لاہور (خصوصی رپورٹ) بھارتی خفیہ ایجنسی (را) نے جماعت الدعوة کے سربراہ حافظ سعید کو قتل کرانے کا منصوبہ بنایا ہے اور اس کے لئے کالعدم جیش محمد کے دو کارکنوں کو 8 کروڑ روپے دئیے گئے ہیں۔ یہ انکشاف نیشنل کاﺅنٹر ٹیرارزم اتھارٹی (نیکٹا) کی طرف سے محکمہ داخلہ پنجاب کو بھیجی جانے والی وارننگ میں کہا گیا ہے۔ معتبر ذرائع نے بتایا کہ محکمہ داخلہ پنجاب نے اس وارننگ کی بنیاد پر حافظ سعید کی نظر بندی میں ایک ماہ کی توسیع کروائی ہے۔ ذرائع نے بتایا کہ حافظ سعید نے نیکٹا کی طرف سے بھیجی گئی اس وارننگ پر موقف اختیار کیا ہے کہ وہ اپنی حفاظت خود کر سکتے ہیں جبکہ محکمہ داخلہ نے موقف اختیار کیا کہ ان کی جان کو شدید خطرات لاحق ہیں۔ محکمہ داخلہ پنجاب نے حافظ سعید کی نظربندی کے دوران سکیورٹی کو مزید بہتر بنانے کیلئے ہدایات جاری کی ہیں۔
