All posts by admin

وزیراعظم عمران خان دورہ چین کے بعد وطن پہنچ گئے، چینی نائب وزیرخارجہ ،اعلیٰ حکام نے الوداع کیا

 

اسلام آباد: (ویب ڈیسک) وزیراعظم عمران خان دورہ چین کے بعد وطن واپس پہنچ گئے، چین کے نائب وزیرخارجہ اور اعلیٰ حکام نے انہیں الوداع کیا، چین کی تینوں مسلح افواج کے چاق و چوبند دستےنے  انہیں سلامی دی۔مشترکہ اعلامیہ کے مطابق چینی قیادت نے مسئلہ کشمیر کو تاریخ کا ادھورا چھوڑا ہوا تنازع قرار دیا اور کہا مقبوضہ وادی کی صورتحال پر گہری نظر ہے، خطے میں موجود فریقین ہاہمی تنازعات برابری کی بنیاد پر مذاکرات کے ذریعے حل کریں۔ چین نے افغان امن عمل میں پاکستان کے کردار کو سراہا، دونوں ممالک نے اتفاق کیا کہ افغانستان تنازع کا کوئی فوجی حل نہیں۔پاکستان اور چین نے دہشتگردی کے خلاف جنگ میں بین الاقوامی تعاون پر زور دیا۔ چینی قیادت نے دہشتگردی کے خلاف پاکستان کی قربانیوں کی تعریف کی اور عالمی برادری پر زور دیا کہ وہ ہشتگردی کے خلاف جنگ اور خطے کے امن کے لیے پاکستانی کوششوں کا اعتراف کرے۔

پاکستان اور چین کا باہمی مفادات پر حمایت جاری رکھنے پر اتفاق ،مشتر کہ اعلامیہ جا ری

بیجنگ: (ویب ڈیسک) مشترکہ اعلامیے میں کہا گیا ہے کہ پاک چین لازوال دوستی کا رشتہ دونوں ممالک کی عوام کے وسیع مفادات کا امین ہے۔ پاکستان اور چین نے باہمی مفادات پر حمایت جاری رکھنے پر اتفاق کیا ہے۔تفصیلات کے مطابق وزیراعظم کے دورہ چین کا مشترکہ اعلامیہ جاری کر دیا گیا ہے جس میں کہا گیا ہے کہ عمران کا نے چینی ہم منصب کی دعوت پر چین کا دورہ کیا۔ دورے کے دوران ان کی چینی صدر، وزیراعظم اور چئیرمین نیشنل پیپلز کانگرس قائمہ کمیٹی سے ملاقاتیں ہوئیں۔دورہ چین میں وزیراعظم عمران خان کی چینی سرمایہ کاروں اور کاروباری افراد سے بھی ملاقاتیں ہوئیں۔ دونوں ممالک کی قیادت کے مابین دوطرفہ تعلقات اور خطے سمیت عالمی امور پر تبادلہ خیال ہوا۔وزیراعظم عمران خان نے ہارٹیکلچر نمائش کی اختتامی تقریب میں بطور مہمان خصوصی شرکت کی۔ انہوں نے چین کی قیادت کو 70ویں سالگرہ کی بھی مبارکباد دی اور چین کی معاشی ترقی کو ترقی پذیر ممالک کے لیے رول ماڈل قرار دیا۔

شہباز شریف نے مولانا فضل الرحمان کے دھرنے میں شرکت کی مخالفت کر دی

لاہور: (ویب ڈیسک)مسلم لیگ ن کے صدر شہباز شریف نے مولانا فضل الرحمان کے دھرنے میں شرکت کی مخالفت کر دی۔مسلم لیگ ن پاکستان کے صدر شہبازشریف کی زیر صدارت ہونے والے اجلاس کی اندرونی کہانی سامنے آگئی۔ذرائع کے مطابق شہباز شریف نے پارٹی اجلاس میں مولانا فضل الرحمان کے دھرنے میں بھرپور شرکت کی مخالفت کر دی۔ شہباز شریف نے کہا کہ مولانا فضل الرحمان کے دھرنے میں شرکت کرنے کے بجائے ہمیں اپنے احتجاج کا پروگرام بنانا چاہئے۔انہوں نے کہا کہ مولانا فضل الرحمان نہایت قابل احترام ہیں تاہم موجودہ دھرنے اور احتجاج کا کریڈٹ مولانا فضل الرحمان کو جائے گا لہٰذا ہمیں اس میں شرکت نہیں کرنی چاہیے۔

