اسلام آباد(آئی این پی‘ مانیٹرنگ ڈیسک) وزیراعظم عمران خان نے کہا ہے کہ میرا مشن کفایت شعاری اور پاکستان کی مالی خود انحصاری ہے ، اتحادیوں کےساتھ مل کر ملک کو تمام بحرانوں سے نکالیں گے ۔ ان خیالات کا اظہار انہوں نے ہفتہ کو اتحادی جماعتوں کے سربراہان سے ملاقات کے دوران کیا۔ ملاقات میں وزیراعظم کا آئندہ کی سیاسی حکمت عملی اور حکومتی ترجیحات پر تبادلہ خیال ہوا۔ اس موقع پر عمران خان نے کہا کہ قوم کو اپنے پاﺅں پر کھڑا کرنے کا مشن لے کر آیا ہوں ، میرا مشن کفایت شعاری اور پاکستان کی مالی خودانحصاری ہے ، قوموں کا وقار مالی خود انحصاری پر منحصر ہے ، دوسروں پر انحصار کرنے والی قومیں ترقی سے دور رہتی ہیں ۔وزیراعظم نے کہا کہ اتحادیوں کے ساتھ مل کر ملک کو تمام بحرانوں سے نکالیں گے ۔پاکستان تحریک انصاف نے صدارتی انتخاب میں بھرپور مقابلہ کرنے کا فیصلہ کر لیا ، سینئر قیادت انتخاب سے پہلے دیگر جماعتوں سے رابطے کرے گی اور صدارتی انتخاب میں حمایت مانگے گی ۔ تفصیلات کے مطابق وزیراعظم عمران خان کی زیر صدارت پارٹی اجلاس ہوا۔ اجلاس میں تحریک انصاف نے صدارتی انتخاب میں بھرپور مقابلہ کرنے کا فیصلہ کیا ۔ پی ٹی آئی اتحادیوں سے صدارتی انتخاب میں حمایت مانگے گی ۔ وزیراعظم نے اتحادی جماعتوں سے فوری رابطوں کی ہدایت کردی۔ وزیر اعظم عمران خان کو اعظم سواتی نے چند اعلی شخصیات کی کرپشن کے ثبوت فراہم کر تے ہوئے نادرا کے چیئرمین عثمان مبین، ذوالفقار اور احمرین کی معطلی کی درخواست کردی ہے اور کہاہے کہ ان حضرات کی موجودگی میں شفاف تحقیقات ممکن نہیں۔ ہفتہ کو وزیر اعظم عمران خان سے سینیٹر اعظم خان سواتی نے ملاقات کی جس میں وزیر اعظم کو وزارت سائنس و ٹیکنالوجی سے متعلق بریفنگ دی گئی ۔ سینیٹر اعظم خان سواتی کی وزیراعظم پاکستان سے ون ٹو ون ملاقات دورانیہ ایک گھنٹہ رہا۔اعظم خان سواتی نے وزیراعظم پاکستان کو وزارت سائنس و ٹیکنالوجی سے متعلق بریفنگ دی۔وزارت سائنس اور ٹیکنالوجی میں اعلیٰ پیمانے پر بدعنوانی اور قانون کی خلاف ورزیوں سے وزیراعظم کو آگاہ کیا گیا۔سینکڑوں لوگوں کی سیاسی بنیادوں پر بھرتیوں کے بارے میں بھی وزیراعظم پاکستان کو بتایا گیا۔ملاقات کے دوران سینیٹر اعظم سواتی نے وزیراعظم پاکستان کو چند اعلی شخصیات کی کرپشن کے ثبوت بھی فراہم کیے۔وزیراعظم پاکستان کو آر ٹی ایس سے متعلق تفصیلی رپورٹ بھی پیش کی گئی۔وزیر اعظم پاکستان کی جانب سے مکمل تعاون کی یقین دہانی کرائی گئی ۔رپورٹ کی اشاعت سے پہلے وزیراعظم پاکستان نے اعظم سواتی کو فورنزک ماہرین سے رائے لینے کا کا مشورہ دیا۔ اعظم سواتی نے نادرا کے چیئرمین عثمان مبین، ذوالفقار اور احمرین کی معطلی کی درخواست کرتے ہوئے کہا کہ ان حضرات کی موجودگی میں شفاف تحقیقات ممکن نہیں۔وزیراعظم عمران خان نے پنجاب کابینہ سے متعلق حتمی مشاورت کےلئے وزیراعلیٰ پنجاب سردار عثمان بزدار کو (آج) اتوار کواسلام آباد طلب کرلیا ۔