عارف والا: (ویب ڈیسک) پنجاب کے ضلع پاک پتن کی تحصیل عارف والا میں تہرے قتل کے مجرم سفاک باپ کو 3مرتبہ سزائے موت سنا دی گئی۔
عارف والا محمد نگرکے ایڈیشنل سیشن جج اعظم رانا نے تہرے قتل کیس کا فیصلہ سناتے ہوئے ملزم احمد یاربلوچ پرالزام ثابت ہونے کے بعد 3 مرتبہ سزائے موت اورایک لاکھ روپے جرمانے کی سزا سنائی۔
محمد نگرکے نواحی گاؤں 83 ای بی میں نشئی باپ نے نشے سے منع کرنے پر3 بیٹیوں کوگلا دبا کرقتل اوربیوی کو تیز دھار آلے سےشدید زخمی کردیا تھا۔ تہرے قتل کا واقعہ 2017 میں پیش آیا تھا۔

لاہور: (ویب ڈیسک) وزیراعلی حمزہ شہباز نے عوام کو زیادہ سے زیادہ ریلیف دینے کیلئے فوری اقدامات کا حکم دیتے ہوئے خود اضلاع کے سرپرائز وزٹ کا فیصلہ کرلیا۔
وزیراعلیٰ پنجاب حمزہ شہباز صوبے کے عوام کو مہنگائی سے ریلیف دینے کیلئے متحرک ہوگئے۔ حمزہ شہباز نے چیف سیکرٹری پنجاب کو بھی فیلڈ کے دوروں کی ہدایت کر دی۔ وزیر اعلی آفس میں چیف منسٹر پرائس کنٹرول سیل قائم کیا جائے گا۔
اس موقع پر حمزہ شہباز کا کہنا تھا کہ پنجاب میں ڈسٹرکٹ پرائس کنٹرول کمیٹیاں تشکیل دے کر ازسر نو فعال کر دیا گیا ہے، فوکل پرسن عوام کو اشیاء ضروریہ کی مقرر کردہ نرخوں پر یقینی بنانے میں متحرک کردار کریں گے، گھی، آٹے، چینی، چکن اور دیگر اشیاء ضروریہ کی قیمتیں کم کرنے کیلئے جامع ایکشن پلان پر عملدرآمد ہوگا۔
حمزہ شہباز نے کہا کہ آٹے اور چینی کی ذخیرہ اندوزی کو قطعا برداشت نہیں کیا جائے گا، انتظامیہ ذخیرہ اندوزوں پر کڑی نظر رکھے، مہنگائی کی جو بھی وجہ ہو، مجھے پریشان عوام کو ریلیف دینا ہے، غیر معمولی حالات میں فوری اقدامات کے متقاضی ہیں، عام آدمی کے لئے آسانیاں پیدا کرنے کے لیے تمام ضروری اقدامات کئے جائیں گے۔

کراچی: (ویب ڈیسک) حیدرآباد کے قریب رحمان بابا ایکسپریس کا حادثہ پیش آیا اور کئی بوگیاں پٹری سے اتر گئیں۔
پشاور سے کراچی آنے والی رحمان بابا ایکسپریس بولاری کے قریب حادثے کا شکار ہوئی۔ رحمان بابا ایکسپریس کا انجن اور کئی بوگیاں پٹری سے اتر گئیں۔
ریسکیو ذرائع کے مطابق رحمان بابا ایکسپریس حادثے میں کسی جانی نقصان کی اطلاع نہیں ہے اور حادثے کے فوری بعد امدادی ٹیموں کو طلب کر لیا گیا۔

