منڈی بہاﺅ الدین (بیورو رپورٹ) آئی جی پنجاب پولیس نے سیالکوٹ میں تعینات ڈی ایس پی کے ساتھ مبینہ غیراخلاقی ویڈیو سامنے آنے پر اس سکینڈل کا نوٹس لے لیا۔ ڈی ایس پی ملازمت سے برطرف کر دیا گیا۔ ڈی آئی جی رینک کا آفیسر تفتیش کے لیے منڈی بہاﺅ الدین پہنچ گئے۔ ضلعی پولیس کی جانب سے صورتحال پر کوئی بات کرنے سے انکار۔ اعلیٰ سطح کی انکوائری شروع کردی گئی۔ تفصیلات کے مطابق منڈی بہاﺅ الدین میں تعینات رہنے والے سابق ڈی ایس پی صدر سرکل کی مبینہ ویڈیو سامنے آنے کے بعد آئی جی پولیس پنجاب نے ڈی ایس پی صدر سرکل کو ملازمت سے برطرف کر دیا اور ڈی آئی جی پولیس پنجاب منیر مسعود مارتھ کو اس مبینہ ویڈیو سکینڈل میں انکوائری آفیسر مقرر کیا ہے اور انہوں نے منڈی بہاﺅ الدین پہنچ کر تحقیقات کا آغاز کر دیا تاہم اب تک ہونے والی صورتحال کے بارے میں میڈیا کو کوئی بریفنگ نہیں دی گئی اور پولیس سے بار بار اس بارے میں معلومات لینے کی کوشش کی گئی‘ لیکن پولیس نے موقف نہیں دیا۔ تاہم اعلیٰ سطح کی انکوائری کے بعد میڈیا کو حقائق سے آگاہ کیا جائے گا۔ ذرائع کے مطابق سابق ڈی ایس پی صدر سرکل رانا ندیم طارق کی جانب سے اس مبینہ ویڈیو سکینڈل کو ایک سازش قرار دیا ہے تاہم ان کی جانب سے دی گئی تحریری درخواست پر مزید تحقیقات کی جا رہی ہیں جس میں اہم انکشافات متوقع ہیں۔
