کراچی(ویب ڈیسک)ملک کی معروف مذہبی تنظیم اور تبلیغ اسلام کی عالمگیر تحریک دعوت اسلامی کے ترجمان نے سوشل میڈیا پر دعوت اسلامی کے امیر مولانا الیاس قادری کی لندن میں مبینہ جائیداد کے حوالے سے چلنے والی خبروں کو مسترد اور ایسے بے بنیاد الزامات کی سختی کے ساتھ تردید کرتے ہوئے کہا ہے کہ مولانا الیاس قادری عالم اسلام کی ایک معتبر شخصیت ہیں ، ان کی پاکستان سے باہر تو کیا پاکستان میں بھی کوئی جائیداد نہیں اور نہ ہی ان کا کوئی بینک اکاﺅنٹ ہے ،مولانا الیاس قادری پر الزام لگانے والے چاچا شکور نامی شخص اور دیگر افراد جھوٹے ،بے بنیاد اور من گھڑت الزامات لگا کر دنیا بھر میں مولانا الیاس قادری کے کروڑوں عقیدت مندوں کی دل آزاری کا باعث بن رہے ہیں بلکہ عالم اسلام کی معتبر شخصیت کے خلاف جھوٹ بول کر وہ اپنی آخرت بھی تباہ کر رہے ہیں۔ خصوصی گفتگو کرتے ہوئے ترجمان دعوت اسلامی کا کہنا تھا کہ مولانا محمد الیاس قادری ایک معتبر شخصیت کے مالک ہیں اور یہ کئی بارمدنی چینل کے مشہور پروگرام مدنی مذاکرہ میں اس بات کا اظہار کرچکے ہیں کہ میری کوئی جائیداد نہیں اور کئی بار ان کے رہنے کا کمرہ بھی مدنی چینل پر دکھایا جا چکا ہے جس میں ایک سادہ سی کھجور کی چھال کی چٹائی ہے جس پروہ سوتے ہیں،ان کے کمرے میں صرف ایک پنکھا لگا ہوا ہے اور کچھ سادے سے برتن ہیں جن میں وہ انتہائی سادہ اور عام سی غذا کھاتے ہیں۔انہوں نے کہا کہ سوشل میڈیا پر وائرل ہونے والی خبر اور چاچا شکور نامی شخص کی جانب سے کئے جانے والے دعوﺅں میں رتی برابر بھی صداقت نہیں ،مولانا محمد الیاس قادری کی کہیں بھی کوئی جائیداد نہیں بلکہ یہاں تک کے ان کا تو کوئی بینک اکاﺅنٹ بھی نہیں ہے ،مولانا الیاس قادری پر اس طرح کے مضحکہ خیز ،جھوٹے اور سنگین الزامات عائد کرنے والےخود اپنی آخرت کو تو خراب کر ہی رہے ہیں لیکن گمراہ کن جھوٹ بول کر حضرت کے دنیا بھر میں موجود لاکھوں مریدین اور کروڑوں چاہنے والوں کی دل آزاری بھی کی ہے۔ترجمان دعوت اسلامی کا کہنا تھا کہ مولانا محمد الیاس قادری پر من گھڑت الزامات لگانے والے دنیا میں ہی توبہ کرلیں اور اللہ سے اس بہتان پر معافی مانگیں،دعوت اسلامی کی لیگل ٹیم بے بنیاد،جھوٹے اور من گھڑت الزامات لگانے والوں کے خلاف قانونی چارہ جوئی بھی کرے گی اور چاچا شکور سمیت جو بھی اس جرم میں ملوث ہوا انہیں قانون کے کٹہرے میں لائے گی۔واضح رہے کہ تحریک انصاف کے مشہور سوشل میڈیا ایکٹویسٹ چاچا شکور نےفیس بک پر وائرل ہونے والے اپنے ویڈیو بیان میں الزام عائد کیا تھا کہ دعوت اسلامی کے امیر مولانا الیاس قادری کے لندن میں مبینہ طور پر فلیٹس ہیں اور ان کی مالیت ایک اعشاریہ 2 ملین پاﺅنڈز ہے۔یاد رہے مولانا محمد الیاس قادری مشہور عالمی تبلیغی تحریک دعوت اسلامی کے سربراہ ہیں اور دنیا بھر میں انکے لاکھوں مریدین ہیں ،مولانا محمد الیاس قادری چند روز قبل ہی کئی سالوں کے بعد حج بیت اللہ کی سعادت حاصل کرنے کے لئے سعودی عرب میں موجود ہیں۔
