پاکستان کی بھارت میں مسلمانوں کے خلاف حالیہ تشدد اور ٹارگٹ حملوں کی شدید مذمت

اسلام آباد: (ویب ڈیسک) پاکستان نے بھارت میں مسلمانوں پر ہونے والے حالیہ تشدد اور ٹارگٹ حملوں کی شدید مذمت کرتے ہوئے کہا ہے کہ بھارتی حکومت ان واقعات کی شفاف تحقیقات کرائے اور مستقبل میں ایسے واقعات کو دوبارہ رونما ہونے سے روکنے کے لیے قابل عمل کوششیں کرے۔
دفترخارجہ کی جانب سے جاری کردہ بیان میں کہا گیا ہے کہ پاکستان بھارت کی مختلف ریاستوں میں مسلمانوں کے خلاف حالیہ تشدد اور ٹارگٹ حملوں کی شدید مذمت کرتا ہے، نئی دہلی میں جہانگیر پوری کی جامع مسجد میں افطار کے وقت توہین آمیز نعرے بازی اور اشتعال انگیزی کی گئی، حالیہ واقعات نے بھارت میں فروری 2020 کے دہلی قتل عام کی ہولناک یادوں کو پھر سے تازہ کر دیا ہے۔
ترجمان دفتر خارجہ نے کہا کہ پاکستان بھارتی حکومت سے مطالبہ کرتا ہے کہ وہ مسلمانوں اور ان کی عبادت گاہوں کے خلاف وسیع پیمانے پر تشدد اور دھمکیوں کے واقعات کی شفاف تحقیقات کرے، بھارتی حکومت مستقبل میں ایسے واقعات کو دوبارہ رونما ہونے سے روکنے کے لیے قابل عمل کوششیں کرے، اور عالمی برداری سے بھی مطالبہ کرتے ہیں کہ بھارت میں اقلیتوں بالخصوص مسلمانوں کے خلاف انسانی حقوق کی سنگین خلاف ورزیوں کے لیے بھارت کو جوابدہ ٹھہرائے۔