اسلام آباد: (ویب ڈیسک) صدر مملکت ڈاکٹر عارف علوی نے مشترکہ مفادات کونسل کی تشکیل نو کی منظوری دے دی۔ منظوری وزیر اعظم کی ایڈوائس پر آئین کے آرٹیکل ایک سو تریپن کے تحت دی گئی۔
وزیراعظم مشترکہ مفادات کونسل کے سربراہ ہونگے۔ چاروں صوبوں کے وزرائے اعلیٰ اور تین نامزد وفاقی وزراء بھی کونسل کا حصہ ہونگے۔ کونسل میں تین وفاقی وزیر، وزیر اعظم کی طرف سے نامزد کیے گئے۔ وفاقی وزیر منصوبہ بندی، احسن اقبال، وزیر تجارت، سید نوید قمر اور وزیر ریلوے، خواجہ سعد رفیق، بطور ممبر تعینات کیے گئے ہیں۔

لاہور: (ویب ڈیسک) صوبائی ڈیزاسٹر مینجمنٹ اتھارٹی (پی ڈی ایم اے) نے آئندہ ہفتے گرمی کی شدت میں اضافے کا الرٹ جاری کر دیا۔
پی ڈی ایم اے کی جانب سے جاری کردہ مراسلے میں آئندہ ہفتے ملک بھر میں شدید گرمی کی لہر کی پیشگوئی کی گئی ہے۔ مراسلے کے مطابق آئندہ ہفتے بالائی پنجاب، اسلام آباد، گلگت بلتستان اور کشمیر میں درجہ حرارت 7 سے 9 ڈگری مزید بڑھ جائے گا۔
وسطی اور جنوبی پنجاب میں دن کا درجہ حرارت 46 ڈگری سینٹی گریڈ رہنے کا امکان ہے۔ گرمی اور خشک موسم کے باعث آبی ذخائر، سبزیوں، پھلوں کے باغات کو پانی کی کمی کا خطرہ ہے۔
مراسلے میں خبردار کیا گیا ہے کہ زیادہ گرمی کے باعث آئندہ ہفتے دریاؤں میں پانی کا بہاؤ بڑھنے کا بھی خطرہ ہے۔ کسان موسمی حالات کے مطابق فصلوں کو پانی دینے کا مناسب اقدام کریں۔

لاہور: (ویب ڈیسک) پاسپورٹ ایکٹ 1974 کے تحت ایک سے زائد پاکستانی پاسپورٹس منسوخ کیے جائیں گے۔
وفاقی وزیر اطلاعات مریم اورنگزیب کا کہنا ہے کہ وفاقی کابینہ کے 10 مئی اجلاس میں ایک سے زائد پاکستانی پاسپورٹس منسوخ کرنے کی منظوری دی گئی ہے، غیر ملکی پاسپورٹس منسوخ کرنے کی خبر غلط رپورٹ ہوئی ہے۔
انہوں نے کہا کہ دو پاکستانی پاسپورٹس رکھنا جرم ہے، دو پاکستانی پاسپورٹ منسوخ کرنے کی آخری تاریخ 31 دسمبر مقرر کی گئی، تاہم فیصلے کا اطلاق بیرون ملک شہریت یا غیر ملکی پاسپورٹ پر نہیں ہوگا۔