استنبول(آئی این پی) وزیراعظم شاہد خاقان عباسی نے ترکی کے جنگی ہیلی کاپٹر ٹی129کو اڑا کر تجرباتی پرواز کی۔ وزیراعظم شاہد خاقان عباسی کا کہنا تھا کہ ترکی کی دفاعی پیداوار کی صنعت کا شمار دنیا کی بہترین صنعتوں میں ہوتا ہےجس کا کوئی مقابل نہیں ہے، ٹی 129 ہیلی کاپٹر کی خریداری کے حوالے سے ترک حکام سے بات چیت جاری ہے اور پاک فوج بھی ہیلی کاپٹر کی خریداری کا جائزہ لے رہی ہے۔تفصیلات کے مطابق وزیراعظم شاہد خاقان عباسی نے ترک لڑاکا ہیلی کاپٹر ٹی 129 کی اڑان بھر کر پاکستانی تاریخ میں اپنا نام سنہرے حروف میں لکھوا دیا ہے۔ وزیراعظم نے ترک ہیلی کاپٹر پر تجرباتی پرواز کی اور ترکی کی دفاعی پیداواری صنعت کی کارکردگی کی تعریف کرتے ہوئے کہا کہ ترکی کی دفاعی پیداوار کی صنعت کا شمار دنیا کی بہترین صنعتوں میں ہوتا ہے جس کا کوئی مقابل نہیں ہے۔ دفاعی میدان میں کامیابیوں پر رجب طیب اردوان حکومت مباکباد کی مستحق ہے۔وزیراعظم کا کہنا تھا کہ ٹی 129 ہیلی کاپٹر کی خریداری کے حوالے سے ترک حکام سے بات چیت جاری ہے اور پاک فوج بھی ہیلی کاپٹر کی خریداری کا جائزہ لے رہی ہے۔ ترک ایوی ایشن حکام نے وزیر اعظم شاہد خاقان عباسی کو ٹی 129 ہیلی کاپٹر کی فنی خصوصیات اور جدید ٹیکنالوجی سے متعلق بریفنگ دی۔ترک حکام کا کہنا تھا کہ ٹی 129 کم وزن کا جنگی ہیلی کاپٹر ہے جو میزائل اور گنز سے لیس ہے۔واضح رہے کہ اس سے قبل بھی وزیراعظم شاہد خاقان عباسی نے ایف 16 جنگی طیارے میں فائٹرپائلٹ کی پچھلی نشست رئیرکاک پٹ میں بیٹھ کر فوجی مشقوں کا جائزہ لیا تھا اور وہ ملکی تاریخ کے پہلے وزیراعظم بن گئے جنہوں نے جہاز میں بیٹھ کر فوجی مشق میں شرکت کی۔

لاہور (ویب ڈیسک)صدر ممنون حسین نے اپنے پیغام میں کہا ہے کہ شہید کربلا حضرت امام حسین رضی اللہ تعالی عنہ، ان کے خانوادے اور رفقا کی عظیم قربانی کی یاد مناتے ہوئے اس کے مقاصد اور حکمت عملی کو پیش نظر رکھنا چاہیےکیونکہ اس میں عالم انسانیت اور بالخصوص ہمارے گو ناں گوں مسائل کا حل مضمر ہے۔صدر مملکت نے کہا کہ خانوادہ رسول صلی اللہ علیہ والہ وسلم کی عظیم جدوجہد ہمیں یاد دلاتی ہے کہ انسان کی ذات اور اس کے مفادات پر اجتماعی مقاصد اور معاشرے کی تخلیق و پاکیزگی فوقیت رکھتی ہے جس پر کسی صورت کوئی مفاہمت نہیں ہو سکتی۔صدر ممنون حسین نے کہا کہ سانحہ کربلا کا سبق ہے کہ معاشرے اور ریاست کے معاملات چند افراد کی خواہشات کے تابع نہیں کیے جا سکتے، شہادت امام حسین کی عظیم قربانی سے ہمیں زندگی کے ہر شعبے میں رہنمائی ملتی ہے۔دوسری جانب وزیراعظم شاہد خاقان عباسی اپنے پیغام میں کہا کہ نواسہ رسولﷺنے حق و باطل کی لڑائی میں جانوں کا نذرانہ دے کر حق کو حقیقی فتح سے سرفراز کیا۔ وزیراعظم نے کہا کہ یوم عاشور ہر سال اسلامی تاریخ کے لا زوال واقعے کی یاد دلاتا ہے، کربلا کے میدان میں شہیدوں کے لہو نے ثابت کر دیا کہ حق لازوال اور باطل مٹنے کے لیے ہے۔وزیراعظم نے اپنے پیغام میں کہا کہ حضرت امام حسین نے صبر اور بہادری کے ساتھ حق حریت کی حفاظت کا پیغام دیا، نواسہ رسول کا پیغام پوری انسانیت کے لیے مشعل راہ ہے۔وزیراعظم نے کہا کہ موجودہ دور میں وطن عزیز اور قوم کو درپیش اندرونی و بیرونی خطرات کے پیش نظر مسلکی اور لسانی اختلافات کو بھلا کر اپنے اندر ایثار و قربانی ، مساوات ، رواداری اور اتحاد کو فروغ دینا ہوگا۔