سندھ حکومت نے 14 اکتوبر کو عام تعطیل کا اعلان کردیا

کراچی: (ویب ڈیسک)سندھ حکومت نے 14 اکتوبر کو شاہ عبدالطیف بھٹائی کے عرس پر عام تعطیل کا اعلان کردیا۔سندھ حکومت کی جانب سے جاری کردہ اعلامیے کے مطابق 14 اکتوبر کو شاہ لطیف بھٹائی کے عرس کے موقع پرعام تعطیل ہوگی جس کا باقاعدہ نوٹی فکیشن جاری کردیا گیا ہے۔ نوٹی فکیشن کے مطابق سندھ حکومت اور اس کے ذیلی ادارے، ضلعی انتظامیہ کے ماتحت ادارے اور سرکاری و غیر سرکاری درس گاہیں 14 اکتوبر کو بند رہیں گی۔

پیپلز پارٹی نے جے یو آئی کے آزادی مارچ کی حمایت کا اعلان کردیا،پی پی کور کمیٹی کا فیصلہ

کراچی: (ویب ڈیسک)پاکستان پیپلز پارٹی نے جے یو آئی کے آزادی مارچ کی حمایت کا اعلان کردیا اور کہا ہے کہ جس شہر سے بھی آزادی مارچ گزرے گا پیپلز پارٹی وہاں بھرپور سپورٹ کرے گی۔اس بات کا اعلان چیئرمین پیپلز پارٹی بلاول بھٹو زرداری نے پیپلز پارٹی کی کور کمیٹی کے اجلاس کے بعد پی پی پی میڈیا سیل میں پریس کانفرنس سے خطاب کرتے ہوئے کیا۔ اس موقع پر پارٹی کی مرکزی قیادت بھی ان کے ہمراہ موجو تھی۔ بلاول بھٹو زرداری کا کہنا تھا کہ پاکستان پیپلز پارٹی مولانا فضل الرحمن کے آزادی مارچ کی حمایت کا اعلان کرتی ہے جس جگہ جس شہر جس وقت آزادی مارچ ہوگا پیپلز پارٹی وہاں استقبال اور مکمل سپورٹ کرے گی۔

ٹی ٹوینٹی سیریز کے آخری میچ میں سری لنکا کی پاکستان کو شکست، سیریز اپنے نام کر لی

 

لا ہور(ویب ڈیسک)سری لنکا نے ٹی ٹوینٹی سیریز کے آخری میچ میں بھی پاکستان کو 13 رنز سے شکست دے کر دنیا کی نمبر ایک ٹی ٹوینٹی ٹیم کو سیریز میں وائٹ واش کر دیا۔پاکستانی ٹیم 148 رنز کے تعاقب میں 6وکٹوں کے نقصان پر 134 رنز ہی بنا سکی۔ پاکستان کے اوپنر بلے باز حارث سہیل 52، بابر اعظم 28، سرفراز احمد اور افتخار احمد 17 رنز بنا سکے جبکہ وہاب ریاض نے 10 رنز بنائے۔فخر زمان صفر، عماد وسیم 3 اور آصف علی صرف ایک رن ہی بنا سکے۔سری لنکا کے باو¿لر ہاسارنگا نے اچھی باو¿لنگ کا مظاہرہ کرتے ہوئے 3 ،لاہیرو کمارانے 2 کھلاڑیوں کو آوٹ کیا۔سری لنکا نے ٹاس جیت کر پہلے بلے بازی کا فیصلہ کیا اور 7 وکٹوں کے نقصان پر 147 رنز بنائے۔ سری لنکن بلے باز فرنینڈو 78، پریرا 13 اور داسن شناکا 12 رنز بناکر نمایاں رہے۔

اداکار عمران عباس ابدی زندگی پانے کے خواہشمند

اسلام آباد:  چھوٹی سکرین کے منجھے ہوئے اداکار عمران عباس نے کہا کہ وہ ابدی زندگی پانے کے خواہشمند ہیں۔ایک پروگرام میں انہوں کہا کہ جب سے ان کی بہن کی وفات ہوئی ہے ان کا زندگی سے اعتبار اٹھ گیا ہے کیونکہ انہیں لگتا ہے کہ یہ زندگی بہت مختصر ہے اس لئے ہم بے وقت اور بے معنی چیزوں میں وقت ضائع کرنے کے بجائے دوسروں کیلئے کچھ اچھا کر جائیں تو بہتر ہے۔انہوں نے کہا کہ وہ اب زندگی کے حوالے سے منصوبہ بندی نہیں کرتے، کالج کے دور میں محبت ہوئی اور اب تک کرتا ہوں، اپنے پرانے محلے میں جا کر چنے چاٹ کھا کر اب بھی بہت اچھا لگتا ہے۔

