کراچی(ویب ڈیسک)کپتان قومی کرکٹ ٹیم سرفراز احمد کا کہنا ہے کہ کپتانی کے حوالے سے میرے فیصلے کی اہمیت نہیں تاہم اس حوالے سے فیصلہ پی سی بی کرے گا۔کراچی میں پریس کانفرنس کے دوران قومی کرکٹ ٹیم کے کپتان سرفراز احمد کا کہنا تھا کہ ویسٹ انڈیز کے خلاف میچ نے ہماری ورلڈکپ کمپین پر اثر ڈالا، رن ریٹ کی وجہ سے سیمی فائنل میں رسائی نہ پا سکے۔ ان کا کہنا تھا کہ بھارت کے خلاف اچھا نہ کھیلے اور شکست پر افسوس ہوا، بھارت کے میچ کے بعد بہت سخت صورتحال تھی تاہم پورے ٹورنامنٹ میں ہیڈ کوچ اور چیف سلیکٹر کی پوری سپورٹ رہی۔سرفراز احمد نے کہا کہ پہلے پانچ میچز میں کارکردگی اچھی نہ رہی تاہم آخری 4 میچز میں کارکردگی اچھی تھی، ٹیم میں گروپ بندی کی بات درست نہیں، اپنے لڑکوں سے کارکردگی پر بات کی، بلا جواز تنقید درست نہیں، جب برا کھیلتے ہیں تو تنقید ہی ہوتی ہے۔کپتان قومی ٹیم نے کہا کہ اپنے نمبر پر بیٹنگ کروں تو اچھی پرفارمنس دیتا ہوں، اپنی ٹیم پر اعتماد تھا، بطور ٹیم ہم نے فائٹ کی جب کہ کپتانی کے حوالے سے میرے فیصلے کی اہمیت نہیں، فیصلہ پی سی بی کرے گا جب کہ شعیب ملک کو آخری میچ میں موقع دینے کی خواہش دی تھی مگر ایسا نہ ہو سکا۔سرفراز احمد کا کہنا تھا کہ مستقبل میں اہلیت کی بنیاد پر کھلاڑی ٹیم میں جگہ بنائیں گے، ڈومیسٹک کرکٹ کے حوالے سے بورڈ فیصلے کررہا ہے، 4 روزہ کرکٹ کو تقویت دینا ہوگی جب کہ عابد علی، آصف علی، احمد شہزاد اور عمر اکمل کی ٹیم میں جگہ بن سکتی ہے۔

دبئی(ویب ڈیسک) انٹرنیشنل کرکٹ کونسل (آئی سی سی) کی ایک روزہ میچوں کی نئی رینکنگ میں انگلینڈ کی ٹیم بازی لے گئی جبکہ پاکستانی ٹیم چھٹے نمبر پرآ گئی۔ایک روزہ میچوں کی نئی رینکنگ میں بھارت دوسرے نمبر پر اپنی جگہ بنانے میں کامیاب ہو گیا، آسٹریلیا تیسرے اور نیوزی لینڈ کی ٹیم چوتھے نمبر پر پہنچ گئی۔بلے بازی کی رینکنگ میں پاکستانی کھلاڑی بابر اعظم اپنی جگہ بنانے میں کامیاب ہو گئے اور رینکنگ میں تیسرے نمبر پر پہنچ گئے۔ بھارتی کرکٹ ٹیم کے کپتان ویرات کوہلی پہلے اور روہت شرما دوسرے نمبر پر آئے ہیں۔ امام الحق نے رینکنگ میں گیارہویں پوزیشن حاصل کی ہے۔آئی سی سی کے ٹاپ ٹین باﺅلر رینکنگ میں کوئی بھی پاکستانی کھلاڑی اپنی جگہ نہیں بنا سکا تاہم محمد عامر بارہویں پوزیشن پر پہنچ گئے۔