تازہ تر ین

ہم اس کے پاسباںہیں

انجینئر افتخار چودھری …. باعث افتخار
تحریک انصاف کا سفر مثبت سمت میں جاری و ساری ہے ہزار مخالفتوں کے باوجود نا تجربہ کار ٹیم تجربہ کاروں کی مشاورت سے سب رکاوٹوں اور سب پابندیوں کو پھلانگتے جا رہی ہے۔اسے بہت ساری مزاحمتی قوتوں کا سامنا ہے ایسا لگتا ہے کپتان نے اپنی ٹیم میں اک شعلہ ءجوالہ بھر دیا ہے اور انہیں سمجھا رکھا ہے کہ سچ کے سفر میں کنکر ہیں روڑے ہیں پتھر ہیں مگر اللہ کا نام لے کر بڑھتے چلے جاﺅ کوئی آپ کو روک نہیں سکتا کوئی آپ کو ٹوک نہیں سکتا۔تبدیلی کی اس گاڑی کے راستے میں پتھر روڑے اٹکانے والے بہت ہیں مگر سچ پوچھیں جس کا بھروسہ اللہ پر ہو اور جواپنے آپ کو انتہائی گنہگار سمجھتے ہوئے بھی ایک ایسی ریاست کی بات کرتا ہے جس کو اس نے ننگے پاﺅں چھوا ہے اور وہ آج بھی اسی اللہ اور اس کے رسول سے رہنمائی لینے سعودی عرب پہنچ گیا ہے۔بہت سے دوروں کی بات ہو رہی تھی‘ لوگ کہہ رہے تھے عمران امریکہ جائیں گے برطانیہ کا دورہ ہو گا تو میرا دل کہہ رہا تھا عمران اسی کے پاس جائیں گے جس کے در سے یہ عہدہ ملا۔اور ہوا بھی وہی جو اس کے ایک جاں نثار افتخار اور اس جیسے ہزاروں نے سوچا۔ پاکستان کے ویز اعظم اس دھرتی پر پہنچے جہاں ان کی پذیرائی ۔شاہ سلمان اور ولی عہد محمد بن سلمان نے کی۔میں کن لمحات میں کھویا ہوا ہوں یہ اللہ جانتا ہے سوچیں اتنی کہ کالم میں جگہ نہیں لیکن میں نے ہر وہ بات لکھی جو میری آنکھوں نے دیکھیں۔ مجھ پر بیتی2004ءکی وہ گھڑی جب میں پاکستان سے عمرہ کرنے گیا۔ یہ دوپہر کا وقت ہے جو مجھے یاد آ رہا ہے صفا مروہ کے اوپر والے حصے پر عمرہ ختم ہوتا ہے میرے ساتھ اسلم کھوکھر ہیں جو مجھے اپنے ساتھ لے گئے تھے میں نے ایک طویل القامت گندمی رنگ کے ایک شخص کو سیکورٹی کے جلو میں دیکھا میں نے نے بے دھڑک انہیں آواز دی اور کہا آپ کی عمر دراز ہو امیر سلمان‘ میں ایک پاکستانی آپ سے بات کرنا چاہتا ہوں ۔انہوں نے مجھے پاس بلایا احرام میں ان سے مکالمہ ہوا میں نے عرض کی اے امیر آپ کو عمرہ مبارک ہو ہم پاکستانی آپ سے محبت کرتے ہیں ۔عربی میں باتیں جاری تھیں میں نے یہ بھی کہا ہمارا پیار اس وجہ سے ہے کہ ہم ارض حرمین کو اپنا دوسرا نہیں پہلا گھر مانتے ہیں۔ہمیںآپ کی اسلام دوستی سے پیار ہے۔انہوں نے بڑے شفیق انداز سے میرے کندھوں پر ہاتھ رکھا اور کہا ایضاً بلکل ایسا ہی ادھر بھی ہے۔یہ وطن آپ کا ہی ہے۔ وہ لمحات آج بھی مجھے یاد ہیں۔2010ءمیں جب جدہ میں سیلاب آیا تو پاکستانیوں نے اپنے سعودی بھائیوں کو بچانے میں اہم کردار ادا کیا۔ بہت کم پاکستانیوں کو علم ہے کہ وہاں ایک سڑک شارع فرمان علی خان کے نام سے بھی مشہور ہے۔یہ فرمان علی خان ایک غیور پٹھان تھا جس نے سیلاب میں بہتے ہوئے سترہ سعودیوں کو غویزہ کے علاقے میں بچایا۔البیک شارع مکہ الغویزہ کے پاس یہ سڑک اس بہادر فرمان علی خان کے نام پر آج بھی موجود ہے۔سعودی عرب میں مقیم پاکستانیوں نے اس ملک کی تعمیر میں خون پسینہ بہایا اور جانیں بھی دیں۔کبھی کسی گھڑی پاکستانیوں نے سعودی عرب کے بارے میں برا نہیں سوچا۔
