اسلام آباد(خصوصی رپورٹ) پاکستان تحریک انصاف کے چیئرمین عمران خان کے توہین عدالت کیس میں وارنٹ گرفتاری پولیس کو موصول ہوگئے۔ اس سلسلے میں وارنٹ کی کاپی ایس ایس پی آپریشنز کو بھی بھجوا دی گئی ہے اور 26 اکتوبر سے قبل گرفتاری کا امکان ہے۔ پی ٹی آئی چیئرمین عمران خان کے وارنٹ گرفتاری ایس ایس پی آپریشن اسلام آباد کو موصول ہو گئے ہیں۔ ناقابل ضمانت وارنٹ گرفتاری کے متن میں کہا گیا عمران خان عوامی نمائندگی ایکٹ کے تحت الیکشن کمشن کی توہین کے مرتکب ہوئے ہیں اسلئے انہیں 26 اکتوبر کو گرفتار کر کے صبح 10بجے الیکشن کمشن میں پیش کیا جائے۔ خط الیکشن کمشن کے ڈی جی لیگل افیئرز کی جانب سے ایس ایس پی اسلام آبادکو بھجوایا گیا۔ ذرائع کے مطابق پولیس عمران کے وارنٹ پر عملدرآمد کیلئے ٹیم تشکیل دیگی۔ عمران خان کے خلاف وارنٹ گرفتاری پر دو پتے درج ہیں۔ پہلا عمران خان کی رہائش گاہ بنی گالہ جبکہ دوسرا پی ٹی آئی مرکزی سیکرٹریٹ کا ہے اور اسلام آباد پولیس حکام کا کہنا ہے کہ قانون کے مطابق کارروائی عمل میں لائی جائیگی۔ عمران خان کو 26 اکتوبر سے ایک یا دو روز قبل گرفتار کیا جاسکتا ہے۔
