اسلام آباد(ویب ڈیسک) سابق وزیراعظم بیٹی اورداماد کے ہمراہ احتساب عدالت میں پیش ہوگئے۔ سابق وزیر اعظم نواز شریف بیٹی مریم نواز اور داماد کیپٹن (ر) صفدر کے ہمراہ احتساب عدالت میں پیش ہوگئے۔ احتساب عدالت کے جج محمد بشیر شریف فیملی کے خلاف دائر 3 نیب ریفرنسز کی سماعت کررہے ہیں۔ سماعت کے لیے عدالت نے آفاق احمد، عذیرریحان اور غلام مصطفی کو بطور گواہ طلب کررکھا ہے اوروکیل خواجہ حارث گواہوں پر جرح بھی کریں گے۔دوسری جانب احتساب عدالت کے باہرڈیلی ویجزملازمین نے نوازشریف کی گاڑی روکی اورمستقلی اور تنخواہوں کی ادائیگی کے خلاف احتجاج کیا، مظاہرین نے وزیر مملکت طارق فضل چودہری کے خلاف نعرہ بازی کی جب کہ نوازشریف مظاہرین پر نظر ڈال کر بات کئے بغیر اندر چلے گئے۔
