اسلام آباد:

پاکستان تحریک انصاف (پی ٹی آئی) کے بانی عمران خان کی بہن علیمہ خان نے مقدمات کے حوالے سے کہا ہے کہ عدالتوں میں جھوٹے گواہ پیش کیے جا رہے ہیں۔

علیمہ خان نے انسداد دہشت گردی (اے ٹی سی) کے باہر میڈیا سے گفتگو کرتے ہوئے کہا کہ آج کل ہم کبھی ایک تو کبھی دوسری عدالت میں پیش ہوتے ہیں، کل سلمان صفدر کی بانی سے ملاقات ہوئی ہے اور انہوں اتنا کہا ہے کہ ان کی ملاقات ہوئی ہے۔

انہوں نے کہا کہ کل ہم سارے سپریم کورٹ جائیں گے، رپورٹ کے بارے میں کل ہی ہمیں پتہ چلے گا، بانی کی آنکھ کا مسئلہ گزشتہ 6 ماہ سے چل رہا ہے، حکومت نے کہا ہے اسپتال لے جاکر بانی کی آنکھ کا علاج کیا گیا ہے۔

ان کا کہنا تھا کہ ہمیں کیا پتا کہ کس نے علاج کیا اور کیا علاج کیا ہے، بانی کی آنکھ بچانے کے بجائے یہ خوف زدہ ہیں بانی کسی کو نظر نہ آئے، بانی اس لیے جیل میں ہیں وہ اپنے ملک اور عوام سے پیار کرتے ہیں، سب کو پتا ہے ایک بانی پی ٹی آئی ہی ملک کو جوڑ سکتا ہے۔

علیمہ خان نے کہا کہ 8 فروری کو ایک کامیاب ہڑتال ہوئی ہے، ان کو پتا چل گیا ہے، اس طرح عوام کبھی احتجاج میں شریک نہیں ہوئے، یہ توجہ ہٹانے کے لیےکبھی کچھ کبھی کچھ خبریں پھیلاتے ہیں۔

لاہور میں بسنت کے حوالے سے ان کا کہنا تھا کہ میرے بچوں نے اور میری بہن کے بچوں نے قیدی نمبر 804 کی پتنگیں اڑائی ہیں اور 8 فروری کو ہم ریلی کے لیے نہیں نکلے، ہم نے گھروں میں بیٹھ کر احتجاج میں حصہ لیا۔

ان کا کہنا تھا کہ ہمارا مطالبہ ہے کہ بانی پی ٹی آئی کے ساتھ انصاف کیا جائے، اب سارا دارومدار عدالتوں پر ہے، عدالتوں میں جھوٹے گواہ پیش کیے جارہے ہیں اور ہم ججوں سے درخواست کرتے ہیں کہ بانی پی ٹی آئی قانون کی بالادستی کے لیے کھڑے ہیں۔

انہوں نے کہا کہ بیرسٹر سلمان صفدر نے کل اتنا بتایا کہ ان کی دو گھنٹے ملاقات ہوئی ہے۔

استغاثہ کا انحصار ایک یوایس بی پر ہے، وکیل فیصل ملک

وکیل فیصل ملک نے میڈیا سے بات کرتے ہوئے کہا کہ استغاثہ کا انحصار ایک یو ایس بی پر ہے، یو ایس بی میں 65 سے زائد ویڈیوز ہیں، علیمہ خان کے خلاف پیش کی گئی ویڈیوز متنازع ہیں، ہمیں امید ہے عدالت استغاثہ کی وڈیوز رد کرے گی۔

ان کا کہنا تھا کہ ویڈیوز میں کچھ سمجھ ہی نہیں آرہی کون کیا کہہ رہا ہے اور یہ کس سورس سے لی گئی ہیں، استغاثہ کی مرکزی شہادت ہمارے نظر میں قابل قبول نہیں ہے۔

