ٹی ٹوئنٹی ورلڈ کپ 2021 کے وارم اپ میچ میں ویسٹ انڈیز کی ٹیم نے پاکستان کے خلاف پہلے بیٹنگ کرتےہوئے مقررہ اوورز میں 7 وکٹوں پر 130 رنز بنا لیے۔
دبئی میں کھیلے جارہے وارم اپ میچ میں ویسٹ انڈیز نے ٹاس جیت کر پہلے خود بیٹنگ کا فیصلہ کیا تاہم اوپنر ایک اچھا آغاز کرنے میں ناکام رہے۔
حسن علی نے 12 رنز کے اسکور پر ویسٹ انڈیز کے آندرے فلیچر کو آؤٹ کیا جنہوں نے صرف 2 رنز بنائے تھے۔
ویسٹ انڈیز کے دوسرے اوپنر 30 کے مجموعے پر پویلین لوٹ گئے، انہیں شاہین شاہ آفریدی نے حارث رؤف کے ہاتھوں کیچ کروایا۔
عماد وسیم نے ویسٹ انڈیز کو تیسرا نقصان پہنچایا تو گیارھویں اوور میں اسکور 44 رنز تھا جس کے بعد حارث رؤف نے بڑی کامیابی حاصل کی۔
حارث رؤف نے ٹی ٹوئنٹی کے خطرناک بلے باز کرس گیل کی وکٹیں اڑائیں جنہوں نے 30 گیندوں پر صرف 2 چوکوں کی مدد سے 20 رنز کی ایک سست اننگز کھیلی۔
ویسٹ انڈیز کی ٹیم نے مقررہ اوورز میں 7 وکٹوں پر 130 رنز بنائے۔
کیرون پولارڈ نے آؤٹ ہوئے بغیر سب سے زیادہ 23 رنز بنائے۔
پاکستان کی جانب سے شاہین شاہ آفریدی، حسن علی اور حارث رؤف نے 2،2 وکٹیں حاصل کیں۔
