کراچی(ویب ڈیسک) پشاور زلمی کے مصباح الحق کا کہنا ہے کہ ہمیں ہر طرز کی کرکٹ کو اہمیت دینا چاہے، پی ایس ایل کا پریشر گیم ہوتا ہے مگر ڈومیسٹک کی اہمیت اپنی جگہ ہے۔نیشنل اسٹیڈیم میں سابق ٹیسٹ کپتان مصباح الحق نے میڈیا سے بات چیت کرتے ہوئے کہا کہ ہماری ٹیم میں میچ ونرز موجود ہیں  لیکن حریف سائیڈ اچھا کھیلی اور فائنل میں رسائی پانے میں کامیاب رہی، ٹی ٹونٹی پریشر کا کھیل ہے وہی ملکی اور غیر ملکی کھلاڑی پرفارمنس دے رہے ہیں جو تجربہ کار ہیں۔مصباح الحق کا کہنا تھا کہ کوشش کرتے ہیں کہ اچھی پرفارمنس دیں، کوئٹہ گلیڈی ایٹرز کے خلاف کوالیفائر میچ میں ہمارا دن نہیں تھا، نئے کھلاڑیوں کو کھیل کے ساتھ  ڈسپلن اور فٹنس پر توجہ دینا ضروری ہے، طویل  کرکٹ کی مشکل صورتحال کو سنبھالنے کے لیے تجربہ ضروری ہے، ہم فائنل میں جگہ بنانے  کے لیے کراچی کنگز اور اسلام آباد یونایٹیڈ  دونوں سے کھیلنے کے لیے تیار ہیں۔ ایک سوال کے جواب میں انہوں نے کہا کہ ہمیں ہر طرز کی کرکٹ کو اہمیت دینا چاہے ،پی ایس ایل کا پریشر گیم ہوتا ہے مگر ڈومیسٹک کی اہمیت اپنی جگہ ہے۔

دبئی (آئی این پی)پاکستانی کرکٹ ٹیم کے سابق کپتان مصباح الحق کا کہنا ہے کہ پاکستانی ٹیم کو سری لنکن سپنر رنگانا ہیرتھ کے خلاف اپنی حکمت عملی تبدیل کرنی ہوگی اور ان کے خلاف جارحانہ کھیل کھیلنا ہوگا۔ مصباح الحق نے کہا کہ سیریز سے قبل یہ بات سب کو معلوم تھی کہ رنگانا ہیرتھ پاکستانی ٹیم کے لیے خطرہ بن سکتے ہیں۔ وہ ایک ایسے بولر ہیں جو دنیا کے تجربہ کار بلے بازوں کے خلاف بھی مشکلات پیدا کردیتے ہیں جبکہ پاکستان کی موجودہ بیٹنگ لائن ابھی تجربہ کار نہیں ہے۔ پاکستانی بلے بازوں کو ان کے خلاف اٹیکنگ کرکٹ کھیلنی ہوگی۔ اگر آپ سوچیں کہ وہ آپ کو خراب گیندیں کریں گے تو یہ بہت مشکل ہے۔مصباح الحق نے کہا کہ پاکستان کی موجودہ ٹیم کو ٹیسٹ کرکٹ کے معاملات سمجھنے میں ابھی وقت لگے گا۔ یہ ٹیم باصلاحیت ہے اور انھیں یقین ہے کہ اس میں وقت کے ساتھ ساتھ بہتری آئے گی۔ خوش آئند بات یہ ہے کہ اوپنرز نے اچھی شراکت قائم کی۔سابق کپتان نے کہا کہ حارث سہیل کی بیٹنگ میں پختگی نظرآئی۔ یاسر شاہ نے بہت ہی عمدہ بولنگ کی۔ ایک سلو وکٹ پر محمد عباس نے اچھی بولنگ کی۔مصباح الحق نے اظہرعلی اور اسد شفیق کے بیٹنگ آرڈر میں تبدیلی کو درست فیصلہ قرار دیتے ہوئے کہا کہ آپ کے تجربہ کار بلے باز ہمیشہ اوپر کے نمبر پر بیٹنگ کرتے ہیں۔ یہاں تک کہ وہ سرفراز احمد کو بھی پانچویں اور چھٹے نمبر پر کھیلتے ہوئے دیکھنا چاہیں گے جن کی بیٹنگ اوسط چالیس سے اوپر ہے اور وہ سپن بولنگ کو بہت اچھا کھیلتے ہیں۔اظہرعلی کو نمبر تین پر کھلانے کی بنیادی وجہ یہی ہے کہ یونس اور ان کے جانے کے بعد جو جگہ خالی ہوئی ہے اسے ایک تجربہ کار بلے باز سے پر کیا جائے۔مصباح الحق نے ابوظہبی ٹیسٹ میں تین فاسٹ بولرز کھلائے جانے کے بارے میں کہا کہ وکٹ پر جس طرح کی گھاس تھی اور پہلی بولنگ پر آپ سوچتے ہیں کہ اس پر سپنر کو زیادہ مدد نہیں ملتی۔ جنوبی افریقہ کے خلاف بھی ابوظہبی میں پاکستان نے تین فاسٹ بولرز کھلائے تھے لیکن امارات میں جیسی بھی کنڈیشن ہو آپ کو دو سپنرز کھلانے ہی ہیں چاہے آپ ٹیم میں تین فاسٹ بولرز بھی رکھیں۔مصباح الحق نے کہا کہ اس گرم موسم میں جب وکٹ بہت جلد خشک ہوجاتی ہے آپ کو ہر حال میں دوسرے سپنر کی ضرورت پڑتی ہے لیکن پاکستانی ٹیم کا اس وقت مسئلہ یہ ہے کہ اس کی بیٹنگ نا تجربہ کار ہے لہذا وہ پانچ بولرز کے ساتھ اپنا کامبینیشن نہیں بناسکتی۔

