کینیڈا: (ویب ڈیسک) کینیڈا میں ایک میوزک ٹیچر نے تُرم بون بجا کر خطرناک ریچھ کو اسکول سے دور بھگادیا۔
غیر ملکی میڈیا رپورٹس کے مطابق کینیڈا کے علاقے شونیگن میں ایک میوزک ٹیچر نے اسکول کے باہر ایک خطرناک ریچھ کو گھومتے ہوئے دیکھا، ٹیچر کا اندازہ تھا کہ یہ ریچھ اسکول میں داخل ہوگا اور طلبہ سمیت تمام عملے کے لیے خطرناک ثابت ہوگا۔
تاہم انہوں نے دماغ کا بروقت استعمال کیا اور اپنی کلاس میں موجود تُرم بون بجا کر ریچھ کو اسکول سے دور بھگا دیا۔
میوزک ٹیچر ٹرسٹن کلازن کا کہنا ہے کہ مجھے اسکول کے باہر کچرے کے ڈبے کے ارد گرد ایک ریچھ کی موجودگی کی اطلاع ملی تاہم اس سے پہلے ہر ایک نے دروازہ پیٹ کر ریچھ کو ڈرانے کی کوشش کی لیکن وہ کامیاب نہ ہوئے۔
ان کا کہنا تھا کہ صورتحال کو دیکھتے ہوئے میں نے سوچا کہ میں ریچھ کو اپنے طریقے سے بھگا سکتا ہوں اس لیے میں اندر گیا اور تُرم بون بجانا شروع کردیا۔
بعد ازاں ریچھ تُرم بون کی آواز سن کر ڈر کر بھاگ گیا۔
