اسحاق ڈار کی امریکی نائب وزیر خزانہ سے ورچوئلی ملاقات، آئی ایم ایف مذاکرات سے آگاہ کیا

اسلام آباد: (ویب ڈیسک) وفاقی وزیر خزانہ اسحاق ڈار نے امریکا کے نائب وزیر خزانہ سے ورچوئلی ملاقات کی جس میں پاک امریکہ تعلقات کومزید مضبوط کرنے پر تبادلہ خیال کیا گیا۔
ورچوئلی ملاقات کے دوران امریکی نائب وزیر خزانہ نے اقتصادی ترقی کیلئے تعاون بڑھانے کےعزم کا اعادہ کیا، وزیرخزانہ اسحاق ڈار نے معاشی صورتحال کے حوالے سے آگاہ کرتے ہوئے کہا کہ حکومت کی معیشت کو استحکام اور ترقی کی طرف لے جانے پر پوری توجہ ہے، وزیر خزانہ نے نویں اقتصادی جائزے پرآئی ایم ایف کے ساتھ مذاکرات سے بھی آگاہ کیا۔
اسحاق ڈار نے کہا کہ بطور وزیر خزانہ ماضی میں آئی ایم ایف پروگرام کو کامیابی سے مکمل کیا، حکومت موجودہ آئی ایم ایف پروگرام کو مکمل کرنے کیلئے پرعزم ہے، اس دوران وزیر خزانہ نے تجارتی، اقتصادی تعلقات کو فروغ دینے کی خواہش کا اظہار کیا جبکہ امریکی نائب وزیر خزانہ نے پاکستان اور امریکہ کے درمیان اچھے تعلقات برقرار رکھنے پر زور دیا۔