تاجکستان سے تعلق رکھنے والے دنیا کے سب سے چھوٹے قد کے نامور گلوکار اور سوشل میڈیا اسٹار عبدو روزق کو دبئی ائیرپورٹ پر گرفتار کرنے کے بعد مشروط ضمانت پر رہا کردیا گیا۔
عرب میڈیا کے مطابق بھارتی رئیلیٹی شو بگ باس کے 16 ویں سیزن کے امیدوار مقبول تاجک اسٹار کی پی آر کمپنی نے تصدیق کی تھی کہ عبدو روزق کو ہفتےکی صبح یورپی ملک مونٹی نیگرو سے واپسی پر دبئی ائیرپورٹ پر گرفتار کیا گیا تھا۔
یہ واضح نہیں ہوسکا کہ عبدو روزق کے خلاف کیا شکایات تھیں تاہم تاجک اسٹار کی ٹیم کے ایک نمائندے نے عرب میڈیا کو بتایا تھا کہ ہمیں معلوم ہوا ہےکہ عبدو روزق کو چوری کے الزام میں گرفتار کیا گیا ہے۔ اس حوالے سے انہوں نے مزید کوئی تفصیل دینے سے انکار کیا جب کہ دبئی کے حکام کی جانب سے بھی تاحال کوئی بیان سامنے نہیں آیا۔
اب عرب میڈیا پر ذرائع کے حوالے سے خبر سامنے آئی ہےکہ عبدو روزق کو سفری پابندی کی شرط کے ساتھ ضمانت پر رہا کیا گیا ہے، تاہم اس خبر کی آزادانہ ذرائع سے تصدیق نہیں ہوسکی ہے۔ دبئی حکام نے اس حوالے سے تبصرہ کرنے سے انکار کیا ہے جب کہ پولیس کی جانب سے بھی کوئی بیان جاری نہیں کیا گیا۔
دوسری جانب اسی دوران عبدو روزق کے سوشل میڈیا اکاؤنٹ پر دبئی میں ایک ایونٹ کی تصویر پوسٹ کی گئی ہے جس میں خود عبدو روزق بھی موجود ہے۔ پوسٹ میں عبدو روزق کی جانب سے ایونٹ میں ایوارڈ ملنے پر انتظامیہ اور مداحوں کا شکریہ ادا کیا گیا ہے تاہم گرفتاری یا رہائی کے واقعے کا کوئی ذکر نہیں کیا گیا۔
واضح رہےکہ تاجکستان سے تعلق رکھنے والےگلوکار اور سوشل میڈیا اسٹار عبدو روزق کی عمر 21 برس ہے۔ ان کا قد صرف 100 سینٹی میٹر ہے جس کی وجہ سے انہیں دنیا کا سب سے چھوٹے قدکا گلوکار بھی کہا جاتا ہے۔
عبدو روزق نے بھارتی رئیلیٹی شو بگ باس کے 16 ویں سیزن میں بھی حصہ لیا تھا جس کے باعث وہ بھارت سمیت پاکستان میں بھی مقبول ہوگئے۔
عبدو روزق گزشتہ کچھ سالوں سے دبئی میں مقیم ہیں اور ان کے پاس دبئی کا گولڈن ویزا ہے۔