نوجوان پاکستانی فاسٹ باو¿لر شاہین شاہ آفریدی ورلڈ کپ میں شاندار کارکردگی کے بعد 23 ویں نمبر پر آ گئے ہیں۔ یہاں بھی بھارتی باو¿لر جسپریت بمرا پہلی، کیوی باﺅلر ٹرینٹ بولٹ دوسری اور آسٹریلوی باو¿لر پیٹ کومنز تیسرے نمبر پر موجود ہیں۔آل راﺅنڈرز رینکنگ میں پاکستان کے عماد وسیم چوتھے نمبر پر اپنی جگہ بنانے میں کامیاب ہو گئے جبکہ محمد حفیظ نے رینکنگ میں 10 ویں پوزیشن حاصل کی ہے۔ یہاں بنگلہ دیشی آل راو¿نڈر شکیب الحسن پہلے، انگلینڈ کے بین سٹوکس دوسرے، افغانستان کے محمد نبی تیسرے نمبر پر موجود ہیں۔

کراچی(ویب ڈیسک) ورلڈکپ میں شکست پر بڑے بڑے برج الٹنے کا امکان روشن ہوگیا جب کہ سلیکشن کمیٹی اور کوچز کو گھر جانا پڑے گا۔انگلینڈ میں منعقدہ میگا ایونٹ میں پاکستانی ٹیم فائنل فور میں بھی جگہ نہ بنا سکی، غیرمعیاری کارکردگی کے بعد قومی کرکٹ میں بڑے پیمانے پر تبدیلیوں کا فیصلہ کر لیا گیا، یہ بات تو یقینی ہے کہ انضمام الحق کی زیرسربراہی سلیکشن کمیٹی اب برقرار نہیں رہے گی۔بورڈ کی جانب سے جلد ان کی ”خدمات“ کو خراج تحسین ادا کرنے کی پریس ریلیز سامنے آ سکتی ہے،ان کی جگہ سنبھالنے کیلیے بعض سابق کرکٹرز کے نام زیرغور ہیں البتہ ابھی کسی کو فائنل نہیں کیا گیا، انضمام سے موجودہ بورڈ حکام خوش نہیں اور ورلڈکپ سے قبل ہی انھیں بتا دیا گیا تھا کہ نتائج کچھ بھی ہوں معاہدے میں توسیع نہیں کی جائے گی۔ہیڈ کوچ مکی آرتھر اور ان کی ٹیم کے بھی برقرار رہنے کا امکان کم ہے،ابھی پی سی بی نے یہ فیصلہ نہیں کیا کہ نیا کوچ ملکی ہو یا غیر ملکی، چیئرمین پی سی بی احسان مانی کی لندن میں مکی آرتھر سے ملاقات ہوگی جس میں ان کے مستقبل پر بات ہونی ہے، ون ڈے اور ٹیسٹ میں ٹیم کی کارکردگی کو دیکھتے ہوئے بورڈ تبدیلی چاہتا ہے۔اسی طرح کپتان سرفراز احمد کا مستقبل بھی غیریقینی کا شکار ہے،البتہ مناسب متبادل موجود نہ ہونے کی وجہ سے شاید ان کے حوالے سے فیصلے میں تاخیر ہو جائے،ذرائع نے بتایا کہ مکی آرتھر اور سرفراز دونوں کی خواہش ہے کہ بدستور فرائض نبھاتے رہیں مگر بورڈ نے کسی قسم کی یقین دہانی کرانے سے گریز کیا ہے۔انگلینڈ میں آئی سی سی میٹنگز سے فراغت کے بعد ایم ڈی وسیم خان کرکٹ کمیٹی کے اجلاس میں اس حوالے سے تبادلہ خیال کرینگے، فی الحال آئندہ کچھ ماہ پاکستانی ٹیم کی بھی کوئی مصروفیت نہیں لہذا بورڈ جلد بازی میںکوئی فیصلہ نہیں کرنا چاہتا۔