کنگسٹن(ویب ڈیسک )قومی ٹیسٹ ٹیم کے کپتان مصباح الحق پاکستان کی جانب سے ٹیسٹ کرکٹ میں 5 ہزار رنز مکمل کرنے والے ساتویں بیٹسمین بن گئے۔ مصباح الحق بطور کپتان 5 ہزار رنز مکمل کرنے والے پہلے پاکستانی اور ایشیائی بلے باز بھی بن گئے،بیالیس سال کی عمر میں پانچ ہزار ٹیسٹ رنز مکمل کرنے والے دنیا کے دوسرے معمر ترین کرکٹر کا اعزاز بھی مصباح کے نام ہو گیا۔ تفصیلات کے مطابق مصباح الحق نے ٹیسٹ کرکٹ میں 5 ہزار رنز مکمل کرلیے جس کے بعد وہ پاکستان کے لیے یہ اعزاز حاصل کرنے والے ساتویں بیٹسمین بن گئے، انھوں نے یہ اعزاز ویسٹ انڈیز سے سیریز کے پہلے ٹیسٹ میں حاصل کیا۔واضح رہے کہ سب سے زیادہ رنز بنانے والے پاکستانی بیٹسمین یونس خان ہیں، وہ 116میچز میں10035رنز اسکورکر چکے، جاوید میانداد 8832، انضمام الحق8829، محمد یوسف7530، سلیم ملک5768 اور ظہیر عباس 5062 رنز بنا چکے۔یاد رہے کہ اسی میچ میں مصباح الحق کے ہم وطن یونس خان نے دس ہزار ٹیسٹ رنز کا سنگ میل عبور کیا تھا۔دوسری جانب مصباح الحق بطور کپتان پانچ ہزار رنز مکمل کرنے والے پاکستان ہی نہیں بلکہ ایشیا کے پہلے اور دنیا کے نویں بلے باز بن گئے ہیں۔ جس میں ان کی دس شاندار سنچریاں بھی شامل ہیں۔ مصباح الحق نے کیرئیر کے 73 ویں ٹیسٹ میچ کی پہلی اننگز میں یہ اعزاز حاصل کیا۔ بیالیس سال کی عمر میں پانچ ہزار ٹیسٹ رنز مکمل کرنے والے دنیا کے دوسرے معمر ترین کرکٹر کا اعزاز بھی مصباح کے نام ہو گیا۔

شارجہ ۔ 02 مارچ (ویب ڈیسک) پاکستان سپر لیگ کے پہلے ایڈیشن کی چیمپئن اسلام آباد یونائیٹڈ کے قائد مصباح الحق نے کوالیفائنگ فائنل میں شکست پر سخت مایوسی کا اظہار کرتے ہوئے کہا کہ خراب بیٹنگ شکست کی وجہ بنی، اسلام آباد کی ٹیم کراچی کے خلاف 127 رنز کے تعاقب میں 82 رنز پر ڈھیر ہو گئی جس کی وجہ سے اسے ٹورنامنٹ سے باہر ہونا پڑا۔ اپنے ایک بیان میں مصباح الحق نے کہا کہ باﺅلرز نے شاندار کارکردگی کا مظاہرہ کیا جس کی وجہ سے کراچی کی ٹیم بڑا سکور کرنے میں ناکام رہی، اس پچ پر ہدف مشکل نہیں تھا، ہم بآسانی جیت سکتے تھے مگر بلے بازوں نے انتہائی غیرذمہ داری سے بیٹنگ کی اور غیرضروری سٹروک کھیلتے ہوئے وکٹیں گنواتے رہے۔ مصباح الحق نے ابھرتے ہونے نوجوان آل راﺅنڈر شاداب خان کی تعریف کرتے ہوئے کہا کہ وہ باصلاحیت کرکٹر ہیں اور انہوں نے اپنی کارکردگی سے سب کو متاثر کیا۔ ایک سوال کے جواب میں انہوں نے کہا کہ اگرچہ ان کی ٹیم فائنل میں نہیں ہوگی تاہم لاہور میں فائنل کا انعقاد خوش آئند ہے اور شائقین کے لئے ایک بڑا میچ ہوگا۔

