لاہور(ویب ڈیسک)جنسی طور پر ہراساں کیے جانے کے معاملے پر گوکارہ میشا شفیع نے ایک بار پھر لاہور ہائیکورٹ سے رجوع کرلیاہے۔گلوکارہ میشاشفیع نے گورنرپنجاب کی جانب سے اداکارعلی ظفر کے خلاف جنسی ہراسگی کی اپیل مستردکرنےکااقدام لاہور ہائیکورٹ میں چیلنج کیا ہے۔میشاشفیع نے بیرسٹراحمدپنسوتہ اورثاقب جیلانی کے ذریعے ہائیکورٹ سے رجوع کیا ہے۔ لاہور ہائیکورٹ کے جسٹس شاہد کریم نے میشاءشفیع کی درخواست پر سماعت کی ہے۔عدالت نے ابتدائی سماعت کے بعد آئندہ سماعت پرفریقین کے وکلاءکودلائل کیلئے طلب کرلیا ہے۔درخواست گزار نے موقف اختیار کیا ہے کہ گورنرپنجاب نے جنسی ہراسگی کیخلاف دائرکی گئی اپیل خارج کی،صوبائی محتسب کواپیل کیلئے مناسب فورم قرارنہ دیتے ہو ئے درخواست مستردکی گئی۔درخواست میں موقف اختیار کیا گیاہے کہ جنسی ہراسگی کے معاملے میں مالک اورملازم ہوناضروری نہیں ہے۔ کام کی جگہ پرجنسی ہراسگی کیخلاف صوبائی محتسب سے رجوع کیاجاسکتاہے۔عدالت گورنرپنجاب کی جانب سے اپیل مستردکرنےکااقدام کالعدم قراردے۔واضح رہے کہ لاہور کی مقامی عدالت میں گلوکارہ میشا شفیع کے خلاف ہتک عزت کیس میں اداکارعلی ظفر کے لگ بھگ 9گواہوں کے بیانات پر جرح مکمل ہوگئی ہے۔لاہور کی مقامی عدالت کے ایڈیشنل سیشن جج امجد علی شاہ کیس کی سماعت کررہے ہیں۔گواہان کا کہنا تھا وہ ریہرسل سیشن میں موجود تھے ، میشا شفیع کے ساتھ ہراسانی کا کوئی واقعہ پیش نہیں آیا۔یاد رہے 14 مئی کو گلوکارہ میشا شفیع ،اداکار علی ظفر کی طرف سے دائر ہتک عزت کے دعوی سے متعلق درخواست کی سماعت میں سپریم کورٹ سے ریلیف حاصل کرنے میں کامیاب ہوگئی تھیں اور عدالت نے گواہوں کے بیانات اور جرح ایک ساتھ کرنے کی اجازت دی تھی۔سپریم کورٹ نے گواہان پر بیان کے فوری بعد جرح کرنے کا ڈسٹرکٹ کورٹ کا حکم بھی کالعدم قرار دے دیا تھا۔عدالت نے علی ظفر کے وکیل کو ایک ہفتے میں گواہوں کے بیان حلفی جمع کرانے کا حکم دیا تھا اور میشا شفیع کے وکیل نے گواہان پر جرح کرنے کیلئے ایک ہفتے کا وقت مانگ لیا تھا۔
