اسلام آباد (خبرنگار خصوصی) قومی احتساب بیورو (نیب) کے چیئرمین جسٹس (ر) جاوید اقبال نے ایک بار پھر واضح کیا ہے کہ نیب کی نہ کسی سے دشمنی ہے نہ کسی سے دوستی اس لیے کسی بھی قسم کا کوئی کمپرومائز نہیں ہوگا،کوئی ڈیل ہوگی نہ ڈھیل، نہ این آر او دیا جائے گا،حکومتیں آتی جاتی رہتی ہیں ، پاکستان تاقیامت سلامت رہے گا ، نیب پر بی آر ٹی کے حوالے سے بہت تنقید کی جاتی ہے ، کیس میں سپریم کورٹ نے اسٹے آرڈر جاری کیا ہوا ہے ،ہماری کوشش ہے اسٹے آرڈر واپس لیا جائے، ہمیں قانون و آئین کے مطابق اپنا کام کرنا ہے، وائٹ کالر کرائم اور عام کیس میں زمین آسمان کا فرق ہے،آپ جو چاہے کہیں، کارواں نے چلنا ہے اور چلتا رہے گا۔ تقریب سے خطاب کرتے ہوئے جسٹس ریٹائرڈ جاوید اقبال نے کہاکہ انہوں نے کہا کہ نیب کا تعلق کسی حکومت نہیں صرف ریاست پاکستان اور اس کے عوام کے ساتھ ہے کیوں کہ حکومتیں آتی جاتی رہتی ہیں لیکن پاکستان تاقیامت سلامت رہے گا۔انہوں نے کہا کہ کوئی نیب سے یہ توقع نہ رکھے کہ اگر اس کا تعلق ارباب اقتدار سے ہے تو نیب اس کی طرف سے آنکھیں بند رکھے گا۔انہوںنے کہاکہ یہ بات تواتر سے کی جاتی ہے کہ شاید احتساب کے حوالے سے نیب کا جھکاو¿ ایک جانب ہے جس کی میں تردید اور نفی کرتا ہوں۔انہوں نے کہا کہ ناقدین سمیت سب کو یقین دلاتا ہوں کہ ہواو¿ں کا رخ بدل رہا ہے پہلے ہم نے ان مقدمات پر توجہ دی جو گزشتہ 20-25 سالوں سے منظر عام پر تھے تاہم ان پر کوئی کارروائی نہیں ہورہی تھی جس کے بعد اب ہم دوسرے محاذ کی جانب جارہے ہیں جہاں اس شکایت یا تنقید کا ازالہ ہوجائے گا کہ بظاہر احتساب یک طرفہ نظر آتا ہے۔انہوںنے کہاکہ یہ الزام اس لیے درست نہیں کہ کچھ گروہ 30 -35 سال برسراقتدار میں رہے جبکہ ایک گروہ کو حکومت کرتے چند ماہ ہوئے ہیں چنانچہ دیکھنا ہوگا کہ ان دونوں عرصوں کے دوران کتنی کرپشن ہوئی۔انہوں نے دعویٰ کیا کہ 2017 کے بعد سے ایسا کوئی بڑا اسکینڈل منظر عام پر نہیں آیا کہ جس پر کوئی ناقد تنقید کرسکے۔چیئرمین نیب نے کہا کہ ٹی وی شوز پر اس طرح کی باتیں کی جاتی ہیں جس کا مقصد نیب کے تشخص کو خراب کرنا ہے۔انہوں نے بتایا کہ نیب پر بی آر ٹی کے حوالے سے بہت تنقید کی جاتی ہے حالانکہ اس کیس میں سپریم کورٹ آف پاکستان نے اسٹے آرڈر جاری کیا ہوا ہے اور ہماری کوشش ہے کہ یہ اسٹے آرڈر واپس لیا جائے،دوسرا مسلم کمرشل بینک (ایم سی بی) کے حوالے بات کی جاتی ہے لیکن کوئی یہ نہیں جانتا کہ نیب اس میں کوئی کارروائی کیوں نہیں کرتا اس کی وجہ یہ ہے کہ اس کیس میں لاہور ہائی کورٹ نے اسٹے آرڈے جاری کیا ہوا ہے جس کے باعث ہم کچھ نہیں کرسکے۔چیئرمین نیب نے کہا کہ میں عمر کے حصے میں ہوں کہ دشنام تراشی، کردار کشی، الزام تراشی، لالچ اور مختلف قسم کے حربوں کا کوئی فائدہ نہیں کیوں کہ یہ خیال بھی تصور میں لانا کہ میں سمجھوتہ کروں گا ناممکن ہے۔