چکوال(بیورو رپورٹ)ضلع چکوال میں ڈینگی کے بڑھتے ہوئے کیسز نے ایک مرتبہ پھر محکمہ صحت اور ضلعی انتظامیہ کی کارکردگی کو توجہ کا مرکز بنا دیا ہے۔ چکوال شہر کے ساتھ ساتھ گردونواح کے دیہی علاقوں سے بھی ڈینگی کے مریض سامنے آنے کی اطلاعات ہیں، جو اس امر کی نشاندہی کرتی ہیں کہ اس مرض کے پھیلاؤ کو روکنے کے لیے صرف شہری علاقوں تک محدود اقدامات کافی نہیں ہوں گے۔ دیہی آبادی میں بھی ڈینگی سے بچاؤ کی سرگرمیوں کو یکساں اہمیت دینا ہوگی، کیونکہ اگر بروقت احتیاطی تدابیر اختیار نہ کی گئیں تو متاثرہ علاقوں کا دائرہ مزید وسیع ہونے کا خدشہ ہے۔ ڈینگی ایک ایسا مرض ہے جس کی روک تھام میں بروقت اقدامات بنیادی اہمیت رکھتے ہیں اور معمولی غفلت بھی بعد ازاں بڑے طبی اور انتظامی مسائل کو جنم دے سکتی ہے۔اس صورتحال کا ایک اہم پہلو ڈسٹرکٹ ہیڈ کوارٹر ہسپتال چکوال کی موجودہ استعداد بھی ہے۔ ہسپتال پہلے ہی روزانہ آنے والے مریضوں کے رش اور محدود طبی سہولتوں کے باعث دباؤ کا سامنا کر رہا ہے۔ مختلف بیماریوں کے مریضوں کو طبی سہولتیں فراہم کرنے میں موجودہ وسائل استعمال ہو رہے ہیں، ایسے میں اگر ڈینگی کے مریضوں کی تعداد میں نمایاں اضافہ ہوتا ہے تو ہسپتال کے لیے اضافی بوجھ سنبھالنا مشکل ہو سکتا ہے۔ ڈینگی کے مریضوں کو بروقت تشخیص، مناسب علاج، طبی نگرانی اور ضرورت پڑنے پر داخلے کی سہولت درکار ہوتی ہے۔ اس لیے ضلعی انتظامیہ اور محکمہ صحت کو صورتحال مزید سنگین ہونے کا انتظار کرنے کے بجائے ابھی سے اضافی بستروں، ضروری ادویات، تشخیصی سہولتوں اور تربیت یافتہ طبی عملے کی دستیابی یقینی بنانے کے لیے اقدامات کرنے چاہئیں۔دوسری جانب ڈینگی کی روک تھام کے حوالے سے حکومتی سطح پر وہ سرگرمیاں نمایاں طور پر دکھائی نہیں دے رہیں جن کی موجودہ صورتحال میں ضرورت ہے۔ ماضی میں جب ڈینگی کے کیسز سامنے آنا شروع ہوئے تھے تو شہری اور دیہی علاقوں میں مچھر مار اسپرے سمیت مختلف احتیاطی سرگرمیاں باقاعدگی سے انجام دی جاتی تھیں۔ گلی محلوں، آبادیوں اور دیہات میں اسپرے کے ذریعے مچھروں کی افزائش روکنے کی کوشش کی جاتی تھی، لیکن اب ایسی سرگرمیوں میں وہ تسلسل اور فعالیت دکھائی نہیں دیتی۔ خصوصاً دیہی علاقوں میں اسپرے کا مؤثر انتظام ضروری ہے، کیونکہ وہاں پانی کے جوہڑوں، ندی نالوں، کھلے مقامات اور دیگر جگہوں پر مچھر کی افزائش کے امکانات موجود رہتے ہیں۔ ضرورت اس امر کی ہے کہ محکمہ صحت فوری طور پر متاثرہ اور حساس علاقوں کی نشاندہی کرکے باقاعدہ اسپرے مہم شروع کرے اور لاروا کی افزائش کے مقامات کو ختم کرنے کے لیے عملی اقدامات کرے۔ڈینگی کے خلاف جنگ صرف اسپرے یا سرکاری ٹیموں کی کارروائیوں سے نہیں جیتی جا سکتی بلکہ اس میں عوامی تعاون بھی بنیادی اہمیت رکھتا ہے۔ شہریوں کو اپنے گھروں، چھتوں، صحنوں اور اردگرد کے ماحول میں پانی جمع ہونے سے روکنے، پانی کی ٹینکیوں اور برتنوں کو ڈھانپنے اور صفائی کا خیال رکھنے کے حوالے سے مسلسل آگاہی فراہم کرنا ضروری ہے۔ اس سلسلے میں سوشل میڈیا، مقامی اخبارات، مساجد، تعلیمی اداروں اور دیگر ذرائع ابلاغ کو استعمال کیا جا سکتا ہے۔ تاہم چکوال میں ڈینگی سے بچاؤ کے حوالے سے سوشل میڈیا پر آگاہی مہم اس سطح پر دکھائی نہیں دیتی جس کی ضرورت ہے۔ ضلعی انتظامیہ کو چاہیے کہ ایک منظم اور مسلسل آگاہی مہم شروع کرے تاکہ شہری محض مرض میں مبتلا ہونے کے بعد علاج کی طرف متوجہ نہ ہوں بلکہ پہلے ہی احتیاطی تدابیر اختیار کریں۔یہ بھی دیکھنے میں آتا ہے کہ انسداد ڈینگی کی بعض ٹیمیں مختلف مقامات پر چھاپے مار کر لاروا کی نشاندہی کرتی ہیں اور خلاف ورزی کرنے والوں پر جرمانے عائد کرکے اپنی کارروائی مکمل کر لیتی ہیں۔ یقیناً ایسے معائنوں اور خلاف ورزیوں کے خلاف کارروائی کی اپنی اہمیت ہے، لیکن محض جرمانے عائد کرنا ڈینگی کے خاتمے کا مکمل حل نہیں ہو سکتا۔ اصل ضرورت یہ ہے کہ سرکاری ٹیمیں اپنی توجہ عملی اقدامات پر مرکوز کریں، حساس مقامات کی مسلسل نگرانی کریں، لاروا کی بروقت تلفی یقینی بنائیں اور جہاں ضرورت ہو وہاں اسپرے کا انتظام کریں۔ دیہی علاقوں میں بھی ان ٹیموں کی سرگرمیوں کو مؤثر بنایا جائے تاکہ کوئی آبادی حکومتی توجہ سے محروم نہ رہے
