نئی دہلی(ویب ڈیسک) بھارت میں ایک ہفتہ قبل مندر میں 8سالہ مسلمان بچی کو اجتماعی زیادتی کا نشانہ بنائے جانے کے واقعے نے پورے ملک کو لرزا کر رکھ دیا تھا۔ ایک ہفتے بعد ہی وہاں سے ایک اور 8سالہ بچی کے جنسی زیادتی کے بعد قتل کی خبر آ گئی ہے۔ میل آن لائن کے مطابق حالیہ واقعہ بھارتی ریاست اترپردیش کے شہر کاٹھوا میں پیش آیا جہاں بچی اپنے ماں باپ کے ساتھ ایک شادی کی تقریب میں موجود تھی۔ اٹھارہ سالہ مقامی بدقماش بچی کو کوئی چیز دلانے کے بہانے اپنے ساتھ لے گیا اور شادی کے مقام سے تھوڑی دور ہی اسے جنسی زیادتی کا نشانہ بنانے کے بعد قتل کر ڈالا۔ادھر بچی کے لاپتہ ہونے پر اس کی تلا ش شروع کر دی گئی اور جب رشتہ دار رات ڈیڑھ بجے کے قریب اس زیرتعمیر عمارت میں پہنچے تو قاتل بچی کو زیادتی کے بعد قتل کرکے اس کی لاش کے پاس ہی سو رہا تھا۔ پولیس کے مطابق اہلخانہ نے شادی کے انتظامات کے لیے جن لوگوں کی خدمات حاصل کر رکھی تھیں، ملزم جتیو ان میں سے ایک تھا۔ جب اسے بچی کے لاش کے پاس سے پکڑا گیا تو اس نے شراب بھی پی رکھی تھی۔اس نے بچی کا رسی سے گلہ گھونٹ کر اسے قتل کیا، وہ رسی ہنوز بچی کی گردن کے گرد لپٹی ہوئی تھی۔