جس غلط طریقے سے یہ حکومت آئی اسی طرح سے چلی جائے گی، مریم نواز

لاہور: مسلم لیگ (ن) کی نائب صدر مریم نواز کا کہنا ہے کہ جس غلط طریقے سے یہ حکومت آئی اسی طرح سے چلی جائے گی۔لاہور میں احتساب عدالت میں پیشی کے موقع پر میڈیا سے بات کرتے ہوئے سابق وزیراعظم نواز شریف کی صاحبزادی مریم نواز نے موبائل برآمدگی کے الزام کو بے بنیاد قرار دیتے ہوئے کہا کہ جنہوں نے الزام لگایا، تردید بھی انہیں کی طرف سے آئی۔مولانا فضل الرحمان کے آزادی مارچ سے متعلق پوچھے گئے سوال پر مریم نواز کا کہنا تھا کہ  جس طرح جھوٹ کے پاوں نہیں ہوتے اسی طرح دھاندلی زدہ حکومت کے پاوں نہیں اور جس غلط طریقے سے یہ حکومت آئی اسی طرح سے چلی جائے گی۔بعد ازاں مریم نواز اور یوسف عباس کو احتساب عدالت سے واپس جیل روانہ کر دیا گیا۔

اسپرین سے پھیپھڑوں پر آلودگی کے مضر اثرات آدھے رہ جاتے ہیں

بوسٹن: اگر کسی علاقے میں آلودگی زیادہ ہو تو پورے دن میں اسپرین کی صرف ایک گولی کھانے سے اس آلودگی کے مضر اثرات کو تقریباً 50 فیصد تک کم کیا جاسکتا ہے۔کولمبیا یونیورسٹی نیویارک، ہارورڈ اسکول آف پبلک ہیلتھ، ہارورڈ ٹی ایچ چین اسکول آف پبلک ہیلتھ، بوسٹن یونیورسٹی اسکول آف میڈیسن اور کولمبیا میل مین اسکول آف پبلک ہیلتھ میں 2,280 مردوں پر کی گئی اس مشترکہ تحقیق سے معلوم ہوا ہے کہ وہ افراد جنہوں نے زیادہ فضائی آلودگی کے دوران روزانہ یا ہفتے میں ایک سے دو مرتبہ اسپرین کی صرف ایک گولی کھائی تھی، ان میں سینے پر بلغم اور سانس کی نالی میں سوزش سمیت، آلودگی کے مختلف اور ظاہری مضر اثرات میں واضح طور پر کمی آئی تھی اور ان کی شدت، اسپرین کھانے سے پہلے کے مقابلے میں 50 فیصد تک کم ہوگئی تھی۔آلودگی کے اثرات جاننے کےلیے جن افراد کی صحت سے متعلق ڈیٹا کا جائزہ لیا گیا، وہ اپنی جوانی اور ادھیڑ عمری میں محنت مزدوری کیا کرتے تھے اور ان کا کام زیادہ تر کھلی فضا میں ہوتا تھا، جبکہ ان کی اوسط عمر 73 سال تھی۔مطالعے میں جہاں یہ معلوم ہوا کہ اسپرین کھانے سے پھیپھڑوں پر فضائی آلودگی کے مضر اثرات نہ صرف 50 فیصد رہ جاتے ہیں بلکہ یہ کئی دنوں تک برقرار بھی رہتے ہیں۔ایسا کیوں ہوتا ہے؟ ماہرین اس بارے میں اب تک کچھ نہیں جان پائے ہیں۔ البتہ اس تحقیق کی طرف وہ اس لیے متوجہ ہوئے کیونکہ زیادہ آلودگی والے علاقوں میں رہنے والے کچھ لوگوں نے اسپرین کھانے کے بعد اپنا نظامِ تنفس بہتر ہونے کے بارے میں بتایا تھا۔ یہ مطالعہ اس بات کی تصدیق کررہا ہے۔ماہرین کا کہنا ہے کہ اگلے مرحلے میں وہ یہ سمجھنے کی کوشش کریں گے کہ پھیپھڑوں پر اسپرین کے مثبت اثرات کس طرح مرتب ہوتے ہیں اور یہ آلودگی سے ہونے والے نقصانات کا ازالہ کیسے کرتے ہیں۔یہ بھی واضح رہے کہ اسپرین کا تعلق دواؤں کی جس قسم سے ہے، اسے ’’اینسیڈ‘‘ (NSAID) کہا جاتا ہے۔ ماہرین کا خیال ہے کہ شاید اینسیڈ قسم کی دوسری دوائیں بھی اسپرین کی طرح آلودگی کے اثرات کم کرسکتی ہیں۔ اس کےلیے بھی وہ ایک اور مطالعے کی تیاری کررہے ہیں۔