ذرائع کے مطابق اتوار کو ہونے والی ملاقات میں عمران خان ،نامزد گورنر پنجاب اور وزیراعلیٰ پنجاب موجود ہوں گے ۔ذرائع کے مطابق اس موقع پر پنجاب کابینہ میں وزراءکے ناموں اور محکموں کو حتمی شکل دی جائے گی ¾اسی روز پی ٹی آئی پنجاب اسمبلی کے ارکان بھی عمران خان سے وزیراعظم ہاﺅس میں ملاقات کریں گے ۔ذرائع نے یاکہ پنجاب کی کابینہ کیے لیے سینئر رہنماﺅں اور تجربہ کار افراد کو ترجیح دی جائے گی۔عمران خان پہلے مرحلے میں پنجاب کابینہ مختصررکھنا چاہتے ہیں جس کا حتمی اعلان اتوارکی شام ہی متوقع ہے۔فاٹا کے تین آزاد سنیٹرز کی وزیراعظم عمران خان سے ملاقات ، سنیٹر اورنگزیب خان، سجاد طوری ، مومن آفریدی نے ملاقات کے دوران باقاعدہ طور پر تحریک انصاف میں شمولیت اختیار کرلی، سابق رکن قومی اسمبلی ناصر خان اور مرزا محمد ایوب بھی تحریک انصاف میں شامل ہوگئے، پنجاب کی نئی صوبائی کابینہ (کل)پیر کی شام لاہور میں گورنر ہاو¿س میں حلف اٹھائے گی،وزیراعلیٰ سردار عثمان بزدار اور معاشرے کے مختلف طبقات سے تعلق رکھنے والی ممتاز شخصیات تقریب میں شرکت کریں گی۔ پنجاب کے قائم مقام گورنر چوہدری پرویز الٰہی نئی کابینہ کے ارکان سے حلف لیں گے۔گذشتہ روز عمران خان سے وزیر اعلیٰ پنجاب عثمان بزدار کی ملاقات ہوئی تھی، ملاقات میں عمران خان نے پنجاب پولیس کلچر کو تبدیل کرنے اور کفایت شعاری اپنانے پر زور دیا. اس موقع پر وزیراعلیٰ پنجاب نے عمران خان کے اعتماد پر ان کا شکریہ ادا کیا تھا۔ملاقات میں پنجاب میں حکومت سازی پر مشاورت مکمل کی گئی تھی، ذرائع کے مطابق عبدالعلیم خان اور محمود الرشید میں سے ایک کو سینئر وزیر بنایا جائے گا جبکہ عبدالعلیم خان، محمود الرشید، میاں اسلم اقبال، یاسمین راشد کے وزیر بننے کا امکان ہے۔ڈاکٹر مراد راس، جہانزیب، اجمل چیمہ، فیصل جبوانہ، تیمور بھٹی، حافظ عمار یاسر، راجہ یاسر ہمایوں کو بھی وزیر بنائے جانے کا امکان ہے،ٹوبہ ٹیک سنگھ سے آشفہ ریاض، رحیم یار خان سے ہاشم جواں بخت کے نام فائنل کرلیے گئے جبکہ راولپنڈی سے راجہ بشارت، ڈی جی خان سے محسن لغاری کو وزیر بنائے جانے کا امکان ہے، فیاض الحسن چوہان کو وزیر اطلاعات بنایا جاسکتا ہے۔عارف علوی کو صدر منتخب کرانے کیلئے پلاننگ، وزیراعظم عمران خان کی زیرصدارت پی ٹی آئی رہنماں کی بیٹھک، کپتان کو اتحادیوں کی حمایت اور آزاد ارکان سے رابطوں پر بریفنگ دی گئی۔ اسلام آباد میں وزیراعظم عمران خان کی سربراہی میں جاری پاکستان تحریک انصاف کی سینئر قیادت کا اجلاس ختم ہو گیا۔ اجلاس میں صدارتی انتخاب کے حوالے سے مشاورت کی گئی اور صدارتی انتخاب سے متعلق اب تک کی صورتحال پر عمران خان کو بریفنگ دی گی، اتحادیوں کی حمایت اور رویے سے بھی وزیراعظم کو آگاہ کیا گیا اور آزاد اراکین سے رابطوں کا بھی بتایا گیا۔ اس کے علاوہ اجلاس میں وزیراعظم عمران خان نے سینئر رہنماں کی مشاورت سے ڈاکٹر امیر محمد خان جوگیزئی کو گورنر بلوچستان نامزد کیا۔