انہوں نے نیب کی نہ کسی سے دشمنی ہے نہ کسی سے دوستی اس لیے کسی بھی قسم کا کوئی کمپرومائز نہیں ہوگا نہ ہماری طرف سے کوئی ڈیل ہوگی نہ ڈھیل دی جائے گی اور نہ این آر او ہوگا۔چیئرمین نیب نے کہا کہ ہمیں قانون و آئین کے مطابق اپنا کام کرنا ہے جبکہ جنہوں نے آج تک نیب کے قانون کو آج تک نہیں پڑھا وہ بھی نیب قانون پر تنقید کرتے ہیں۔انہوںنے کہاکہ وائٹ کالر کرائم اور عام کیس میں زمین آسمان کا فرق ہے کیوں کہ وائٹ کالر کرائم کی ابتدا مشرق سے ہوتی ہے تو انتہا مغرب میں ہوتی ہے اور کہیں کا کیس کا سراغ کہیں جا ملتا ہے۔انہوں نے کہا کہ نیب کو یہ بھی کہا جاتا ہے کہ ایک مخصوص مدت میں یہ کام مکمل کیوں نہیں ہوا جب ایسا تو اسکاٹ لینڈ یارڈ بھی نہیں کرپاتی جن کے پاس ہر طرح کے وسائل میسر ہیں کیوں کہ ان کے ہاں تحقیقات کا کوئی ٹائم فریم مقرر نہیں۔جسٹس (ر) جاوید اقبال نے کہا کہ اگر نیب کسی کو گرفتار کرتا ہے تو اسب سے پہلا یہ الزام لگ جاتا ہے کہ نیب سیاسی انتقام لے رہا ہے نیب سیاسی انتقام کیوں لے گا میرا کسی سے کوئی ذاتی جھگڑا تو نہیں ۔انہوںنے کہاکہ نیب کی کارکردگی کو ان لوگوں کی رائے کے تناظر میں نہ پرکھیں جو خود نیب کے ریڈار پر ہیں بلکہ بین الاقوامی اداروں کی رپورٹس دیکھیں جس میں نیب کی تعریف کی گئی۔انہوں نے کہا کہ بین الاقوامی اداروں نے نیب کے کنوکشن ریٹ، ریکوری، رجسٹریشن آف کیسز اور فیکٹم آف ڈیٹرنس کی تعریف کی۔انہوںنے کہاکہ فیکٹم آف ڈیٹرنس سے مراد یہ کہ نیب نے ان افراد سے بھی پوچھ گچھ کی جن سے ماضی میں کسی کی یہ پوچھنے کی جرات نہیں تھی کہ 5 ہزار روپے کی جگہ 5 کروڑ روپے کیسے خرچ ہوئے۔ایک ملک جہاں غربت ہے، قرضوں میں ڈوبا ہوا ہے اور معاشی مشکلات ہیں تو آپ چاہتے ہیں کہ 100 ارب ڈالر کا قرضہ کہاں گیا تو اگر آپ اس پوچھ گچھ کو جرم سمجھتے ہیں تو نیب کو عادی مجرم سمجھ لیں کیوں کہ یہ سلسلہ تو جاری رہے گا۔انہوں نے کہا کہ نیب نے اپنی منزل کا تعین کرلیا ہے،کرپشن فری پاکستان نیب کی منزل ہے، اس میں جتنے طوفان آئیں اور کچھ بھی کہا جائے لیکن نیب پیچھے نہیں ہوگا جو مقدمات ہیں ان کو دیکھا جائیگا۔چیئرمین نیب نے کہا کہ ہمیں اتنا بھی زیادہ خوف نہیں پھیلانا کہ مائیں اپنے بچوں کو ہمارا نام لے کرڈرائیں، نیب پرالزامات کے بجائے آپ پلین بارگین کرکے جس ملک چاہیں چلے جائیں۔ چیئرمین نیب جسٹس (ر ) جاوید اقبال نے کہا ہے کہ نیب سمجھوتہ کرے گا نہ سرنڈر ،کوئی یہ نہ سمجھے کہ حکمران جماعت بری الذمہ ہے، اب ایسے کیسز کی طرف جا رہے ہیں جن سے اس تاثر کی نفی ہوگی کہ بظاہر احتساب یک طرفہ نظر آتا ہے،ہماری طرف سے ڈیل ہوگی نہ ہی ڈھیل ہوگی اور نیب کی جانب سے کوئی این آر او نہیں ملے گا، کچھ لوگوں کو زکام بھی ہو جائے تو لندن میں علاج کراتے ہیں، ایک شخص لندن یا امریکا میں علاج کراتا ہے، باقی انسان نہیں۔