سبز چائے سے اینٹی بایوٹکس کی تاثیر میں اضافہ

 لندن: سبز چائے کے لاتعداد فوائد میں ایک اور فائدے کا اضافہ یہ ہوا ہے کہ اس کا استعمال اینٹی بایوٹکس (ضد حیوی دواؤں) کے اثرات کو بڑھاتا ہے اور ایسے جراثیم سے لڑتا ہے جو ہر دوا کو تیزی سے ناکارہ بنا رہے ہوتے ہیں۔دنیا بھر میں انفیکشن امراض کے سامنے ہماری دوائیں تیزی سے بے اثر ہوتی جارہی ہیں جسے اینٹی بایوٹکس ریزسٹنٹس کہا جاتا ہے۔ اس کی واضح مثال پاکستان اور ہندوستان میں ٹی بی کا مرض ہے جس پر کئی طرح کی ادویہ ناکام ہوچکی ہیں اور مریض سخت تکلیف میں ہیں۔ایک حالیہ مطالعے سے علم ہوا ہے کہ سبز چائے میں موجود ایک قدرتی مرکب ایپیگیلوکیٹاکِن اینٹی بایوٹکس کی تاثیر بڑھا سکتا ہے۔ یہ تحقیق برطانیہ میں یونیورسٹی آف سرے اسکول آف ویٹرنری میڈیسن کے سائنس دانوں نے کی ہے۔ماہرین نے سبز چائے کو آزمانے کےلیے سب سے پہلے ایک خاص جرثومے کا انتخاب کیا جس کا نام ’سوڈوموناس ایئرگینوسا‘ ہے۔یہ ننھا دہشت گرد انسان کو بہت تکلیف دیتا ہے اور یہ جلد، خون، سانس اور پیشاب کی نالی کے شدید انفیکشن کی وجہ بنتا ہے۔ اب یہ حال ہے کہ یہ کئی دواؤں کو مکمل بے اثر بناچکا ہے۔ اس سے لڑنے کے لیے ڈاکٹر کئی ادویہ ایک ساتھ ملاکر مریض کو دیتے ہیں لیکن اس کے باوجود انفیکشن ختم ہونے میں بہت وقت لگ جاتا ہے۔ یہ مسئلہ غریب اور درمیانی آمدنی والے ممالک میں بہت زیادہ ہے۔سبز چائے میں موجود ایپیگیلوکیٹاکِن مرکب اس سے قبل اندرونی سوزش اور جوڑوں کے درد دور کرنے میں مفید ثابت ہوا ہے۔ ماہرین نے سبز چائے سے یہ مرکب نکال کر اسے ایک دوا ایزٹریونام کے ساتھ ملا کر استعمال کیا۔ جب لیبارٹری میں اس کی آزمائش کی گئی تو اس سے جراثیم کی مزاحمت بہت حد تک کم ہوئی لیکن اگلے مرحلے میں صرف دوا آزمائی گئی تو جراثیم ویسے ہی ڈھیٹ ثابت ہوئے اور دوا کو ناکام بنادیا۔صرف امریکا میں ہی ہر سال 20 لاکھ افراد ایسے انفیکشن کے شکار ہورہے ہیں جو ہمارے پاس موجود تمام ادویہ کے سامنے سخت جان بن چکے ہیں۔ سینٹر فار ڈیزیز کنٹرول کے مطابق، اس سے ہر سال 23 ہزار افراد موت کے منہ میں جارہے ہیں۔اسی بنا پر ماہرین نے کہا ہے کہ سبز چائے اینٹی بایوٹکس کی تاثیر بڑھا سکتی ہے؛ تاہم اس ضمن میں مزید تحقیق کی ضرورت ہے۔