سائنسدانوں نے جب چوہوں کو انسانی دماغ کے سیل لگا دیئے تو حیرت انگیز نتائج سامنے آگئے

نیویارک(مانیٹرنگ ڈیسک) انسان ہی وہ واحد مخلوق ہے جو ذی فہم اور فیصلہ ساز ذہن رکھتی ہے۔ کسی اور جانور کے دماغ میں یہ صلاحیت نہیں۔ گزشتہ دنوں امریکی سائنسدانوں نے انسانی دماغ کے خلیے چوہوں کے دماغ میں ٹرانسپلانٹ کر دیئے جس سے ان میں ایسی تبدیلی آئی کہ سائنسدان بھی دنگ رہ گئے۔ ویب سائٹ scientificamerican.com کے مطابق یہ تجربہ امریکہ کی یونیورسٹی آف روچیسٹر میڈیکل سنٹر کے سائنسدانوں نے کیا جس سے چوہوں بہت زیادہ چالاک ہو گئے اور ان کی سیکھنے کی صلاحیت اور یادداشت عام چوہوں کی نسبت کئی گنا بڑھ گئی۔حیران کن طور پر سائنسدانوں نے چوہوں کے دماغ میں جو خلیے داخل کیے وہ نیوران نہیں تھے بلکہ ’گلیا‘ (Glia)نامی خلیے تھے جو برقی سگنلز کی ترسیل کی صلاحیت نہیں رکھتے۔اس تحقیق سے یہ انکشاف سامنے آیا کہ انسانی دماغ میں معلومات کی پراسیسنگ کا طریقہ کار برقی سگنلز کے حامل نیورانز سے بھی آگے ان خلیوں تک پھیلا ہوا ہے جن پر کوئی برقی چارج نہیں ہوتا۔ سائنسدانوں کے یہ تجربہ کرنے کا مقصد ’گلیا‘ خلیوں کے افعال ہی کو سمجھنا تھا۔ تحقیقاتی ٹیم کے سربراہ سٹیون گولڈمین کا کہنا تھا کہ ”اس تحقیق میں ہمیں یہ معلوم ہوا کہ انسان کے غیربرقی خلیے بھی معلومات کی پراسیسنگ میں حصہ لیتے ہیں۔ یہ صلاحیت انسان کے علاوہ کسی اور جانور کے دماغ میں نہیں پائی جاتی۔“