اسلام آباد (این این آئی)سوئنگ کے سلطان وسیم اکرم نے کہاہے کہ مصباح الحق اور عمران خان کا کوئی مقابلہ نہیں ¾مصباح الحق ریکارڈ کے اعتبار سے بہتر کپتان ہیں انہوں نے پاکستان کی جانب سے سب سے زیادہ ٹیسٹ میچز جیتے لیکن عمران خان جیسا کپتان دنیا میں نہیں ، وہ بہترین لیڈ اور مینٹور تھے ۔ایک انٹرویو میں انہوںنے کہاکہ مصباح الحق کے بعد ٹیسٹ کرکٹ میں سرفراز احمد کے علاوہ کوئی دوسرا کھلاڑی قیادت کے لئے موزوں دکھائی نہیں دے رہا۔اظہر علی پر فارم کررہے ہیں تاہم انہیں ون ڈے کرکٹ میں آزمایا جاچکا ہے ۔ سرفراز احمد کو ٹیسٹ ٹیم کی قیادت سنبھالنے سے پہلے اپنی فٹنس پر زور دینا ہوگا۔ انہوں نے کہا کہ المیہ یہ ہے کہ ہمیں ہوش جب آتا ہے جب کوئی بڑا ایونٹ سر پر ہو ¾ ہماری قوم بھی ورلڈ کپ یا چمپیئنز ٹرافی جیسے ایونٹ میں جاگتی ہے ¾ سب کی خواہش ہوگی کی چمپیئنز ٹرافی میں پاکستان بھارت کو شکست دے ۔ سابق کپتان نے کہا کہ ملک میں کرکٹ کا برا حال ہے ¾ آج بھی ڈومیسٹک کرکٹ میں بریانی کی دیگ آتی ہے ،جس لڑکے نے سنچری بنائی ہو اسے دوبوٹیاں دی جاتی ہیں ،جو اسکور نہ کرسکے اسے سادے چاول دئیے جاتے ہیں ¾ جب ڈومیسٹک کرکٹ کا یہ حال ہوگا تو ایسے لڑکے آسٹریلیا اور جنوبی افریقا جیسی ٹیموں کا سامنا کس طرح کریں گے۔انہوں نے پاک ویسٹ انڈیز سریز پر بات کرتے ہوئے کہا کہ ویسٹ انڈیز کی ٹیم کمزور ہے تاہم دوسرا ٹیسٹ جیت کر ان کا اعتماد بحال ہوا ہے ۔انہوں نے کہا کہ برج ٹاﺅن ٹیسٹ میں ہر ایک نے بیٹنگ کو تنقید کا نشانہ بنایا تاہم ان کی نظر میں میچ بولنگ کی وجہ سے ہارے۔،ٹیم اگر پہلی اننگز میں سو رنز پر پانچ آﺅٹ کرنے کے بعد تین سو سے زائد رنز بنوادے تو اس کی ذمہ داری بولرز پر ہی آتی ہے ۔وسیم اکرم نے کہا کہ عامر اچھی بولنگ کررہے ہیں لیکن ٹیل اینڈرز کے خلاف بولنگ کرتے ہوئے انہیں مزید محنت کی ضرورت ہے ۔