو پیش بھی کیا جائے۔ ادھر آرٹلری میدان پولیس نے بھی اے ٹی سی میں فاروق ستار ودیگر ملزمان کو اشتہاری قرار دینے کی رپورٹ جمع کرادی۔ رپورٹ کے مطابق اشرف نور، عارف خان اوراکرم راجپوت سمیت گیارہ ملزمان روپوش ہیں جن کیخلاف مختلف اخبارات میں اشتہار شائع کرا دیئے گئے ہیں۔ عدالت نے فاروق ستار اور عامرخان کے علاوہ بانی ایم کیو ایم سمیت آٹھ مفرور ملزمان کواشتہاری قرار دے دیا۔
