لاہور (ویب ڈیسک )پاکستان تحریکِ انصاف نے آزاد امیدواروں کی شمولیت کے حوالے سے میدان مار لیا، 23 ارکان پنجاب اسمبلی پی ٹی آئی میں شامل ہو گئے، جس کے بعد پنجاب میں تحریکِ انصاف کی مسلم لیگ ق کی حمایت سے تعداد 154 پر پہنچ گئی۔ پنجاب میںانتخابات جیتنے والے 30 آزاد ارکان میں سے اب تک 23 تحریکِ انصاف کے کھلاڑی بن چکے ہیں، ان میں سے ایک آزاد رکن مسلم لیگ (ق) میں شامل جبکہ 6 نے ابھی تک کوئی فیصلہ نہیں کیا،چودھری نثار علی خان، غلام رسول سانگھا اور محمد معاویہ کی ابھی آزاد حیثیت برقرار ہے جبکہ سیدہ میمنت محسن، مخدوم ہاشمی اور احمد علی اولکھ بھی ابھی کسی فیصلے پر نہ پہنچ سکے ہیں۔پی ٹی آئی کے ذرائع کے مطابق پاکستان تحریکِ انصاف میں شامل ہونے والے امیدواروں میں فیصل آباد کے حلقہ این اے 101 سے رکن قومی اسمبلی عاصم نذیر، ڈیرہ غازی خان میں کھوسہ فیملی کو شکست سے دوچار کرنے والے آزاد رکن قومی اسمبلی امجد کھوسہ اور ایم پی اے محسن عطا کھوسہ، چنیوٹ کے حلقہ پی پی 93 سے تیمور لالی، پی پی 124 جھنگ سے تیمور خان اور پی پی 277 سے علمدار قریشی جبکہ مظفر گڑھ سے سردار خرم خان لغاری اور جھنگ سے مہر اسلم بھروانہ شامل ہیں۔ پنجاب اسمبلی میں23 آزاد ارکان اسمبلی کی حمایت حاصل ہوگئی، جبکہ6 آزاد ارکان قومی اسمبلی کی حمایت حاصل ہوگئی،پنجاب میں حکومت سازی کیلیے پی ٹی آئی مطلوبہ تعداد سے بہت آگے نکل گئی ہے،تحریک انصاف کوپنجاب اسمبلی میں154 ارکان کی حمایت حاصل ہو گئی ہے،ذرائع کا مزید کہنا تھا کہمرکز میں حکومت بنانے کے لیے بھی پوزیشن مضبوط اور مستحکم ہے،ایم کیو ایم سے بات آگے بڑھانے کیلیے کمیٹی کو اختیارات دے دیے، پنجاب اور پختونخوا کے وزرائےاعلیٰ کے ناموں پر اتفاق تا حال نہیں ہوا۔

اسلام آباد (ویب ڈیسک)تحریک انصاف کے رہنما نعیم الحق نے کہا ہے کہ مرکز کے علاوہ کے پی کے اور پنجاب میں تحریک انصاف کی حکومتیں بن رہی ہیں۔عوام ایک سنہری دور کیلئے تیار ہو جائیں، ملکی معیشت کو مسائل سے نکالنے کے لئے کوششیں شروع کردی ہیں۔نعیم الحق نے کہا ہے کہ یہ بات یقینی ہو گئی ہے کہ مرکز کے علاوہ کے پی کے اور پنجاب میں بھی ہماری حکومتوںبن رہی ہیں۔ بلوچستان میں ہم مخلوط حکومت بنائیں گے۔ عمران خان نے حکومت بنانے کے حوالے سے بہت سی ملاقاتیں کی ہیں۔ عمران خان کی خواہش ہے کہ حکومت بنتے ہیں عوام کی تکالیف میں کمی لائی جائے۔ اس لئے ہم حکومت بناتے ہیں انقلابی اقدامات اٹھا کر عوام کی تکالیف کا ازالہ کریں گے۔ پاکستان کی معیشت کو شدید مسائل کا سامناہے جس کے لئے اسد عمر تیاری کررہے ہیں اور ہم پاکستان کی معیشت کو بحران سے نکالیں گے۔ میں پاکستان کے عوام کوخوشخبری سنانا چاہتا ہوں کہ اب پاکستان کے وسائل ان کی بہتری کے لئے استعمال ہونگے۔ 80لاکھ اوور سیز پاکستانی پاکستان میں خوشحالی کے لئے منصوبے بنا رہے ہیں اور دنیا بھر سے پاکستان میں سرمایہ کار ی کے لئے پیغامات آرہے ہیں۔ یہ سنہری دور 14کے بعد سے شروع ہوجائے گا۔ عمران خان سمجھتے ہیں کہ پاکستان کے عوام کو 70سال سے ان کا حق نہیں دیا جارہا۔ اب ہم ان کو حق دینے کے لئے انقلابی اقدامات کریں گے۔ عمران خان کو غیرملکی سربراہان کے پیغامات آرہے ہیں۔ہم حکومت بناتے ہی ایک کروڑ نوکریوں کی فراہمی یقینی بنائیں گے۔عمران خان وزارتوں کے حوالے سے دو دن میں اعلان کردیں گے۔

