کراچی (شوبز ڈیسک)ہدایتکار ندیم بیگ اور پروڈیوسر ہمایوں سعید مزاحیہ فلم ” جوانی پھر نہیں آنی 2 “میں بھارتی فنکاروں کو کاسٹ کرکے پریشان ہوگئے۔ دبئی میں کئی دنوں سے جاری فلم کی مسلسل عکسبندی شیڈول کے تحت ان بھارتی فنکاروں کی وجہ سے مکمل نہیں ہوسکی۔ ذرائع نے انکشاف کیا کہ بھارتی فنکاروں کو اردو میں مکالمے یاد کرنے اور اسکے مطابق چہر ے کے تاثرات دینے میں مشکلات کا سامنا کرنا پڑرہاہے ، شیڈول کے تحت یونٹ کو 5 مئی کو واپس آنا تھا جو اب تک ان بھارتی فنکاروں کی کردار کے مطابق پرفارمنس نہ ہونے سے تاخیر کا شکار ہوا ہے۔ واضح رہے مذکورہ فلم میں رشی کپور کو کاسٹ کرنے کا فیصلہ کیا گیا تھا ان کی جانب سے خاطر خواہ رسپانس نہ ملنے پر مجبور اً ان فنکاروں کو کاسٹ کیا گیا ہے۔ ذرائع نے یہ بھی انکشاف کیا کہ مذکورہ فلم میں ان بھارتی فنکاروں کی شمولیت کو پاکستانی فنکاروں نے بھی پسند نہیں کیا۔ فلم ٹریڈ سے وابستہ شخصیات کا کہنا ہے کہ جب بھارتی فلم پروڈیوسرز ہمارے فنکاروں کو اپنی فلموں میں کاسٹ کرنے سے پیچھے ہٹ رہے ہیں اور ان پر پابندی لگائی ہوئی ہے تو اس صورتحال میں سی کلاس فنکاروں کو کاسٹ کرنا کہاں کی عقل مندی ہے۔
