فضائیہ کے پائلٹ کی محب الوطنی کی عکاسی فلم ،پرواز ہے جنون کا ٹیزر جاری

کراچی (ویب ڈیسک)پاکستان کی جلد ریلیز ہونے والی فلم ’پرواز ہے جنون‘ کا پہلا ٹریلر سامنے آگیا، جس میں حمزہ علی عباسی اور احد رضا میر کے علاوہ فلم کی مکمل کاسٹ سامنے آگئی۔3 منٹ دورانیے پر مبنی اس فلم کے ٹریلر کا آغاز اداکارہ ہانیہ عامر کے پائلٹ بننے کی خواہش سے ہوتا ہے، جہاں ان کا مذاق دوسرے پائلٹ احد رضا میر اڑاتے ہیں، تاہم بعدازاں وہ ہانیہ کو پسند کرنے لگتے ہیں، جبکہ ہانیہ حمزہ علی عباسی کو پسند کرتی نظر آتی ہیں۔فلم میں شاز خان اور کبریٰ خان بھی میاں بیوی کے روپ میں نظر آئیں گے۔یہ فلم پاک فضائیہ کو خراج تحسین پیش کرنے کے لیے بنائی گئی ہے جس میں حمزہ علی عباسی سمیت تمام اداکار زبردست ایکشن سینز کرتے نظر آئیں گے۔اس فلم کو فرحت اشتیاق نے تحریر کیا ہے جبکہ دیار دل، من مائل اور دیگر متعدد ہٹ ٹی وی ڈراموں کے ڈائریکٹر حسیب حسن فلم کی ہدایات دے رہے ہیں۔یہ فلم عید الضحیٰ پر ریلیز کی جائے گی۔پاک فضائیہ کی مشترکہ پروڈکشن کے ساتھ بنائی گئی اس فلم میں شوبز کاسٹ کے ساتھ ساتھ پاک فضائیہ سے تعلق رکھنے والی شخصیات اور پائلٹس کو بھی دکھایا جائے گا۔خیال رہے کہ اس فلم میں عثمان خالد بٹ کو بھی کاسٹ کیا گیا تھا تاہم بعدازاں فلم کی کاسٹ تبدیل کردی گئی اور ان کی جگہ احد رضا میر کو کاسٹ کیا گیا۔