لاہور(خبر نگار) پیپلزپارٹی کے شریک چیئرمین اورسابق صدرآصف علی زرداری نے کہاہے کہ عدالت نے نوازشریف کے خلاف فیصلہ دے دیا ہے تو اسے مان کیوں نہیں لیتے؟ میں نہیں تو جمہوری عمل بھی نہیں یہ سوچ بہت خطرناک ہے ، میاں صاحب مشرف سے سمجھوتہ کرکے چلے گئے تھے جیل تو میں نے کاٹی، تھوڑی سے مسکراہٹ دے کر مشرف سے سب کچھ لے سکتا تھا ، نوازشریف کے بھائی کے انتقال پرتعزیت کیلئے جانا چاہتا تھا لیکن غیرسیاسی قوتوں کی خوشنودی کیلئے انہوں نے ملنے سے انکار کیا ، گرینڈ نیشنل ڈائیلاگ کی جگہ پارلیمنٹ ہے ،اعتزاز احسن جو بولتے ہیں وہ میری آواز ہے جبکہ رضاربانی آزاد دانشور اور سینیٹ کے چیئر مین ہیں ۔لاہور میں صحافیوں سے غیررسمی گفتگوکرتے ہوئے آصف زرداری نے کہا کہ 2013 کے انتخابات میں آر اوز مینڈیٹ کو تسلیم نہ کرتا تو بڑا بحران پیدا ہوجاتا لیکن میں نے جمہوری عمل کو جاری رکھنے کےلئے ہمیشہ سیاسی قوتوں کو اکٹھا کرنے کی کوشش کی اور ان کے ساتھ کھڑا ہوا لیکن نوازشریف نے مجھے پریشانی اور مشکل میں دیکھ کر غیرسیاسی قوت کی خوشنودی حاصل کی اور جب میں نے نوازشریف کے بھائی کے انتقال پر اظہار تعزیت کے لئے ان کے پاس جانا چاہا تو انہوں نے انہی قوتوں کو خوش کرنے کے لئے مجھ سے ملنے سے انکار کردیا۔ انہوں نے کہا کہ نوازشریف تو پرویز مشرف سے سمجھوتہ کرکے بیرون ملک چلے گئے جیل تو میں نے کاٹی، اگر میں بھی تھوڑی سے مسکراہٹ دے دیتا تو جنرل مشرف سے سب کچھ لے سکتا تھا عدالت نے نوازشریف کے خلاف فیصلہ دے دیا ہے تو وہ اس فیصلے کو کیوں نہیں مانتے، میں نے بھی تو ایک وزیراعظم ہٹا کر دوسرے کو منصب سونپ دیا تھا، میں نہیں تو جمہوری عمل بھی نہیں نوازشریف کی یہ سوچ انتہائی خطرناک ہے، انہیں چاہئے کہ وہ جمہوری عمل کو چلنے دیں۔انہوں نے کہاکہ گرینڈ نیشنل ڈائیلاگ کی جگہ پارلیمنٹ ہے ، کسی ایک شخص کو بچانے کے لیے کیسا گرینڈ ڈائیلاگ؟، نوازشریف عدالت کا فیصلہ مان کیوں نہیں لیتے؟۔ انہوں نے کہا کہ میں بھی تو ایک وزیراعظم ہٹا کر دوسرا لے آیا تھا، ہم نے جمہوری عمل کو ہمیشہ چلنے دیا اور مضبوط کیا اس لیے ملک میں جمہوری عمل کو چلنے دیا جائے۔ انہوں نے کہا کہ اعتزاز احسن جو بولتے ہیں وہ میری آواز ہیں جبکہ رضاربانی آزاد دانشور اور سینیٹ کے چیئر مین ہیں۔
