لاہور : (ویب ڈیسک) پاکستان فٹبال فیڈریشن کے مطابق قومی فٹبال ٹیم 8سے 18جون تک ماریشس میں ہونے والے 4ملکی ٹورنامنٹ میں حصہ لے گی۔
ترجمان پاکستان فٹبال فیڈریشن کے مطابق اس ایونٹ میں پاکستان، میزبان ماریشس، کینیا اور جبوتی کی ٹیمیں شریک ہوں گی اور مکمل شیڈول کا اعلان جلد کردیا جائے گا ۔
ٹورنامنٹ کی تیاری کیلئے قومی ٹیم کا تربیتی کیمپ رواں ماہ کے آخری ہفتے میں شروع ہوگا۔
پی ایف ایف کے مطابق اس ایونٹ میں پاکستانی فٹبالرز کو اپنی صلاحیتوں کے اظہار کے بھرپور مواقع ملیں گے۔
ترجمان پاکستان فٹبال فیڈریشن کا کہنا ہے کہ قومی سپورٹس ٹیموں کی انٹرنیشنل ایونٹس میں زیادہ سے زیادہ شرکت یقینی بنانے کیلئے کوشاں ہیں۔

لاہور: (ویب ڈیسک) پاکستان کرکٹ بورڈ (پی سی بی) نے 4 رکنی قومی سلیکشن کمیٹی کا اعلان کر دیا۔
چیئرمین مینجمنٹ کمیٹی پی سی بی نجم سیٹھی نے انٹرویو کے بعد سلیکشن پینل کا اعلان کیا۔
پاکستان کرکٹ بورڈ (پی سی بی) نے چار رکنی نئی قومی سلیکشن کمیٹی تشکیل دی ہے، ہارون رشید قومی سلیکشن کمیٹی کے سربراہ ہوں گے۔
کمیٹی میں مکی آرتھر، گرانٹ بریڈ برن اور حسن چیمہ شامل ہیں، پہلی بار ڈیٹا انلسٹ حسن چیمہ کو بھی سلیکشن کمیٹی کا حصہ بنایا گیا ہے۔
نئی سلیکشن کمیٹی پاکستان ٹیم، شاہین اور انڈر 19 ٹیم کی سلیکشن کرے گی۔

لاہور: (ویب ڈیسک) چیئرمین پاکستان کرکٹ بورڈ (پی سی بی) نے سابق کپتان شاہد آفریدی کو جواب دیتے ہوئے کہا کہ ورلڈ کپ کیلئے ٹیم بھارت بھیجنے کا فیصلہ انہوں نے نہیں حکومت نے کرنا ہے۔
غیر ملکی میڈیا سے گفتگو کرتے ہوئے نجم سیٹھی کا کہنا تھا کہ ٹیم بھارت بھیجنے کا فیصلہ جے شاہ اور میرا بھی نہیں ہے، یہ فیصلہ اس جانب بھارتی حکومت اور ادھر پاکستان حکومت کا ہے، سکیورٹی کی بنیاد پر ہی ان فیصلوں کا انحصار ہوتا ہے، اگر حکومت نے کہا کہ آپ جائیں ورلڈ کپ کھیلنے تو ہم ضرور جائیں گے۔
چیئرمین پی سی بی نے بتایا کہ اے سی سی کے سربراہ جے شاہ کی درخواست پر میری چند روز قبل نائب صدر پنکج کھمجی سے ملاقات ہوئی، ہائبرڈ ماڈل پر مثبت رد عمل سامنے آیا اور انہوں نے جے شاہ کو بریف کرنے کا بتایا، مجھے کہا گیا کہ 15 مئی کو بتائیں گے لیکن ابھی میں فیصلے کا انتظار کر رہا ہوں۔
نجم سیٹھی نے کہا کہ سری لنکا کی جانب سے اے سی سی پر دباؤ ہے کہ نیوٹرل وینیو کے لئے سری لنکا کا انتخاب کیا جائے ان کو اعتراض ہے کہ ستمبر میں یو اے ای میں گرمی بہت شدید ہوتی ہے ایک روزہ میچز کھیلنا مشکل ہے، اسی موسم میں یو اے ای میں ایشیا کپ سمیت آئی پی ایل کے میچز ہو چکے ہیں۔
انہوں نے مزید کہا کہ میزبان پاکستان ہے گیٹ منی میزبان کا حق ہے سری لنکا میں گیٹ منی کم ملے گی، اگر سری لنکا کا فیصلہ متفقہ ہوتا ہے اور ہمیں معاوضہ دے دیتے ہیں تو اس پر بھی بات ہو سکتی ہے، مکی آرتھر پاکستان کرکٹ سے واقف ہیں کاونٹی کرکٹ کی مصروفیات کا اثر پاکستان ٹیم پر نہیں پڑے گا۔
چیئرمین پی سی بی کا کہنا تھا کہ نئی سلیکشن کمیٹی کے سربراہ ہارون رشید ہی رہیں گے جبکہ کمیٹی کے اراکین میں مکی آرتھر، گرانٹ بریڈ برن اور حسن چیمہ ہوں گے، حسن چیمہ ڈیٹا کے ماہر ہیں سلیکشن کمیٹی ڈیٹا پر بھی انحصار کرے گی، ایشیا کپ ضرور ہوگا اگر نہیں ہوتا تو پھر اس کی جگہ تین ملکی ٹورنامنٹ کا پلان تیار ہے۔
تین ملکی ٹورنامنٹ ایشیا کپ کی مقرر کردہ تاریخوں پر ہی ہوگا، آئی سی سی کے اجلاس میں ریونیو شیئرنگ کے فارمولے پر بات کی جائے گی۔
قبل ازیں قومی کرکٹ ٹیم کے سابق کپتان اور چیف سلیکٹر شاہد آفریدی نے ایک انٹرویو کے دوران قومی ٹیم کو بھارت میں شیڈول ورلڈکپ کھیلنے اور جیتنے کا مشورہ دیا تھا۔

لاہور: (ویب ڈیسک) وہیل چیئر کرکٹ ایشیا کپ کی تیاری کیلئے پاکستانی ٹیم کا ٹریننگ کیمپ کل شروع ہوگا۔
لاہور میں وہیل چیئر کرکٹ ٹیم کے کھلاڑی باغِ جناح کرکٹ گراؤنڈ میں ٹریننگ کریں گے۔
پاکستان وہیل چیئر کرکٹ کونسل نیپال میں ایشیا کپ کی میزبانی کر رہا ہے، یہ ٹورنامنٹ 11 جولائی سے کھٹمنڈو کے 2 گراؤنڈز میں کھیلا جائے گا۔
وہیل چیئر کرکٹ ایشیا کپ میں پاکستان، بھارت، نیپال، سری لنکا، بنگلا دیش اور افغانستان کی ٹیمیں شامل ہیں۔
یاد رہے کہ افغانستان کی ٹیم آئندہ ماہ 3 ٹی ٹونٹی اور 2 ون ڈے میچز کی سیریز کھیلنے اسلام آباد آئے گی، اس طرح پہلی مرتبہ وہیل چیئر کرکٹ کی انٹرنیشنل ٹیم پاکستان کا دورہ کرے گی۔