گلوکار علی ظفر کی جانب سے گلوکارہ میشا شفیع کے خلاف دائر کیے گئے ہتک عزت کے کیس میں اداکارہ عفت عمر کی جرح دوسری سماعت کے دوران بھی مکمل نہ ہوسکی اور عدالت نے انہیں آئندہ سماعت پر بھی جرح کے لیے بلا لیا۔
ہتک عزت کے کیس کی سماعت سیشن کورٹ کے جج امتیاز علی کی عدالت میں ہوئی، جہاں اداکار عفت عمر سے علی ظفر کے وکلا نے جرح کی، تاہم دوسری سماعت کے دوران بھی ان کی جرح مکمل نہ ہوسکی، جس پر عدالت نے گلوکار کے وکلا کو آئندہ سماعت میں اداکارہ سے جرح مکمل کرنے کی ہدایت بھی کی۔
اس سے قبل 12 دسمبر کو ہونے والی سماعت میں پہلی بار علی ظفر کے وکلا نے عفت عمر سے جرح کی تھی، جو مذکورہ کیس میں میشا شفیع کی گواہ ہیں۔
گزشتہ سماعت کے دوران عفت عمر کی طبیعت خراب ہوگئی تھی اور ان کی طبیعت بگڑنے کے باعث سماعت کو کچھ دیر کے لیے روکا گیا تھا، تاہم بعد ازاں سماعت کو 19 دسمبر تک ملتوی کیا گیا تھا۔
آج ہونے والی سماعت میں علی ظفر کے وکلا نے اداکارہ عفت عمر سے جرح کے دوران پوچھا کہ کیا انہوں نے کبھی ڈاکٹر سے اپنا ذہنی توازن چیک کروایا ہے، جس پر اداکار نے جواب دیا کہ انہوں نے اپنا ذہنی تواز چیک کروایا ہے اور وہ بلکل ٹھیک ہیں۔
اداکارہ کے جواب پر علی ظفر کے وکلا نے پھر سوال کیا کہ جب انہوں نے ذہنی توازن چیک کروایا تو ڈاکٹر نے انہیں کوئی میڈیسن دی تھی؟ جس پر عفت عمر نے بتایا کہ انہیں ڈاکٹر نے بلڈ پریشر اور ڈپریشن کی دوائی دی تھی۔
