Tag Archives: sialvi

گوجرانوالہ کے بعد لاہور۔۔۔حکمران حواس باختہ،پیر سیالوی نے بڑا اعلان کر دیا

ڈیرہ غازی خان (نیااخبار رپورٹ) پیر آف سیال شریف پیر حمیدالدین سیالوی نے کہا کہ وفاقی و صوبائی وزراءجو کہ قادیانیوں کی تمام تقریبات‘ پروگراموں میں شریک ہو کر قادیانیوں کو مسلمان کہہ کر پاکستان کے آئین اور قانون کی نہ صرف خلاف ورزی کرتے ہیں بلکہ مسلمانوں کے جذبات کو مجروح کرنے کے باعث ہیں‘ ختم نبوت قانون میں ترمیم کرنے والے تمام کردارجب تک بے نقاب نہیں کئے جاتے اور ان کے خلاف کارروائی نہیں کی جاتی اس وقت تک ہماری جدوجہد جاری رہے گی۔ حکمران انتشار کے خواہشمند ہیں۔ چند روز انتظار کریں‘ حکومت کو لگ پتہ جائے گا۔ ان خیالات کا اظہار پیر حمیدالدین سیالوی نے تونسہ شریف میں پیر خواجہ عطاءاللہ تونسوی کے ساتھ ملاقات کے موقع پر کیا۔ پیر آف سیال شریف کا کہنا تھا کہ حکمرانوں نے ایک شخص کیلئے پورے ملک کو داﺅ پر لگا دیا۔ گوجرانوالہ کا جلسہ حکمرانوں کی آنکھیں کھولنے کیلئے کافی ہو گا۔ شہبازشریف اپنے وعدے سے مکر گئے ہیں۔ حکمران جماعت کے دو ارکان قومی اسمبلی سے ایک روز میں ملاقات ہو گی جنہوں نے ختم نبوت پر اپنی سیٹ کو قربان کرنے کا فیصلہ کیا ہے۔ اس موقع پر صدر مشائخ عظام پاکستان و سابق وفاقی وزیر پیر خواجہ عطاءاللہ تونسوی کا کہنا تھا کہ کلمہ کے نام پر بننے والی ریاست میں ختم نبوت کے قانون میں ترمیم کا سوچنے والے حواس باختہ ہو چکے ہیں۔ حکمران ختم نبوت کے مسئلے پر سیاست نہ کریں۔ ختم نبوت کے قانون میں چھیڑچھاڑ کرنے والے تمام لوگ نہ صرف ریاست کے دشمن اور مخالف ہیں بلکہ ان لوگوں نے اپنی قبر و حشر بھی خراب کر دی۔ گوجرانوالہ جلسے کے بعد لاہور جلسے میں شرکت کروں گا جس کے بعد آگے کا لائحہ عمل دیں گے۔