کوٹلی(نیوز ڈیسک ) آزاد جموں کشمیر میں لائن آف کنٹرول (ایل اوسی) پر بھارتی فورسز کی جانب سے فائرنگ کے نتیجے میں ایک شخص جاں بحق اور خاتون سمیت تین افراد زخمی ہوگئے، بھارتی فورسز کی جانب سے شیلنگ کا واقعہ ضلع کوٹلی کے جنوبی علاقے نکیال سیکٹر پر پیش آیا جہاں بھارتی فوج نے آٹومیٹک ہتھیار اور چھوٹے اسلحے کا استعمال کیا۔پولیس عہدیدار خورشید احمد نے بتایا کہ مقامی رہائشی عبدالوہاب قریبی گاو¿ں دوتھیلا جارہے تھے کہ مارٹرشیل لگنے سے زخمی ہونے کے بعد نکیال بازار کے قریب زخموں کی تاب نہ لاتے ہوئے دم توڑ گیا جبکہ بھارتی فوج کی شیلنگ سے بالاکوٹ میں 25 سالہ محمد شکیل، موہرا گھمبا میں 28 سالہ آصف محمود اور بوہیل کالونی میں 32 سالہ خاتون سفیرا بی بی زخمی ہوئیں۔
تمام زخمیوں کو ڈسٹرکٹ ہیڈکوارٹر ہستپال کوٹلی منتقل کردیا گیا ہے۔بھارتی فوج کی جانب سے اس قدر شدید فائرنگ کی جارہی تھی کہ پولیس زخمیوں کو بڑی دیر تک ہسپتال منتقل نہیں کرپائی اور یہ سلسلہ شام تک جاری رہا اور رات کے 8:30 بجے رک گیا۔عسکری ذرائع اور مقامی باشندوں کا کہنا تھا کہ پاکستانی فوج نے بھارتی شیلنگ کا موثر جواب دیا۔دوسری طرف ڈپٹی کمشنر عبدالحامد کے مطابق جہلم میں چکوٹھی سیکٹر پر بھی بھارتی فوج کی جانب سے شیلنگ کی گئی لیکن وہاں پر کوئی بڑا نقصان رپورٹ نہیں ہوا ہے۔حکام کے مطابق رواں برس جنوری سے اب تک بھارت لائن آف کنٹرول پر 400 سے زائد مرتبہ سیز فائر معاہدے کی خلاف ورزی کرچکا ہے، جبکہ گذشتہ برس یہ تعداد 382 تھی۔عبد الوہاب کی شہادت کے بعد جنوری سے اب تک بھارتی فورسز کی فائرنگ سے شہید ہونے والوں کی تعداد 11 تک جا پہنچی ہے جبکہ ان واقعات میں 68 سے زائد افراد زخمی بھی ہوئے ہیں۔
