گوجرانوالہ (نیااخبار رپورٹ) ایف آئی اے سائبر کرائم ونگ نے گجرات میں کارروائی کرتے ہوئے بیوی کی نازیبا ویڈیوز بنا کر بلیک میل کرنے والے شوہر کو گرفتار کر لیا۔ تفصیلات کے مطابق ملزم نے سعودی عرب میں مقیم لڑکی سے سوشل میڈیا پر دوستی کی تھی‘ لڑکی گجرات آئی تو دونوں نے گھر والوں کو بتائے بغیر شادی کرلی۔ شادی کے بعد ملزم نے بیوی کی ویڈیوز بنائیں اور بلیک میل کرنا شروع کردیا۔ ایف آئی اے کے مطابق ملزم بیوی کو نامعلوم شخص بن کربلیک میل کرتا اور ویڈیو اپ لوڈ کرنے کی دھمکی دیتا تھا۔ ملزم نے بیوی سے لاکھوں روپے بٹورے۔ تنگ آکرلڑکی نے گھر والوں کو بتا دیا۔ ایف آئی اے نے ملزم کو گرفتار کیا تو ملزم خاتون کا شوہر نکلا۔ اسسٹنٹ ڈائریکٹر ایف آئی اے کے مطابق ملزم کے موبائل سے بیوی کی ویڈیوز برآمد کر لی گئیں۔
