لاہور (وقائع نگار) پاکستان تحریک انصاف کے چیئرمین عمران خان کہاکہ شریف خاندان نے سارے ادارے تباہ کردیئے ،جب ادارے تباہ ہوتے ہیں ملک تباہ ہوتا ہے شریف فیملی نے، قوم کے ٹیکسوں کا پیسہ چوری کیا اور بیرون ملک بھجوایا اورحکمرانوں نے ملک کی مضبوطی اور بہتری کے لئے کچھ نہیں کیا، ملک قوم کے ٹیکس کے پیسوں سے چلتا ہے ، شریف خاندان نے ملکی ادارے تباہ کردیئے، پاکستان کی سیاست نیا رخ اختیار کر رہی ہے پرانی سیاست اب نہیں چلے گی ،پی ٹی آئی کی حکومت آئی تو نہ میں کوئی ذاتی فائدہ اٹھاﺅنگا اور نہ کسی کو اٹھانے دوںگا، احتسا ب کا عمل میرے سے شروع ہوگا اور سب کا بلا تفریق احتساب ہوگا، ملکی قیادت کرنے والے مثال قائم کرتے ہیں ،شریف خاندان نے اپنے ذاتی نوکروں کو اداروں میں تعینات کیا، جب تحریک انصاف کی حکومت آئے گی ادارے مضبوط ہوںگے، ادارے کسی شخصیت کے نیچے کام نہیں کریںگے، نواز شریف اور زرداری پیسے کے زریعے لوگوں کو خریدتے ہیں ، وزیراعظم خاقان عباسی (ن) لیگ کے ہر ایم این ایز کو 94 کروڑ روپے دے رہے ہیں اور اس سے کرپشن شروع ہو تی ہے اور حکمرانوں کی کرپشن کا اثر پٹواریوں اور پولیس تک ہوتا ہے ، ان خیالات کا اظہار عمران خان نے سابقہ وزیرخارجہ سردار آصف احمدعلی کی تحریک انصاف میں شمولیت کے موقع پر کیا، اس موقع پر جہانگیر خان ترین ، شفقت محمود، عبدالعلیم خان، میاں محمود الرشید، نعیم الحق ،شعیب صدیقی، عون چوہدری، طالب نکئی سمیت دیگرحلقے کی سیاسی شخصیات بھی موجود تھیں، انہوں نے کہاکہ سپریم کورٹ نے تفصیلی فیصلے میں کہا کہ شریف مافیا نے اداروں کو تباہ کیا ، پیسہ منی لانڈرنگ سے باہر جا رہے تھے لیکن ادارے خاموش تھے ،انہوں نے کہاکہ یہ پاکستان کی جنگ ہے ، قائد اعظم کے پاکستان میں ادارے مضبوط ہوں گے ، شخصیات اداروں کے نیچے ہوں گی ، ملکی قیادت کرنے والے مثال قائم کرتے ہیں ،جو بھی تحریک انصاف میں آئے گا وہ اپنے لئے نہیں بلکہ ملک کے لئے کھیلے گا ، عمران خان کا کہنا تھا کہ تحریک انصاف کی حکومت میں کسی ایم این اے ایم پی ایز کو ترقیاتی فنڈز نہیں ملیں گے، جو پی ٹی آئی کا ٹکٹ چاہتے ہیں انہیں کوئی ترقیاتی فنڈز نہیں ملیں گے،تحریک انصاف ملک میں آئندہ ضلعی ناظمین کا ڈائریکٹ الیکشن سے انتخاب کرے گی، لندن کی طرزپر ضلعی ناظم کا براہ راست الیکشن کرائیں گے تاکہ ہارس ٹریڈنگ سے بچا جا سکے ، ان کا مزید کہناتھاکہ پچھلے چارسالوں سے کے پی کے حکومت ہے لیکن کوئی مجھ پر انگلی نہیں اٹھا سکتا کہ میں نے کوئی ذاتی فائدہ اٹھایا ہو حتیٰ کہ کلاس فور کا ملازم تک بھرتی نہیں کروایا۔ چیئرمین تحریک انصاف عمران خان نے ایک بار پھر قبل ازوقت انتخابات کا مطالبہ کرتے ہوئے کہا ہے کہ بڑھتے ہوئے معاشی بحران اور مفلوج حکومت کے باعث قبل ازوقت انتخابات نہایت ضروری ہیں۔ سماجی رابطے کی ویب سائٹ ٹوئٹر پر بیان میں عمران خان نے کہا کہ عالمی بینک کے مطابق گزشتہ ایک برس میں ملکی معیشت نمایاں ابتری کا شکار رہی ہے‘ عالمی بینک کا اندازہ ہے کہ پاکستان تقریبا سبھی بڑے معاشی اہداف کے حصول میں ناکام رہے گا۔ انہوں نے کہا کہ بدترین معاشی حکمت عملی کرنٹ اکاو¿نٹ اور مالی خسارے میں اضافے کی موجب رہے گی‘ اقتصادی نمو کی شرح بھی منفی اثرات کے زد میں رہے گی۔ چیئرمین پی ٹی آئی کا کہنا تھا کہ عالمی بینک نے (ن) لیگ کی جانب سے آفت زدہ معیشت کی حقیقت کھول دی ہے‘ بڑھتے ہوئے معاشی بحران اور مفلوج حکومت کے باعث قبل ازوقت انتخابات نہایت ضروری ہیں‘ جمہوریت کی بقا و استحکام کے لیے قبل ازوقت انتخاب ہی موثر نسخہ ہیں۔