کراچی: (ویب ڈیسک) شیری رحمان نے کہا ہے کہ وزیراعظم کو کسی سازش نہیں اعتماد کھو جانے کے بعد ہٹایا گیا، عوام عمران خان کے چور اور سازش کے بیانیے کو مسترد کرچکے۔
پیپلزپارٹی کی مرکزی نائب صدر و سینیٹر شیری رحمان نے کہا ہے کہ اپنی سیاست کو زندہ رکھنے کے عمران خان احتجاج کو جہاد قرار دے رہے ہیں، عمران خان واضع کر دیں کہ وہ کن کے خلاف یہ جہاد کر رہے ہیں ؟ عمران خان صرف انتشار پھیلانے اور تقسیم کی سیاست میں اپنا سارا وقت گزارنے میں تلے ہوئے ہیں، اپنے اقتدار اور مشہوری کے لئے عمران خان خانہ جنگی سمیت ملک کو گنوانے کے لئے بھی تیار ہیں، اس تقسیم کی سیاست میں نہ اقتصادی بحران حل ہو سکتا ہے نہ ہی سیاسی، ملک کو بحرانوں میں دھکیلنے کے بعد اب کہہ رہے ہیں انتخابات کروا کر ہمیں واپس لائیں۔
شیری رحمان نے کہا کہ سابقہ حکومت کے پاس بحرانوں کے حل کے لئے چور چور اور سازش کہنے کے علاوہ کوئی اور پروگرام یا منصوبہ نہیں ہے، ان کے پاس کوئی پلان نہیں بس ملک میں خطرناک خانہ جنگی کی پھوٹ ڈالنا چاہتے ہیں، واضع ہے کہ چاہے کچھ بھی ہو عمران خان کو کوئی فکر نہیں، عمران خان ہر حال میں اقتدار میں آنا چاہتے ہیں، عمران خان صرف اپنی انا اور اپنی ذات کی سیاست میں مصروف ہیں۔

اسلام آباد: (ویب ڈیسک) وفاقی وزیر اطلاعات مریم اورنگزیب نے کہا ہے کہ عمران خان مہنگائی اور معاشی تباہی کا حساب دیں۔
وفاقی وزیر اطلاعات مریم اورنگزیب نے میڈیا سے گفتگو میں کہا کہ معیشت کی تباہی اور ڈالر کی تاریخی بلندی کا مجرم عمران خان ہے اور پاکستان کو مسائل کی دلدل میں عمران خان نے دھنسایا ہے۔
انہوں نے کہا کہ اگر آج ڈالر میں اضافہ ہو رہا ہے تو اس کے ذمہ دار عمران خان ہیں اور ڈالر 193 روپے پرعمران خان کی وجہ سے گیا ہے۔ عالمی مالیاتی ادارے (آئی ایم ایف) کے معاہدے پر عمران خان نے دستخط کیے تھے اور آئی ایم ایف کے معاہدے پر دستخط کرنے کی سزا عوام کو مل رہی ہے۔
یہ بھی پڑھیں: نیوٹرلز کو خبردار کیا تھا، اگر سازش کامیاب ہوئی تو معاشی بحالی دم توڑ جائے گی، عمران خان
مریم اورنگزیب نے کہا کہ عمران خان مافیا کی حکومت کی وجہ سے معاشی دہشت گردی کی گئی اور آج ملک میں معاشی عدم استحکام عمران خان کی وجہ سے ہے اور اگر آج مشکل فیصلے کیے جا رہے ہیں تو اس کے ذمہ دار بھی عمران خان ہیں۔
انہوں نے کہا کہ عمران خان شور نہ مچائیں بلکہ مہنگائی اور معاشی تباہی کا حساب دیں۔

اسلام آباد: (ویب ڈیسک) وزارت مذہبی امورنے حج سے متعلق حتمی شکل دینے کا مرحلہ مکمل کرلیا۔
رواں سال 81 ہزار سے زائد پاکستانی فریضہ حج ادا کرینگے، ایئرلائن کا کرایہ 1 لاکھ 80 ہزارسے 2 لاکھ 80 ہزار مقرر، سرکاری حج کی فیس 9 لاکھ 45 ہزار مقرر کرنے کی سفارش کی گئی ہے۔ جبکہ پرائیوٹ حج کی فیس 12 لاکھ سے شروع ہوگا۔
رواں سال چالیس فیصد کوٹہ سرکاری جبکہ 60 فیصد پرائیوٹ حج آپریٹر کو دیا جائے گا۔ پاکستانی ایئرلائن حج آپریشن میں حصہ لیں گی، اب تک30 ہزار سے زائد درخواستیں موصول ہوچکی ہیں، درخوستیں وصول کرنے کی 13مئی آخری تاریخ ہے۔
2019 میں ایک لاکھ 80 ہزار پاکستانیوں نے فریضہ حج ادا کیا تھا، رواں سال 10 لاکھ سے زائد مسلمان فریضہ حج ادا کریں گے۔
تمام حجاج کے پاس اسمارٹ فون لازمی قرار دیا گیا ہے۔۔۔حج کی ادائیگی کے سعودی عرب پہچنے والے تمام عازمین کو مقامی سم اور بمعہ انٹرنیٹ پیکج بھی لازمی قرار دیا گیا۔