کراچی: (ویب ڈیسک) کراچی میں بجلی کی فراہمی کا کوئی وقت نہیں رہا، کے الیکٹرک کی جانب سے گرمیوں میں غیراعلانیہ لوڈشیڈنگ کا دورانیہ مزید طویل ہو گیا۔ شہری بارہ گھنٹوں تک لوڈشیڈنگ برداشت کرنے پر مجبور ہیں۔
کراچی میں لوڈشیڈنگ بڑھتے بڑھتے 12 گھنٹے تک پہنچ گئی، شہریوں کو اذیت پہنچانے کیلئے کے الیکٹرک کو کھلی چھوٹ مل گئی ہے۔ وقت پر پورا بل بھرنے والوں کو بھی طویل لوڈ شیڈنگ کا سامنا ہے۔ کے الیکٹرک کا دعوی
ہے کہ شہر میں شیڈول کے مطابق لوڈ شیڈنگ کی جا رہی ہے، بجلی کی فراہمی بلوں کی ادائیگی سے مشروط ہے۔
شہر قائد کے علاقے لائینز ایریا، ملیرسٹی، رفیع گارڈن، کورنگی، لانڈھی، اورنگی ٹاون بجلی کی معطلی سے شدید متاثر ہیں جبکہ گلستان جوہر، نارتھ کراچی، صدر، شاہ فیصل کالونی سمیت دیگر علاقوں کے شہری بھی گرمی میں اچانک بجلی چلے جانے کی اذیت سے دوچار ہیں۔

لاہور: (ویب ڈیسک) وزیر اعلیٰ پنجاب حمزہ شہباز نے بغیر نمبر پلیٹس اور غیر نمونہ نمبر پلیٹس کےخلاف کارروائی کا حکم دے دیا ہے۔
سٹی ٹریفک پولیس نے غیر نمونہ اور فینسی نمبر پلیٹس والی وہیکلز کےخلاف کریک ڈاؤن شروع کر دیا، سی ٹی او لاہور نے کہا کہ بوگس اور نمبر پلیٹس سے چھیڑ چھاڑ کرنے والوں کےخلاف مقدمات درج ہوں گے، مقدمات موٹروہیکل آرڈنینس 97 اے کے تحت درج ہوں گے۔
نمبر پلیٹس پر ٹیمپرنگ، جعلی اور واضح نمبر نہ ہونے پر کوئی عذر قبول نہیں، سی ٹی او لاہور منتظر مہدی نے کہا کہ کالے شیشوں والی گاڑیوں کے خلاف بدستور کارروائی جاری رہے گی، 400 سےزائد نمبر پلیٹس مینوفیکچررز کو وارننگ اور آگاہی نوٹسز جاری کیے جا چکے ہیں۔
انہوں نے بتایا کہ لاہورآگاہی مہم کے دوران پانچ لاکھ سے زائد شہریوں کو وارننگ دی گئی۔

لاہور: (ویب ڈیسک) پاکستان تحریک انصاف کے رہنما شہباز گل کے ٹوئٹر سے 50 ہزار فالورز غائب ہوگئے۔
جس کی تصدیق شہباز گل نے اپنے ٹوئٹر اکاونٹ پر ٹوئٹ کے ذریعے ہی کی، انہوں نے لکھا کہ میرے 50 ہزار ٹوئٹر فالورز ایک دم غائب۔ ان کو بھی کوئی مقصود چپڑاسی ٹکر گیا کیا
شہباز گل نے اپنی ٹوئٹ میں ٹوئٹر کے آفیشل اکاونٹ، اور ایلون مسک کو ٹیگ بھی گیا۔ یاد رہے ایلون مسک حال ہی میں ٹوئٹر کو 44 بلین ڈالرز میں خرید چکے ہیں۔
شہباز گل ٹوئٹر کو اپنے آرا کے لیے بہت زیادہ استعمال کرتے ہیں، اور لوگوں کو اپنی پارٹی پالیسیوں سے آگاہ کرتے رہتے ہیں، لیکن پی ٹی آئی رہنما کے فالورز ایک دم کہاں گئے؟ اس بارے میں ابھی تک کوئی چیز سامنے نہیں آسکی۔

لندن: (ویب ڈیسک) خواجہ آصف نے کہا ہے کہ معاشی اصلاحات اولین ترجیح ہے، جلد فیصلے کرنا ہوں گے، چاہتے ہیں معاشی معاملات ٹھیک ہوں، اگلے مرحلے میں الیکشن کرائیں گے۔
وفاقی وزیر دفاع خواجہ آصف نے میڈیا سے گفتگو کرتے ہوئے کہا کہ ملک سے وفاداری اور محبت اقتدار سے مشروط نہیں، وفاداری افراد سے نہیں ہوتی، افراد آج ہیں کل نہیں، دل کرتا ہے کل ہی نواز شریف کو وطن لے آؤں لیکن یہ فیصلہ پارٹی کرے گی، نواز شریف وطن آئیں گے تو سیاسی درجہ حرارت بڑھے گا، نواز شریف کی قیادت کی قوم اور جماعت دونوں کو ضرورت ہے۔
لیگی رہنما کا کہنا تھا کہ عمران خان کا امریکا مخالف بیانیہ کوئی بیانیہ نہیں، عمران خان کبھی امپورٹڈ حکومت کبھی غداری کے سرٹیفکیٹ بانٹتے ہیں، عارف علوی، عمران خان، قاسم سوری، عمر سرفراز چیمہ نے آئین کی خلاف ورزی کی، اگر قانون ضروری سمجھتا ہے تو ان کے خلاف کارروائی ہونی چاہیے، سیاسی کارکن ہوں، مخالفین کو عوام کی رائے کے رحم و کرم پر چھوڑتا ہوں، گرفتاریوں پر یقین نہیں رکھتے۔
خواجہ آصف نے کہا کہ عمران خان کی طرح کا رویہ اختیار نہیں کریں گے، اب جو بھی بات ہوگی آئین اور قانون کے مطابق ہوگی، مینڈیٹ کی ضرورت پڑی تو عوام میں جائیں گے، کسی صورت عمران خان جیسا رویہ نہیں رکھیں گے، اقتدار گیا تو اداروں کو برا بھلا کہنا شروع کر دیں، نواز شریف بڑی مثال ہیں جنہیں وزارت عظمیٰ سے سیدھا جیل بھیجا گیا۔