انہوں نے کہا کہ علیمہ خان کے خلاف مقدمہ سیاسی انتقامی کارروائی ہے، مقدمے میں پیش کیا گیا مواد غیر متعلقہ ہوچکا ہے اور علیمہ خان کے خلاف کیس مضحکہ خیز ہے۔

کوئٹہ:

بلوچستان میں 31 جنوری کو دہشت گردوں کے حملوں کے دوران مستونگ سینٹرل جیل سے فرار ہونے والے 6 قیدیوں نے رضاکارانہ طور پر خود کو حکام کے حوالے کر دیا۔

ایکسپریس نیوز کے مطابق 31 جنوری کو بلوچستان کے مختلف اضلاع میں کالعدم تنظیم بلوچ لبریشن آرمی سمیت مسلح گروپ کی جانب سے بڑے پیمانے پر حملے کیے گئے تھے اور اس دوران مستونگ شہر میں قائم سینٹرل جیل پر بھی شدید حملہ کیا گیا، جس کے نتیجے میں جیل انتظامیہ کو شدید مشکلات کا سامنا کرنا پڑا تھا۔

حملہ آوروں نے جیل پر قبضہ کرنے کی کوشش کی، عملے کو یرغمال بنایا، تالے توڑے اور تقریباً 27 قیدیوں کو فرار کرانے میں کامیاب ہو گئے تھے۔

اس واقعے کے دوران جیل سپرنٹنڈنٹ سمیت کئی اہلکار زخمی بھی ہوئے تھے جبکہ جیل کے ایک حصے کو آگ بھی لگا دی گئی تھی۔

یاد رہے کہ یہ حملے بلوچستان کے متعدد اضلاع بشمول نوشکی، مستونگ، کوئٹہ اور دیگر علاقوں میں تقریباً ایک ہی وقت میں کیے گئے تھے، جن میں پولیس تھانوں، سرکاری دفاتر، بینکوں اور سیکیورٹی فورسز کے مقامات کو نشانہ بنایا گیا تھا۔

مستونگ جیل سے فرار ہونے والے قیدیوں میں مختلف نوعیت کے جرائم میں ملوث انڈر ٹرائل اور سزا یافتہ افراد شامل تھے، جن میں دہشت گردی، قتل، منشیات اور دیگر سنگین الزامات کے مقدمات درج تھے۔

ایکسپریس نیوز کو جیل ذرائع نے بتایا کہ تازہ ترین پیش رفت میں فرار ہونے والے 6 قیدیوں نے متعلقہ حکام سے رابطہ کیا اور خود کو رضاکارانہ طور پر پیش کر دیا ہے۔

جیل ذرائع کے مطابق یہ قیدیوں کو مستونگ جیل کی انتظامیہ نے اپنی تحویل میں لے لیا ہے جبکہ سیکیورٹی ادارے ان کی تفتیش جاری رکھے ہوئے ہیں تاکہ فرار کے دوران پیش آنے والے حالات، ممکنہ مدد اور دیگر تفصیلات کا جائزہ لیا جا سکے۔

ذرائع نے مزید بتایا کہ قیدیوں کے فرار کے پورے واقعے کے مختلف پہلوؤں کا بھی جائزہ لیا جا رہا ہے، جس میں جیل کی سیکیورٹی میں خامیوں، حملے کی منصوبہ بندی اور عمل درآمد کا تجزیہ شامل ہے۔

پولیس اور متعلقہ ادارے باقی فرار ہونے والے قیدیوں کی تلاش جاری رکھے ہوئے ہیں اور ان کی جلد گرفتاری کے لیے آپریشن جاری ہیں۔

ذرائع نے کہا کہ یہ واقعہ بلوچستان میں سیکیورٹی صورت حال کی نزاکت کو ایک بار پھر اجاگر کر رہا ہے، جہاں حالیہ دنوں میں ایسے حملوں میں اضافہ دیکھا گیا ہے۔

سیکیورٹی حکام نے بتایا کہ فرار ہونے والے دیگر قیدیوں کو بھی جلد پکڑ لیا جائے گا تاکہ قانون کی بالادستی یقینی بنائی جا سکے۔