اسلام آباد (مانیٹرنگ ڈیسک) وزیر ریلوے شیخ رشید نے کہا ہے کہ وزیراعظم کا دورہ چین کامیاب ترین دورہ تھا، چینی حکام عمران خان کی گفتگو سے متاثر نظر آئے عمران خان نے چین سے جو وہ دے رہا تھا ڈبل مانگا تو بھی انہوں نے دیا۔ چینی رہنماﺅں کی عمران خان بارے رائے بڑی مختلف اور مثبت ہے، دبئی سے بھی چند دنوں میں اچھی خبریں آئیں گی۔ عمران خان دن رات کام میں مصروف ہیں انہیں کامیاب ہوتے دیکھ رہا ہوں۔ نجی ٹی وی سے خصوصی گفتگو میں انہوں نے کہا کہ ملک کو لوٹنے والے نہیں بچیں گے، جنہوں نے گاجریں کھائی ہیں انہیں پھکی تو کانا ہی پڑے گی، لٹیروں کی سیاست کی ایکسپائری تاریخ آ گئی ہے۔ اپوزیشن کے پاس اب کہنے کو کچھ نہیں ہے بلاوجہ بول رہے ہیں ان کے انجن بیٹھ گئے ہیں دھواں نکل رہا ہے اگلے سال میں ٹھس ہو جائیں گے۔ ن لیگ اور پیپلزپارٹی دونوں ہی فارغ ہو جائیں گے۔ آصف زرداری کی اولاد نے علم بغاوت بلند کر دیا ہے ان کے اختیار میں نہیں ہے، بلاول اگر زرداری کے چنگل سے نکل گیا تو بہتر ہو سکتا ہے۔ ن لیگ سے بھی نئے چہرے آگے آئیں گے۔ میری کوشش اور خواہش ہے کہ وزارت ریلوے باقی وزارتوںکے مقابلے میں نمبر ون پر رہے۔ صورتحال یہ ہے کہ پہلے ریلوے میں گینگ مینوں کی ہزاروں اسامیاں خالی رہتی تھیں اب اس معمولی نوکری کیلئے 2 لاکھ 87 ہزار بی اے، ایم اے پاس نوجوانوں کی درخواستیں آ چکی ہیں۔ عام پاکستانی مشکل میں ضرور ہے تاہم مطمئن ہے اور سمجھتا ہےکہ عمران خان ان طاقتوں کیخلاف جدوجہد میں مصروف ہے جنہوں نے ملک کو ان حالات تک پہنچایا ہے۔ صرف مراعات یافتہ طبقہ پریشان ہے۔ مہنگائی ابھی مزید بڑھے گی تاہم عمران خان کو تھوڑا وقت اور مل گیا تو حالات میں بہتری آنا شروع ہو جائے گی۔ مشکل میں تنخواہ دار طبقہ گرا ہوا ہے۔ مجھ سمیت جو بھی وزیر پرفارم کرنے میں ناکام رہے تو اسے فارغ کر دینا چاہئے۔ چیف جسٹس نے ملک کے لئے بہت کام کیا۔ انہیں سلام پیش کرتا ہوں، اگلے چیف جسٹس بھی بڑے باوقار اور زہین ہیں۔ مجھے یقین ہے کہ پاکستان اب ترقی کی جانب بڑھے گا۔ شہباز شریف نواز شریف سے 10 قدم آگے ہیں اس نے این آر او کی بڑی کوشش کی یہ ناکام رہا۔ اب کسی کو این آر او نہیں ملے گا اس لئے تو یہ لوگ مرے جا رہے ہیں۔ آصف زرداری کی ہنسی مصنوعی ہے۔ ان لوگوں نے ساری عمر دولت اکٹھا کرنے میں لگا دی اب وہی ان کے کسی کام نہیں آئے گی۔ وقت آئے گا تو اسمبلی میں بولوں گا۔ کسی جگہ کب بولنا ہے یہ شیخ سے زیادہ بہتر کوئی نہیں جانتا۔ اپوزیشن کے پاس بولنے کو اب کچھ نہیں ہے اسی لئے ہی ادھر ادھر کی ہانک رہی ہے۔ شیخ رشید نے کہا کہ میں گریڈ 22 کی سیاست کر رہا ہوں، گریڈ 19 سے نیچے کے سیاستدانوں کو منہ نہیں لگاتا۔
