اسلام آباد (ویب ڈیسک)وزیراعظم عمران خان کی سابق اہلیہ ریحام خان نے نواز شریف کی بیرون ملک روانگی پر اپنے ردعمل میں کہا ہے کہ شریف فیملی نے تو بہت کچھ برداشت کیا ہے جب کہ سربراہ تحریک انصاف ایک دن بھی جیل میں نہیں گزار سکتے۔ایک ویڈیو بیان میں ریحام خان نے تحریک انصاف کے کارکنوں کو مخاطب کرتے ہوئے کہا کہ جیل میں موجود نواز شریف کی صاحبزادی مریم نواز کی ڈائیٹ کولڈ ڈرنک(شوگر فری مشروب) بند کر دی گئی جب کہ اگر ایک دن کے لیے جیل میں آپ کے لیڈر کی کوک [کوک، پیپسی اور سیون اپ] بند کردی گئی تو بہت مشکل ہوجائے گی۔ان کا کہنا تھا کہ کل کو اگر آپ کو ایک دن بھی جیل میں گزارنا پڑجائے تو وہاں کوئی کوک، پیپیسی اور سیون اپ نہیں ملے گی۔ریحام خان کے مطابق سب کچھ پچھلے دور حکومت کی طرح ہورہا ہے،آپ کے خلاف بھی دھرنا دیا گیا،مولانا فضل الرحمان بھی شٹر ڈاو¿ن اور لاک ڈاﺅن کی باتیں کررہے ہیں یہ باتیں ہم نے 2014 میں سنی تھیں جب 126 دن دھرنے میں لگائے گئے لیکن کچھ نہیں ہوا۔حکومتی اتحادیوں کے حوالے سے گفتگو کرتے ہوئے ان کا کہنا تھا کہ سارے ایک پیج پر آگئے ہیں، پرویز الہٰی بھی آپ کے خلاف بول رہے ہیں، وزیر ریلوے کا بھی یہی رویہ ہے، یہ ردعمل ہے جو آپ نے دیگر لوگوں کے ساتھ کیا تھا اب آپ نے جن تھوڑے لوگوں کے ساتھ مل کر قومی اسمبلی میں اکثریت بنائی ہوئی ہے وہ ابھی سے آپ کو آنکھیں دکھا رہے ہیں۔ انہوں نے پاکستان تحریک انصاف کے کارکنوں پر طنز کرتے ہوئے کہا کہ بڑی باتیں کی جارہی تھیں کہ 7 ارب وغیرہ نکالیں گے لیکن اس کی بجائے نواز شریف نے انڈیمنٹی بانڈ کی شرط مسترد کردی اور شہباز شریف کی زبان کے بانڈ پر انہیں بیرون ملک جانے کی اجازت مل گئی۔
