تازہ تر ین

کراچی میں بارشوں کے حوالے سے حکمت عملی تیار کر رہے ہیں، چیئر مین این ڈی ایم اے

)ویب ڈیسک):چیئر مین این ڈی ایم اے لیفٹننٹ جنرل محمد افضل کا کہنا ہے کہ  کراچی میں اگست اور ستمبر تک بارشوں کے حوالے سے حکمت عملی تیار کر رہے ہیں۔

چیئرمین  این ڈی ایم اے کا کراچی سے متعلق پریس کانفرنس میں کہنا تھا کہ  کراچی میں ہونے والے نقصانات پر افسوس ہے۔ کراچی میں اگست اور ستمبر تک بارشوں کے حوالے سے حکمت عملی تیار کر رہے ہیں۔

چیئرمین  این ڈی ایم اے کا کہنا تھا کہ  ایف ڈبلیو او بھی کراچی پہنچ چکا ہے۔حکمت عملی بنانے کا  مقصد آنے والے سیزن میں کراچی کو ریلیف فراہم کرنا ہے۔

لیفٹننٹ جنرل محمد افضل نے کہا کہ 7 سے 10 اگست تک زیادہ بارش کا ایک نظام کراچی میں داخل ہو گا۔15 اگست کو ایک اور نظام کراچی پہنچے گا جس میں بارش کے 40 فیصد  امکانات ہیں۔

انہوں نے کہا کہ گذشتہ دنوں  کراچی میں ایک گھنٹے میں 83 ملی میٹر تک بارشیں ہوئی ہیں۔

چیئر مین این ڈی ایم اے کا کہنا تھا کہ  کراچی میں یومیہ 20 ہزار ٹن ٹھوس کچرا پیدا ہوتا ہے۔ دنیا بھر میں ٹھوس کچرا فائدہ دیتا ہے لیکن ہمارے ہاں یہ زحمت کا باعث بنتا ہے۔

لیفٹننٹ جنرل محمد افضل نے کہا کہ کراچی میں ایک مسئلہ اسٹرانگ واٹر اور سیوریج کے نظام کا علیحدہ علیحدہ نہ ہونا ہے۔ ہم اس حوالے سے مختلف محکموں کو امداد فراہم کریں گے۔ سب شراکت داروں کو بٹھا کر ایک اتفاق رائے پیدا کرنے کی ضرورت ہو گی۔

انہوں نے کہا کہ  ایف ڈبلیو او کو بڑے علاقے دیے گئے ہیں جہاں بڑے نالے ہیں۔7 سے 8 اور 15 اگست کو آنے والے موسمی نظاموں میں ہم پہلے ہونے والے نقصانات سے بچنے کی کوشش کر رہے ہیں۔

چیئر مین این ڈی ایم اے نے کہا کہ  کراچی میں مقامی کور کو ذمہ داری دی گئی ہے کہ وہ کراچی کے عوام کو ریلیف دیں۔ میری وزیر اعلیٰ سندھ سے 3 اور گورنر سندھ سے 2 ملاقاتیں ہوئی ہیں۔ہمارا مقصد آنے والی بارشوں میں پہلے ہونے والے نقصان سے بچنا ہے۔

ایک سوال کے جواب میں لیفٹننٹ جنرل محمد افضل نے کہا کہ  کورونا پر آج ہونے والی اموات کافی کم ہیں تاہم سب سے درخواست ہے کہ ایس او پیز پر عمل کریں۔ عید اور محرم الحرام میں کورونا کے حوالے سے احتیاطی تدابیر اختیار کریں۔


اہم خبریں
   پاکستان       انٹر نیشنل          کھیل         شوبز          بزنس          سائنس و ٹیکنالوجی         دلچسپ و عجیب         صحت        کالم     
Copyright © 2016 All Rights Reserved