کراچی: قومی کرکٹر عابد علی کو رپورٹس کلیئر آنے کے بعد ڈاکٹرز نے گھر جانے کی اجازت دے دی۔
عابد علی کی میڈیکل رپورٹس کو دیکھنے کے بعد ڈاکٹرز نے انہیں فضائی سفر کی اجازت دی جس کے بعد وہ ایک دو روز میں بذریعہ فلائٹ کراچی سے لاہور روانہ ہوں گے۔
ڈاکٹرز نے عابد علی کو تین ہفتے مزید ری ہیب جاری رکھنے کی ہدایت کی ہے، جس کے بعد اوپنر ایک بار پھر سے کرکٹ سرگرمیوں میں بھی شرکت کے اہل ہوسکتے ہیں۔
ڈاکٹرز کی نگرانی میں عابد علی نے کراچی میں تقریباً دو ہفتے ری ہیپ کیا، اس دوران اُن کو صحت کے حوالے سے کوئی مسائل درپیش نہیں آئے، جس کے بعد وہ اب لاہور پہنچ کر اس سلسلے کو جاری رکھیں گے۔
واضح رہے کہ گزشتہ ماہ کراچی میں قائد اعظم ٹرافی کے میچ کے دوران عابد علی کو دل میں تکلیف کے باعث اسپتال لے جایا گیا تھا، جہاں اُن کے دل کی دو رگیں بند ہونے کا انکشاف ہوا تھا۔ ڈاکٹرز نے فوری طور پر آپریشن کر کے عابد علی کے دو اسٹنٹ ڈالے تھے۔
