(ویب ڈیسک)قومی ایئر لائن میں احتساب کے عمل کو جاری رکھتے ہوئے جہاں جولائی میں پائلٹس سمیت 63 ملازمین کو نکالا گیا، جب کہ حالیہ کارروائی میں جعلی ڈگری پر 28 ملازمین کو فارغ کردیا گیا ہے۔ترجمان پی آئی اے کے مطابق بغیر اطلاع چھٹی کرنے والے 27 ملازمین کو بھی نکالا گیا ہے۔ ایک اور کارروائی کے دوران مشتبہ لائسنس پر پانچ کپتانوں کو گھر بھیج دیا گیا۔
ترجمان کا مزید کہنا تھا کہ قومی ایئر لائن میں کرپشن میں ملوث ہونے پر بھی 2 ملازمین کو نکالا گیا ہے۔ نااہلی کے مظاہرے پر ایک ملازم کو نوکری سے برخاست کردیا گیا۔ صرف یہ ہی نہیں بلکہ کام سے انکار پر 4 ملازمین کی تنزلی بھی کردی گئی ہے۔ترجمان نے بتایا کہ ایس اوپیز کی خلاف ورزی کے باعث 3ملازمین کے انکریمنٹ سے بطورسزا کٹوتی کی گئی ہے۔اچھی کارکردگی کے حامل 13 ملازمین کو تعریفی اسناد جاری کی گئیں ہیں، جب کہ قومی ایئرلائن نے اچھی کارکردگی پر 2 ملازمین کو کیش ایوارڈ بھی دیا۔
