ڈپٹی مینیجنگ ڈائریکٹر واسا آپریشن محمد غفران کی سربراہی میں واسا کی میٹنگ کا انعقاد ہوا ہے۔

واسا کی منعقدہ میٹنگ میں ادارے کے ڈویلپمنٹ ورکس، ڈیسلٹنگ، ون لائن ون سٹریٹ، ڈیجیٹل کمپلینٹ سینٹر، گریٹنگ کی تنصیب کے علاوہ نئی و پرانی مشینری کی پراگرس کا جائزہ لیا گیا۔

میٹنگ میں یہ طے پایا کہ تمام ڈرین اور سیوریج لائنوں کی ڈیسلٹنگ کا آغاز 50 فیصد مشینری کے ساتھ جنوری سے کیا جائے گا جس کی روزانہ کی بنیاد پر مانیٹرنگ کی جائے گی۔

محمد غفران کا کہنا تھا کہ ون لائن ون اسٹریٹ کے تحت ایک گلی میں ایک پائپ لائن فعال ہو گی اور پرانی پائپ لائن کو لازمی ڈیڈ کرنا ہو گا۔

ڈپٹی مینیجنگ ڈائریکٹر واسا آپریشن محمد غفران نے شکایات کا بروقت ازالہ نہ کرنے والے افسران و عملہ پر میٹنگ میں سخت برہمی کا اظہار کرتے ہوئے کہا کہ غفلت کے مرتکب افسران و عملہ کے خلاف ایکشن لیا جائے گا۔

اسپیکر پنجاب اسمبلی چودہدی پرویزالٰہی نے کہا ہے کہ پاکستان کے زرعی ریسرچ اداروں کو پرائیویٹائز نہیں ہونے دینگے۔

پرویزالٰہی سے ایوب ریسرچ انسٹیٹیوٹ فیصل آباد کے وفد کی ڈاکٹر عزیز الرحمن کی سربراہی میں ملاقات ہوئی، وفد میں ڈاکٹر خنساء خاکوانی، ڈاکٹرصدف شمیم اور ارسلان عباس شامل ہیں۔

ملاقات میں وفد نے اسپیکر پنجاب اسمبلی کو انسٹیٹیوٹ کو بلاجواز پرائیویٹائز کرنے کے حوالے سے اپنے مسائل سے آگاہ کیا۔

اس موقع پر اسپیکر پنجاب اسمبلی نے کہا کہ حکومت ریسرچ کے فنڈز کی کمی کو پورا کرے۔

انہوں نے کہا کہ اس ادارے کو ٹرانسفارمیشن کے نام پر پرائیویٹائز کیا جا رہا ہے، پاکستان کے زرعی ریسرچ اداروں کو پرائیویٹائز نہیں ہونے دینگے۔

پرویزالٰہی کا کہنا تھا کہ ایوب ریسرچ انسٹیٹیوٹ پاکستان میں گندم، چاول، دالوں، کپاس سمیت تقریباً دو سو کے قریب مختلف اقسام کے بیج متعارف کروا رہا ہے۔

اسپیکر پنجاب اسمبلی چودہدی پرویزالٰہی کا مزید کہنا تھا کہ ایوب انسٹیٹیوٹ کے خلاف اگر کوئی سازش ہو رہی تو ہم اسے کامیاب نہیں ہونے دیں گے۔

ملاقات میں وفد نے اسپیکر پنجاب اسمبلی نے مسائل کے حل کی یقین دہانی پر شکریہ ادا کیا۔

ڈاکٹر صدف شمیم نے کہا کہ ملک میں پہلے ہی عوام روٹی اور روزگار کی تلاش میں سڑکوں پر ہے۔ ایوب ریسرچ انسٹیٹیوٹ کا 90 فیصد رقبہ تجربات کیلئے مختص ہے، پرائیویٹائزیشن کے ذریعے زمین قبضہ مافیا ہڑپ کرنا چاہتا ہے۔