لاہور(آئی این پی)چیئر مین پاکستان کرکٹ بورڈنجم سیٹھی نے کہا ہے کہ ماضی میں اگر کرکٹ کرپشن کے خلاف سخت ایکشن لیا جاتا تو آج یہ دن نہ دیکھنا پڑتا۔پی ایس ایل میں جو کھلاڑی اسپاٹ فکسنگ میں ملوث تھے ان کےخلاف ایکشن لینا ضروری تھا ۔لاہور میں تقریب سے خطاب میں چیئرمین پی سی بی کا کہنا تھا کہ پی سی بی میں مجھے دھکا دیا گیا ہے، پی سی بی میں چار سال ہوگئے ہیں،اب ڈبل پی ایچ ڈی ہو گیا ہوں،مجھے پی سی بی کا آئین بنانے اور الیکشن کروانے کے لیے بھیجا گیا تھا۔انہوں نے کہا کہ آئندہ سال جنوری، فروری میں پی ایس ایل کے میچز کرانے کا ارادہ ہے،کراچی کے حالات ٹھیک نہیں تھے اب صورتحال بہتر ہوچکی ہے،ورلڈ الیون کے بعد سیکورٹی ٹیم کو کراچی کا وزٹ کرائیں گے۔نجم سیٹھی نے کہا کہ کراچی میں کوئی کرکٹ اکیڈمی نہیں تھی، شہرمیں اسٹیڈیم کی حالت بری تھی، بین الاقوامی کرکٹ نہیں ہو سکتی تھی،ڈیڑھ کروڑ کی لاگت سے کراچی اسٹیڈیم ٹھیک کرایا جا رہا ہے۔انہوں نے مزید کہا کہ پی سی بی حکومت سے کچھ نہیں لیتا،خود کماتا اور استعمال کرتاہے، پی سی بی نے کروڑوں روپے لینے تھے کسی نے ہمت نہیں کی۔
