لاہور (اے این این) ایشیا کرکٹ پر راج کرنے کے لیے فائنل سے پہلے فائنل آج ہوگا، شائقین میچ کی شدت سے انتظار کر رہے ہیں۔روایتی حریف پاکستان اور بھارت کے ہائی وولٹیج میچ نے ایونٹ کو توجہ کا مرکز بنا دیا۔دونوں ٹیموں کے درمیان ابوظہبی کے میدان میں مقابلہ ہوگا، ایشیا کپ کے گروپ بی میں دونوں مضبوط ٹیمیں آپس میں ٹکرائیں گی۔ میچ کا آغاز شام ساڑھے چار بجے ہوگا۔دونوں ٹیموں کی جانب سے میچ کیلئے تیاریاں جاری ہیں، جنید خان، محمد عامر، حسن علی اور شاداب خان نے وکٹیں اڑانے جبکہ فخر زمان نے ایک اور سنچری بنانے کا پروگرام بنا لیا۔ شعیب ملک اور بابر اعظم بھی چھکے چھڑانے کیلئے پرعزم ہیں۔ بھارت کی جانب سے شکھر دھون اور کے ایل راہول اپنی ٹیم کا مان رکھنے کی کوشش کریں گے۔ اکشر پاٹیل اور بمرا بھی وکٹوں کے حصول کیلئے جان لڑانے کو تیار ہیں۔ قومی کرکٹ ٹیم کے کپتان سرفرازاحمد نے کہا ہے کہ پاکستان اور بھارت کا گروپ میچ ہو یا فائنل دنیا بھر کے شائقین میں بڑا جوش وخروش نظر آتا ہے، یواے ای میں روایتی حریف 12،13سال بعد مقابل ہورہے ہیں، یہاں دونوں ملکوں سے تعلق رکھنے والوں کی کثیر تعداد آباد ہے،تمام ٹکٹ فروخت ہوچکے ہیں،ہمیشہ کی طرح اس میچ کا بھی ماحول بھی بڑا شاندار ہوگا۔سرفراز احمد نے کہا کہ چیمپئنز ٹرافی کی فتح ماضی کا قصہ ہوچکی،ایشیا کپ میں نیا میچ،نئی کنڈیشنز، نیا ماحول ہوگا، بھارتی ٹیم کو مستقل کپتان ویرات کوہلی کی خدمات حاصل نہیں،ایک عرصہ تک قیادت کرنے والے بیٹسمین کے نہ ہونے سے تھوڑا بہت فرق تو پڑے گا لیکن روہت شرما،شیکھر دھون اور مہندرا سنگھ دھونی جیسے تجربہ کار کرکٹرز کی موجودگی میں ہمیں ایک مضبوط ٹیم کیخلاف بہترین کھیل پیش کرنا ہوگا، دوسری جانب پاکستان کو بھی چیمپئنز ٹرافی فائنل کھیلنے والے چند کرکٹرز کی خدمات حاصل نہیں،اس لیے میرے خیال میں نفسیاتی برتری والی بات اہم نہیں۔ایک سوال کے جواب میں سرفراز احمد نے کہاکہ پاکستان اور بھارت کا کوئی میچ دبا کے بغیر نہیں ہوتا،کھلاڑیوں کو ہمیشہ تلقین کرتاہوں،اس بار بھی کی ہے کہ ہار اور جیت کی پرواہ کیے بغیربے خوف ہوکر 100فیصد کارکردگی دکھانے کی کوشش کریں اور نتیجہ اللہ پر چھوڑ دیں، دبئی کی کنڈیشنز میں ہائی اسکورنگ مقابلہ ہوسکتا ہے۔انھوں نے کہا کہ پاکستانی ٹاپ آرڈر کا تسلسل کیساتھ کارکردگی دکھانا خوش آئند ہے، فخرزمان، امام الحق اور بابر اعظم رنز کررہے ہیں،یواے ای کی کنڈیشنز میںٹاپ آرڈر کی پرفارمنس کی اہمیت مزید بڑھ جاتی ہے، یہاں نئی گیند بیٹ پر آتی اور اسٹروکس کھیلنا آسان ہوتا ہے، بعد پچ سلو ہوجاتی ہے اور آنے والے بیٹسمینوں کو سیٹ ہونے کیلیے وقت درکار ہوتا ہے۔ اوپر والے رنز بنائیں تو بڑا ٹوٹل حاصل کرنا آسان ہوجاتا ہے۔بھارت کیخلاف میچ کیلیے تبدیلیوں کا عندیہ دیتے ہوئے سرفراز احمد نے کہا کہ ہانگ کانگ سے مقابلے میں پچ بالکل نئی تھی،اس لیے 4 پیسرز کو کھلانے کا فیصلہ کیا جو کامیاب بھی رہا، جس پچ پر ہمارا روایتی حریف سے مقابلہ ہوگا، وہاں بھارتی ٹیم پہلے ہی ایک میچ کھیل چکی ہوگی،استعمال شدہ پچ کی حالت کو دیکھتے ہوئے پلیئنگ الیون میں تبدیلی کا فیصلہ کریں گے، عام طور پر میچز میں ہم 5بیٹسمینوں، 2آل رانڈرز اور ایک وکٹ کیپر کیساتھ میدان میں اتر رہے ہیں۔ایک سوال کے جواب میں سرفراز احمد نے کہا کہ محمد عامر ہانگ کانگ کیخلاف میچ میں وکٹ نہیں لے سکے، تھوڑا ردھم کی کمی نظر آئی لیکن مجموعی طور پر اچھی بولنگ کی۔ پیسر محنت کررہے ہیں،پوری امید ہے کہ آئندہ میچز میں وکٹیں بھی لیں گے، عثمان شنواری نے مسلسل دوسرے مقابلے میں مین آف دی میچ حاصل کیا ہے، نوجوان پیسر ٹیم میں اپنی جگہ پکی کرتے جارہے ہیں، شاداب خان بھی زبردست بولر ہیں، مجموعی طور پر ہمارے پاس اچھی بولنگ لائن اپ موجود ہے۔وزیراعظم عمران خان کا ایشیا کپ کا سب سے بڑا ٹاکرا دیکھنے کے لیے کل دبئی انٹرنیشنل اسٹیڈیم جانے کا امکان ہے۔ سفارتی ذرائع کے مطابق وزیراعظم عمران خان سعودی عرب روانہ ہو گئے جہاں وہ حکام سے ملاقات کریںگے اور عشائیے میں بھی شرکت کریں گے۔ سفارتی ذرائع کا کہنا ہے کہ وزیراعظم سعودی عرب کے بعد کل متعدہ عرب امارات پہنچیں گے جہاں دبئی انٹر نیشنل اسٹیڈیم میں پاک بھارت میچ دیکھنے کے لیے ان کے جانے کا بھی امکان ہے۔ یادرہے کہ چیمپئنز کے فائنل کے بعد پاکستان اور بھارت کی ٹیمیں ایک مرتبہ پھر کل مدمقابل ہوں گی۔