ہم پاکستانیوں کو ایک غلط سبق پڑھانے کا سلسلہ کوئی تین دہائیوں سے جاری ہے۔ہمیں اس ملک کے لوگوں سے دور کرنے کی سازش ہو رہی ہے بلکہ کی جا رہی ہے اس سازش کو پھیلانے میں پیسہ شامل ہے۔ہمیں کوئی نہیں بتاتا کہ یہ وہ ملک ہے کہ جس کی کرنسی پر پاکستانیوں کے نام لکھے جاتے تھے۔اس ملک کے ایک بادشاہ ہوا کرتے تھے جن کا نام شہید فیصل بن عبدالعزیز تھا وہ دسمبر 1971ءکی اس شام کو گڑ گڑا کے روئے جب پاکستان دو لخت ہوا۔ہم زمانہ قبل از نائین الیون میں شیر و شکر تھے پھر ہمیں مسلمان فرسٹ کی بجائے پاکستان فرسٹ کے نعرے کا گرویدہ بنانے کی کوشش کی گئی۔میں نے سعودی عرب کا کونہ کونہ دیکھا ہے وہاں رہاں ہوں۔ وہاں کے لوگ اللہ اور اس کے رسول کے چاہنے والے ہیں اور یہاں کے پاکستانی اس پر فدا ہونے والے۔
میں ایک مدت سے ایک تحریک چلا رہا ہوں کہ ہم حلقہ ءیاراں میں ایک ہی رشتے سے جڑے ملک ہیں ایک ہی تسبیح کے دانے ہیں۔کچھ لوگوں کے ذہن میں ہے کہ ہم سعودی عرب کی طرف جب دیکھتے ہیں تو اس میں کوئی لالچ ہوتی ہے۔ پاکستان کے موجودہ وزیر اعظم کسی وکھری مٹی سے بنے ہوئے پاکستانی ہیں وہ سعودی عرب کو اپنا دوست بھائی سمجھتے ہیں اور اسی طرح کی توقع وہ سعودیوں کی جانب سے بھی رکھتے ہیں۔
پاکستان ایک خود مختار ملک ہے دنیا کی ایک ایٹمی طاقت جسے دشمن کی آنکھ میں آنکھ ڈال کر جینے کا سلیقہ آ گیا ہے۔اسے علم ہے دنیا طاقت کی زبان سمجھتی ہے اور اسے یہ بھی پتہ چل گیا ہے کہ چاپلوس لالچی کی زندگی کسی سگ آواہ سے کم نہیں۔
موجودہ پاکستان کو اس تازہ حلئے سے شناخت کیجئے۔سعودی عرب ہمارا بھائی ہے ہم اس کی سلامتی کو اپنی سلامتی سمجھتے ہیں اس لئے کہ دنیا کے بت کدے میں خدا کا پہلا گھر وہیں ہیں۔اور اس گھر کی حفاظت کی ذمہ داری ہم پربھی ہے۔ہمارے دلیر وزیر اعظم اقبال کا پاکستان دیکھنا چاہتے ہیں قائد اعظم اور نقاش پاکستان کا پاکستان دیکھنا چاہتے ہیں۔اس باحمیت پاکستان کو محبت کی نگاہ سے دیکھئے۔پاکستان کے لٹیروں کو موجودہ انتخابات میں شکست فاش مل چکی ہے۔شہنشاہ ایران کی طرح دھرتی انہیں پناہ نہیں دے رہی انہیں کسی جگہ دولت کے بل بوتے پر پناہ نہیں ملنی چاہئے۔سعودی عرب میں مقیم پاکستانی ایک عرصے سے پریشان ہیں۔بھلے سے اپنے قوانین کا نفاذ کریں مگر انہیں با وقار اخراج دیجئے وہاں کی کمپنیوں نے ان کے بقایہ جات مار رکھے ہیں انہیں دیجئے۔وہ ابنائے وطن یہاں آئیں ہم روکھی سوکھی کھا لیں گے بلکہ ہم تو اپنی روکھی سوکھی افغانیوں اور بنگالیوں بہاریوں کے ساتھ بھی بانٹنے کا اعلان کر چکے ہیں۔آپ بھی پیار دیجئے ۔وہ ارض پاک ہے اور یہ ارض مقدس ہمیں بھی مدینے کی طرح پاکستان پیارا ہے اس لئے کہ مدینے کی خاک کی نسبت سے یہ ملک وجود میں آیا ہے ۔
( تحریک انصاف کے ڈپٹی سیکرٹری اطلاعات ہیں)
٭….٭….٭


سب سے زیادہ پڑھی جانے والی مقبول خبریں




دلچسپ و عجیب
کالم
آپ کی رائے
   پاکستان       انٹر نیشنل          کھیل         شوبز          بزنس          سائنس و ٹیکنالوجی         دلچسپ و عجیب         صحت        کالم     
Copyright © 2016 All Rights Reserved