لاہور: (ویب ڈیسک) مصباح الحق نے میڈیا سے گفتگو کرتے ہوئے کہا ہر کوئی چاہتا ہے پی ایس ایل کا فائنل لاہور میں ہو۔ پی ایس ایل کے دوران کلیئر ہو جائے گا میں نے آئندہ کھیلنا ہے یا نہیں تاہم اس حوالے سے مجھ پر کوئی پریشر نہیں۔ ان کا مزید کہنا تھا عمر کا نہیں اصل مسئلہ فٹنس اور پرفارمنس کا ہے وہ فارم میں واپس آنے کے لیے پریکٹس کر رہے ہیں۔ انہوں نے کہا جو مسائل ہیں ان کے حل کے لیے سب کو ملکر کام کرنا چاہیے اور ہمارے پاس ٹیلنٹ ہے صرف ڈومیسٹک کرکٹ کو بہتر کرنے کی ضرورت ہے۔ مصباح الحق نے کہا کسی ایک کھلاڑی کے بدلنے سے نمبر ون نہیں بن سکتے۔ کھلاڑیوں کے بارے مثبت بات کرنی چاہیے اور انہیں سلیوشن دینا چاہیے۔

لاہور(ویب ڈیسک) آسٹریلیا کےخلاف ایک روزہ میچوں کی سیریز میں مایوس کن کارکردگی اور ٹیم کی شکست کے بعد اظہر علی قیادت کے منصب سے تو محروم ہو جائیں گے لیکن پاکستان کرکٹ نے انہیں مصباح الحق کی جگہ ٹیسٹ ٹیم کا قائد مقرر کرنے کا فیصلہ کیا ہے۔پی سی بی میں موجود باوثوق ذرائع کے مطابق چیف سلیکٹر انضمام الحق نے چیئرمین پی سی بی شہریار خان کو تجویز پیش کی ہے کہ مارچ اپریل میں شیڈول دورہ ویسٹ انڈیز کیلئے وکٹ کیپر بلے باز سرفراز احمد کو قیادت سونپ دی جائے۔ انضمام نے اس کے ساتھ ساتھ مایوس کن دورہ نیوزی لینڈ اور آسٹریلیا کے بعد چیئرمین پی سی بی کو ٹیم میں چند بنیادی تبدیلیاں کرنے کا بھی مشورہ دیا ہے۔ ذرائع نے مزید بتایا کہ پی سی بی چیئرمین اور چیف سلیکٹر ٹیسٹ کپتان مصباح الحق اور سینئر بلے باز یونس خان سے ملاقات کر کے انہیں بورڈ کے مستقبل کے منصوبوں کے حوالے سے آگاہ کریں گے۔اس بات کا اصولی فیصلہ کیا جا چکا ہے کہ مصباح الحق کو دورہ ویسٹ انڈیز کے بعد ریٹائرمنٹ لینے کی تجویز پیش کی جائے گی جبکہ تجربہ کار یونس کو بھی کہا جائے گا کہ وہ ویسٹ انڈیز کے خلاف تین ٹیسٹ میچوں کی سیریز میں 10ہزار رنز کی تکمیل کے بعد کرکٹ سے کنارہ کشی کا اعلان کردیں۔ذرائع نے تصدیق کی کہ بورڈ نے مصباح الحق کی ریٹائرمنٹ کے بعد اظہر علی کو ٹیسٹ ٹیم کی قیادت سونپنے کا فیصلہ کیا ہے جبکہ ٹی ٹوئنٹی ٹیم کے کپتان سرفراز احمد ون ڈے ٹیم کی باگ ڈور بھی سنبھالیں گے۔

سڈنی (ویب ڈیسک)قومی ٹیم کے ٹیسٹ کرکٹ ٹیم کے کپتان مصباح الحق اپنی ریٹائر منٹ کے بیان سے مکر گئے ،کہتے ہیں ریٹائرمنٹ کی بات غصے اور مایوسی میں کہہ دی تھی ۔ سڈنی میں ٹیسٹ میچ کھیلنے سے قبل میڈیا سے گفتگو کرتے ہوئے ریٹائرمنٹ کے حوالے سے تمام قیاس آرائیوں کو مسترد کر دیا اور کہا کہ ریٹائرمنٹ کی بات غصے اور مایوسی میں کہہ دی تھی،ریٹائر منٹ کی بات 2016میں کی تھی اب 2017ہے، بات پرانی ہوگئی ہے۔مصباح الحق نے کہا ابھی ریٹائرمنٹ کے بارے میں بالکل نہیں سوچ رہا، نظریں صرف سڈنی ٹیسٹ پر مرکوز ہیں۔42سالہ مصباح نے کہا کہ انھوں نے اپنے انٹرنیشنل کریئر کو ابھی ختم کرنے کے بارے میں سوچا نہیں ہے تاہم ملکی خبررساں ادارے نے دعوی کیا کہ وہ اس بارے میں پاکستان واپسی پر کوئی فیصلہ کریں گے۔