کراچی (ویب ڈیسک)لاکھوں دلوں کی دھڑکن معروف پاکستانی اداکار و ماڈل عمران عباس اب برطانوی تھرلر سیریز میں جلوہ گر ہوں گے۔عمران عباس نے اپنے آفیشل انسٹاگرام پر اعلان کیا کہ انہوں نے برطانوی سیریز ’دی ٹروجن ہورس‘ (The Trojan Horse) کے لیے معاہدہ کرلیا ہے جس پر وہ بےحد خوش ہیں۔انہوں نے بتایا کہ وہ اس سیریز میں شامی-ترک جاسوس کا اہم کردار ادا کریں گے جس میں ان کے ساتھ برطانیہ، یورپ اور ترکی کے اداکار بھی شامل ہوں گے۔عمران عباس نے مزید لکھا کہ وہ پاکستان کی مثبت انداز میں نمائندگی کرنے کے لیے بہت پرجوش ہیں اور امید کرتے ہیں کہ وہ لوگوں کی توقعات پر پورا اتر کر انہیں خود پر فخر کرنے کا موقع دیں گے۔عمران عباس نے نہ صرف پاکستان میں اپنی بہترین ل±کس اور جاندار اداکاری کی وجہ سے شہرت حاصل کی بلکہ بالی وڈ فلموں میں بھی کام کر کے سب کے دلوں میں گھر کرلیا۔وہ متعدد ڈراموں میں بھی اداکاری کے جوہر دکھا چکے ہیں، جن میں ’مجھے ہے حکم اذان‘، ’میرا نصیب‘ اور ’دل مضطر‘ شامل ہیں۔