راولپنڈی(ویب ڈیسک) ڈی جی آئی ایس پی آر کا کہنا ہے کہ کور کمانڈرز کانفرنس میں الیکشن کمیشن کی معاونت پر آرمی الیکشن سپورٹ سینٹر کو سراہا گیا۔پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کی زیر صدارت کور کمانڈرز کانفرنس ہوئی جس میں خطے، ملک کی اندرونی اور بیرونی سلامتی کی صورتحال پر تبادلہ خیال کیا گیا۔ آئی ایس پی آر کا کہنا ہے کہ کور کمانڈرز کانفرنس میں الیکشن کمیشن کی مدد پر آرمی الیکشن سپورٹ سینٹر اور فیلڈ فارمیشنز کو سراہا گیا۔آئی ایس پی آر نے بتایا کہ انتخابی عمل کے دوران شہید و زخمی ہونے والوں کو خراج تحسین پیش کیا گیا اور انتخابی عمل میں شرکت اور مسلح افواج کی سپورٹ پر پاکستان کی بہادر عوام کا شکریہ بھی ادا کیا گیا۔آئی ایس پی آر کے مطابق آرمی چیف نے دہشت گردی اور انتہاپسندی کے خلاف جنگ کے لیے کوششیں جاری رکھنے کی ہدایت کی اور کانفرنس میں افغانستان کے ساتھ فوجی تعلقات پر اطمینان کا اظہار بھی کیا گیا۔

کراچی (ویب ڈیسک) 25 جولائی کو عام انتخابات ہوئے جس میں تحریک انصاف وفاق میں سب سے زیادہ سیٹیں لینے والی جماعت بن کر سامنے آئی اور اب حکومت بنانے کیلئے جوڑ توڑ میں مصروف ہے۔تحریک انصاف نے ”تبدیلی“ اور ”نیا پاکستان“ جیسے نعرے لگائے اور عوام کو امید دلائی کہ وہ پاکستان کو کرپشن سے پاک کریں گے اور خوشحال اور ترقی یافتہ ملک بنائیں گے۔ پی ٹی آئی اپنے وعدے کس حد تک پورے کرتی ہے اور کتنی تبدیلی لاتی ہے؟ یہ تو وقت ہی بتائے گا مگر ایک پی ٹی آئی کے مداح نے ”تبدیلی کیک“ متعارف کرا دیا ہے اور اس پر عمران خان کا اس قدر خوبصورت کارٹون بنایا کہ گاہکوں کی لائن لگ گئی ہے۔کیک پر سفید شلوار قمیص میں ملبوس عمران خان کو پوڈیم پر کھڑے دکھایا گیا ہے جنہوں نے اپنا ہاتھ دل پر رکھا ہے اور پیروں میں پشاور چپل بھی پہن رکھی ہے اور یقین کریں کہ ان کا کارٹون بھی دیکھنے میں خاصا ”ڈیشنگ“ لگ رہا ہے۔یہ کیک ایک سال قبل کراچی کی ایک بیکری نے بنایا تھا جو تحریک انصاف کی فتح کے بعد ایک مرتبہ پھر مقبول ہو گیا ہے اور اس کی تصاویر سوشل میڈیا پر خاصی مقبول ہو رہی ہیں۔