لاہور (اپنے سٹاف رپورٹر سے) وزیراعلیٰ پنجاب محمد شہبازشریف نے کہا ہے کہ غریب قوم کی خون پسینے کی کمائی لوٹنے والوں اور دھرنوں کے ذریعے معیشت کا دھڑن تختہ کرنےوالو ںکا رویہ ملک وقوم سے دشمنی کے مترادف ہے۔سر سے لےکر پاﺅں تک کرپشن زدہ سیاستدانوں کے منہ سے پار سائی کی باتیں زیب نہیں دیتیں۔ سیاسی بنیادوں پر اربوں روپے کے قرضے معاف کرانےوالوں نے غریب قوم کا خون چوسا ہے۔ماضی میں اپنے دور میں کرپشن کے عالمی ریکارڈ بنانے والوں اور موجودہ دور میں ترقیاتی منصوبوں میں شفافیت اور معیار کے نئے ریکارڈ قائم کرنے والوں کو عوام جانتے ہیں۔ ترقیاتی منصوبوں میں شفافیت ،برق رفتاری اور اعلیٰ معیار کے ساتھ ان کی تکمیل مسلم لیگ (ن) کی حکومت کی پہچان ہے اور ہمارے مخالفین بھی ترقیاتی منصوبوں میں ایک دھیلے کی کرپشن ثابت نہیں کرسکتے۔ وزیراعظم کی قیادت میں ملک میں پہلی بار منصوبوں میں شفافیت کے ذریعے اربوں روپے کے قومی وسائل بچائے گئے ہیں۔ وزیراعلیٰ محمد شہبازشریف نے ان خیالات کا اظہار پاکستان مسلم لیگ (ن) کے عہدیداروں کے وفد سے بات چیت کرتے ہوئے کیا۔ وزیراعلیٰ شہبازشریف نے کہا کہ عوام کی خدمت ہمارا نصب العین جبکہ احتجاج مایوس عناصر کا مقدر ہے۔ سابق کرپٹ حکمرانوں نے قومی خزانے پر ہاتھ صاف کرکے غریب قوم کا حق چھینا اور ستم ظریفی دیکھئے کہ نندی پور پاور پراجیکٹ پر ڈاکہ ڈالنے والا قومی مجرم آج کرپشن پر لیکچر دے رہا ہے۔ جن لوگوں کی کرپشن عدالتوں کے فیصلوں میںثابت ہوچکی وہ احتساب کا شور مچاکر اس کی گرد میں چھپناچاہتے ہیں۔ انہوں نے کہا کہ دھرنا گروپ او رکرپشن زدہ حکمرانوں نے ملک کو پیچھے دھکیلنے میں کوئی کسر نہیں چھوڑی، قوم کو اندھیروں میں دھکیلنے والے خائنوں کو انصاف کے کٹہرے میں آنا ہوگا۔ وزیراعلیٰ نے کہا کہ مخالفین بے بنیاد الزام تراشیوں اور دروغ گوئی پر اتر آئے ہیں لیکن پاکستان مسلم لیگ (ن) کی قیادت کا دامن صاف اور ضمیر مطمئن ہے۔ خدمت ، دیانت اور شفافیت کی سیاست کے سامنے منفی سیاست نہیں ٹھہر سکتی۔جھوٹ کا سہارا لینے والوں کو ناکامی کا منہ دیکھنا پڑے گا۔ انہوں نے کہا کہ جھوٹ بولنے کا عالمی ریکارڈ قائم کرنے والے سیاستدان کے ہر موقع پر یوٹرن اور تضاد بیانی پوری قوم کے سامنے آشکار ہو چکی ہے اور گزشتہ چار برس کے دوران دھرنا پارٹی نے انتشار او رمحاذ آرائی کے سواکچھ نہیں کیا۔ بے بنیادالزامات لگانا اور جھوٹ بولنا عوام کے ٹھکرائے ہوئے سیاسی عناصر کی اخلاقی پسماندگی کی عکاسی کرتے ہےں۔ انہوں نے کہا کہ الزامات کی بارش اور جھوٹ کا طوفان اٹھانے والو ںنے جو حال اپنے صوبے کا کیا ہے، وہ سب کے سامنے ہے اور دھرنا دینے والوں نے اپنے صوبے میں عوام کی خدمت کا نادر موقع ضائع کیا ہے۔انہوں نے کہا کہ وزیراعظم محمدنوازشریف نے ملک کو امن او رترقی دی اور مخالفین کو یہ ہضم نہیں ہو رہاہے۔ وزیراعلیٰ نے کہا کہ پاکستان میں کرپشن میں کمی کا اعتراف عالمی سطح پر کیا گیا ہے اور مسلم لیگ (ن) کی موجودہ حکومت پاکستان کی تاریخ کی سب سے شفاف ترین حکومت ہے۔ موجودہ دور میں شفافیت کے ایسے کلچر کو فروغ دیا گیا ہے جو ماضی میں ناپید تھا۔ ترقیاتی منصوبوں میں غریب قوم کے اربوں روپے کے وسائل بچا کر روشن مثال قائم کی ہے اور دنیا بھر میں موجودہ حکومت کے ترقیاتی منصوبوں کو سراہا جا رہا ہے۔ انہوں نے کہا کہ عوام پاکستان میں انارکی پھیلانے کے خواہشمندشکست خوردہ سیاسی عناصر کے عزائم کو کبھی کامیاب نہیں ہونے دیں گے اور عوام آئندہ عا م انتخابات میں ملک کو کنگال کرنے والوں او ر ترقی کے مخالفین کا محاسبہ کریں گے۔ وزیراعلیٰ پنجاب محمدشہباز شریف نے رحیم یار خان کے قریب ٹریفک حادثے کے نتیجے میں قیمتی انسانی جانوں کے ضیاع پر گہرے دکھ اور افسوس کااظہار کیا ہے۔ وزیراعلیٰ نے جاں بحق ہونے والے افراد کے لواحقین سے دلی ہمدردی اور تعزیت کا اظہار کیا ہے۔ وزیراعلیٰ نے انتظامیہ کو ہدایت کی ہے کہ زخمی افراد کو علاج معالجے کی بہترین سہولتیں فراہم کی جائیں۔وزیراعلیٰ نے حادثے کے بارے میں انتظامیہ سے رپورٹ طلب کرلی ہے۔
